රුපියල් දෙලක්‍ෂයක් අහුලා දුන් ඇල්පිටිය ආනන්ද මධ්‍ය මහා විද්‍යාලයේ 5 වසරේ සචිනි

රුපියල් ශත වෙනුවෙන් "මිනිස්‌කම" උගස්‌ කර ඇති මිනිසුන් සිටින ලෝකයක, අනුන්ගේ දේ ලබාගෙන තාවකාලික සතුටක්‌ විඳීමෙන් ඵලක්‌ නැති බවට මානසික සිතුවම් ඇඳගන්නා මිනිසුන් සිටින්නේ කලාතුරකිනි. එවැනි "මිනිසත්කම" දොරේ ගලා යන සිතකින් යුත් පුංචි දැරිවියක්‌ ගැන ඇල්පිටිය ප්‍රදේශයෙන් අපට අසන්නට ලැබුණේ පසුගිය දිනකදීය.

ඒ රුපියල් දෙලක්‍ෂයකට වැඩි මුදලක්‌ පාරේ වැටී තිබියදී අහුලා ගෙනැවිත් ඇයගේ මව්පියන් සමග එකතු වී අයිතිකරුවන් සොයා ලබා දුන් පුවතයි. මෙවැනි උතුම් සද්ක්‍රියාවක්‌ සිදු කොට මනුෂ්‍යත්වයේ මහා මහිමය උපරිම අයුරින් කුළු ගැන් වූ මේ බෝසත් කතාව ඔවුන්ගේ හදවත්වලට පමණක්‌ සීමා නොකර, ලෝකයේ අස්‌සක්‌ මුල්ලක්‌ නෑරම ඉඟිලි යැමට අත්තටු ලබාදිය යුතු යෑයි අපි සිතුවෙමු. එහෙයින්ම අපි ඒ උතුම් මිනිසුන් සොයාගෙන ඇල්පිටියට ගියෙමු.

        
                          සචිනිගේ මව්පියන් ඇතුළු ඥතීන්...

ගතින් කුඩා වුවත් සිතින් මහා ගුණ නැණ සමුදායකින් යුතු ඒ බෝධිසත්ව ක්‍රියාවට මුල් වී සිටි මේ කුඩා දැරියගේ මව්පියන්ටම කියා නිවසක්‌ නොතිබිණි. ඔවුන් ජීවත් වූයේ ආච්චි අම්මලාගේ නිවසේය. අපි ඇල්පිටිය අවිත්තාව මාර්ගයේ බෝගහ හන්දියේ ඔවුන් පදිංචිව සිටින නිවසට ගොඩ වීමු.

"එන්න මහත්තයෝ වාඩි වෙන්න. දුව නම් ඉස්‌කෝලෙ ගිහිල්ලා. එයාගේ තාත්තා නම් ඉන්නවා. මම කතා කරන්නම්." දරුවාගේ මව යෑයි සිතිය හැකි කාන්තාවක්‌ එක දිගට වචන පෙළක්‌ මුදාහැරියාය.

මොහොතකින් අප ඉදිරියේ පෙනී සිටියේ කාලවර්ණයෙන් යුත් පෘෂ්ටිමත් දේහයකින් හෙබි ඇයගේ ස්‌වාමිපුරුෂයාය. අපි ඔහුගෙන් සිද්ධිය සැකවින් විමසා සිටියෙමු.

සචිනි කෝෂිලා ඇල්පිටිය ආනන්ද මධ්‍ය මහා විද්‍යාලයේ 5 වසරේ ඉගෙනුම ලබන ශිෂ්‍යාවකි. ඇයගේ පියා වන සමන් කුමාර සිය ත්‍රිරෝද රථයෙන් කුලී ගමන් යැම රැකියාව කරගත්තෙක්‌ විය. ඇයගේ මව කලංසූරිය ආරච්චිගේ තුෂාරී දිල්රුක්‌ෂිය. සචිනිගේ එකම සහෝදරයා සොනාර නවෝද්‍ය යි. දරුවන් දෙදෙනාම උස්‌ මහත් කර ගනිමින්, තම මව්පියන්ව ද රැකබලා ගනිමින් ජීවන ඔරුව පැදයන්නට සමන්ට ඇති එකම හබල වූයේ ත්‍රිරෝද රථය යි. එය ජීවන ඔරුවක්‌ කරගනිමින් ඔවුන් ජීවත් වූයේ අගහිඟකම් දහසක්‌ හිස මත තබාගෙනය. එහෙත් සමන් මෙන්ම තුෂාරී ද පවුලේ සතුටට එය බාධාවක්‌ කර නොගත්තේය.

ඇල්පිටිය නගර මධ්‍යයේ ඉදි වූ ඇසළ තොරණේ අවසන් දිනය පසුගිය 20 වැනිදාට යෙදී තිබිණි. එහෙයින් සමන් තම දරුවන් දෙදෙනාට සහ ආදරණීය බිරිඳට නැවත වරක්‌ තොරණ පෙන්වීමට එක්‌ කරගෙන යැම අමතක නොකළේය. ඇල්පිටිය නගරය අතුරු සිදුරු නොමැතිව සැදැහැවතුන්ගෙන් පිරී ගොස්‌ තිබිණි. ඇසළ තොරණේ විදුලි බුබුළු නිවී යැමට තිබුණේ තවත් හෝරා කිහිපයක්‌ පමණි. ඇස්‌ කපා යන විදුලිය අහසේ රේඛා මවා පෑය. ඈත අහසේ හෙණ ගෙඩි දෙකන් බිහිරි කරමින් පුපුරා ගියේය. සුළඟ රකුසු වෙස්‌ ගෙන අතු ඉති කරකවමින් මහ වැස්‌සකට පෙර නිමිති පහළ කරමින් සිටියේය.

"තාත්තෙ වැස්‌සක්‌ එන්න වගේ. මල්ලි පැට්‌ටත් නිදි අපි ගෙදර යමුද?" පුංචි සචිනි තාත්තාට ඇවිටිලි කළාය.

සචිනිගේ පියා ඇයගේ අතින් අල්ලාගෙන ත්‍රිරෝද රථය නතර කර තිබූ පැත්තට ගමන් කළේය. සුවසේ නිදා සිටින පුංචි සොනාරවත් තුරුළු කරගෙන සචිනිගේ මවත් ඔවුන්ගේ ගමනට එකතු විය.

ත්‍රිරෝද රථය අසළ පාරේ වැටී තිබූ කළු පැහැති බෑගය පයෙන් ඉවත් කරමින් සචිනිගේ මව ත්‍රිරෝද රථයට ගොඩ විය. එහෙත් පුංචි සචිනි දෙවරක්‌ නොසිතා බෑගය අතට ගෙන එය විවෘත කරමින් ඇතුළත විපරම් කළේය. ඇදහිය නොහැකි වී සචිනි භීතියට පත් වූවාය.

"තාත්තෙ මේක ඇතුළේ සල්ලි තියෙන්නෙ." පුංචි සචිනි කෑමොර දුන්නාය.

සචිනිගේ මව එක පාරටම බෑගය අතට ගෙන "දෙයියනේ මේකේ සල්ලි ගොඩක්‌ නේ මහත්තයෝ"

තුෂාරීගේ හඬත් සමග පණ ගන්වා තිබූ ත්‍රිරෝද රථය එක පාරටම සමන් නතර කළේය. ඔවුහු එකිනෙකා ගොළු වූහ. සතුට දෝරේ ගලා සිත්වලට උභතෝකෝටික ප්‍රශ්න ගලා ආවේය. ගත වූයේ නිමේෂයකි.

"අනේ තාත්තෙ මට බයයි. මේක අපි පොලිසියට ගිහින් දෙමු." පුංචි සචිනි මහ හඬින් හඬන්නට වූවාය.

සමන් ඔවුන්ගේ හිතවතකු වන ජානක සූරියආරච්චිට දුරකථන ඇමතුමකින් සිද්ධිය විස්‌තර කළේය. ජානක දුර්දර්ශීව සිතමින් ඔහු ඉන්නා තැනට සමන්ට එන්නැයි කීවේය. සමන්ගේ ත්‍රිරෝද රථයට පියාපත් ලැබිණි. මොහොතකින් ජානක සිටි ස්‌ථානයේ සමන්ගේ ත්‍රිරෝද රථය නතර විය. ජානක පාර්සලය ගෙන හොඳින් පරීක්‍ෂා කර බලා එහි රුපියල් එක්‌ලක්‍ෂ පනස්‌ දහසකට වැඩි මුදලක්‌ ඇති බව නිගමනය කළේය. මඟ තොටේ ප්‍රශ්න විසඳිය නොහැකි බව තේරුම් ගත් සියල්ලෝම සමන්ගේ මහ ගෙදරට ගියේ සිදු විය යුත්තේ කුමක්‌දැයි කියා සාකච්ඡා කිරීමටය.

"අනේ.. තාත්තෙ අපිට ඉස්‌කෝලේ මිස්‌ කියලා තියෙන්නෙ අනුන්ගේ දේවල් ගන්න එපා, ඒක හරි පව් වැඩක්‌ කියලයි. අනේ.. ජානක මාමේ මේ පාර්සලය අපි පොලිසියට ගිහින් දෙමු." සචිනිගේ හැඩීම තීව්‍ර විය.

ඔවුන් බෑග් එක ඇතුළේ තිබූ මුදල් පිටතට නොගෙන තවත් මොනවා හෝ දෙයක්‌ තියෙනවාද කියා ලයිට්‌ එළියට අල්ලමින් හොඳින් බැලුවේය. ප්‍රයත්නය සාර්ථකය. සේවා හැඳුනුම්පතක්‌ සහ බැංකු පොතක්‌ ඔවුන්ගේ ඇස ගැටිණි. හැඳුනුම්පත සහ බැංකු පොත අතට ගෙන හොඳින් පරීක්‍ෂා කළ ජානක මුදල් පාර්සලේ හිමිකරු නාරංඕවිට පොරවගම පදිංචි අමරසිංහ ආරච්චිගේ ධර්මදාස නමැත්තා බවට තහවුරු කර ගත්තේය. ඔවුහු සැවොම තීරණයකට එළඹුණහ. ඒ රෑ එළිවෙන්නට පෙර මේ මුදල් පාර්සලේ හිමිකරු සොයා ලබා දිය යුතු බවටය.

ජානකගේ මෝටර් රථයෙන් මෙන්ම සමන්ගේ ත්‍රිරෝද රථයෙන් ද සචිනිත් සමග සියල්ලෝම පොරවගම ධර්මදාසලාගේ නිවස සොයා යන "මනුෂ්‍යත්වයේ" ගමන ආරම්භ කළෝය. ඇල්පිටියට ගම්මාන දෙක තුනකට එහෙයින් පොරවගම පිහිටා තිබූ හෙයින් පොරවගම ගැන ඔවුන් හොඳින් දැන සිටීයහ. නමුදු ධර්මදාසලාගේ නිවස පිහිටා ඇති ඉසව්වක්‌ ඔවුන් කිසිවකු දැන සිටියේ නැත. කාලය කෙමෙන් කෙමෙන් ගෙවී ගියේය. දවස අවසන් වීමට ඇත්තේ තවත් හෝරාවක්‌ පමණි. චන්ද්‍රයාගේ ආලෝකය වැසි දෙවියෝ සොරාගත් සේය. ඝන අන්ධකාරය අතරින් අප ඉදිරියට එන්නේ හුලුඅත්තක්‌ අතින් ගත් කාන්තාවක්‌ සහ ළමයින් දෙදෙනෙකි.

"අක්‌කෙ විදුලිබල මණ්‌ඩලයේ වැඩ කරන ධර්මදාසලාගේ ගේ තියෙන්නෙ කොහෙද? ජානක හඬ මුදාහැරියාය."

"බුදු මහත්තයෝ එයාට කරදරයක්‌ද? ඒ මගේ මහත්තයා. මේ එයාගේ දරුවෝ. එයා උදේ වැඩට ගිහින් තවම ගෙදර ආවේ නැති නිසා අපි මේ බලන්න යනවා. අනේ මහත්තයෝ එයාට කරදරයක්‌ ද කියන්න." හීන්දෑරි කාන්තාවක්‌ එක දිගට වචන පෙරළුවාය.

එහෙම කරදරයක්‌ නැහැ. අපි ආවේ උදව්වක්‌ කරන්න. යමු ගෙදරට..
ඒ නිවස පස්‌ දෙනකුට ජීවත් වීමට තියා දෙදෙනකුටවත් වසන්නට නොහැකි තරම් කුඩා කාමරයකි. එහෙත් ඔවුන් පස්‌ දෙනා ගුලී වී නිදන්නෙ ඒ පුංචි කාමරයේ විය.

අමරසිරි ආරච්චිගේ ධර්මදාස දරුවන් තිදෙනකුගේ පියෙකි. ඔහුගේ බිරිඳ පාලිකා රංජනීය. ධර්මදාස සීනිගොඩ විදුලිබල මණ්‌ඩලයේ අර්ධ පුහුණු කාර්මික සේවකයෙකි. ධර්මදාස උදෙන්ම නිවසින් පිටව ගොස්‌ ඇත්තේ ඔවුන්ට අලුත් නිවසක්‌ තනාගැනීමට බැංකුවෙන් ඉල්ලූ ණය මුදල් පාස්‌ වී ඇති හෙයින් එය ලබාගැනීමටය. එදින ඔහු ඉක්‌මනට එන බව ද තම බිරිඳට පවසා තිබිණි.

ධර්මදාසට කුමක්‌ සිදු වී ඇත්දැයි නොදන්නා බවත්, ඇල්පිටිය නගර මධ්‍යයේ තිබී මේ මුදල් පාර්සලය සහ බැංකු පොත මගේ දරුවා ඇහිලූ බවත් සමන් කුමාර පවසමින් ධර්මදාසගේ බිරිඳගේ දෝතට මුදල් පාර්සලය දුන්නේය. ඇය එය දෝතින්ම ලබාගෙන සචිනිට පිං දුන්නේය. ස්‌තූති ද කළාය. සචිනිගේ සීදේවී මුහුණ අඳුර මකන්නට පැයූ සඳක්‌ මෙන් බැබලිණි. වැහි බිංදු මොරගෙඩි මෙන්ම කඩා හැලිණි. රාත්‍රිය සීතල වුවද ඔවුන්ගේ හදවත් උණුසුම්ය. ඒ ඔවුන් යන තැනට එකතු කරගත් පුණ්‍යකර්මය නිසා සේය.

"අපි පස්‌සෙයි දැනගත්තේ මිනිහා බැංකුවෙන් සල්ලිත් අරගෙන පදමට සූර වෙලා මඟ කොහේද නිදාගෙන උදේ ගෙදර ගිහින් තියෙන බව. මිනිහා දවස ගානෙම අරක්‌කු බොන කෙනෙක්‌ලු." අපේ කතාව සමන් වෙනත් පැත්තකට යොමු කළේය.

සමාජයේ ඇතැම් මිනිස්‌සු නිවසේ අගහිඟකම් ඉහවහා යන කොට මත්වතුර ළං කර ගන්නා බව නොරහසකි. එයට ඇති කදිම නිදර්ශනය ධර්මදාසය. ඔහු රජයේ රැකියාවක නිරත වී සිටිය ද ඔහුට තවම හරි හැටි නිවසක්‌ තනා ගැනීමට නොහැකි වී ඇත. පවතින ආර්ථික ක්‍රමය යටතේ දරුවන් තිදෙනකු උස්‌මහත් කරමින්, ඔවුන්ගේ අධ්‍යාපන කටයුතුවලට වියදම් කළ පසු වෙනත් දෙයක්‌ ගැන සිතීම සිතළුවක්‌ පමණක්‌ බව අපිදු දනිමු. එසේ යෑයි සිතා ධර්මදාසට සමාවක්‌ දිය නොහැකිය. ඔහු දිනපතා මත්වතුරට වියදම් කරන මුදල කොපමණ වේද? එමෙන්ම ඔහු නිවස තනාගැනීමට බැංකුවෙන් ගත් විශාල ණය මුදල ආරක්‍ෂා කරගැනීමට පවා නොහැකි "බේබද්දෙකි." ඒ මුදල් පාර්සලය මිනිසත්කම හඳුනන අහිංසක මිනිසුන්ගේ නෙත ගැටුණේ ධර්මදාසගේ දරුවන්ගේ පිනකටය. නැති නම් ඊට පෙරදා ධර්මදාස ඔවුන්ගේ පුංචි පැලට යන්නේ ගම්මුන්ගේ කර මතිනි. ඒ මුදල් නොලැබුණා නම් ධර්මදාස ජීවිතය විනාශ කර ගැනීමට තීරණය කර සිටි හෙයිනි. මේ කතාව අපේ සමාජයේ තවත් ධර්මදාසලාට ආදර්ශයකි.

තුෂාරි සහ සමන් මාරුවෙන් මාරුවට සිදුවීම එසේ විස්‌තර කළේය. ඒ අතරට සචිනිගේ ආච්චි අම්මා මෙවැනි වචන පෙළක්‌ මුදාහැරියාය.

"මහත්තයෝ අපි දුප්පත් තමයි ඒත් අපේ ළමයි ගුණයහපත්කම්වලින් පොහොසත්. මගේ පුතා සතෙකුටවත් හිංසාවක්‌ කරන්නෙ නැති කෙනෙක්‌. ඒ වගේම කිසිමදාක සිගරට්‌ එකක්‌වත්, මත්වතුර ටිකක්‌වත් කටේ තියලා නැහැ. ඒ දරුවාගේ ලේ තමයි මගේ මිණිපිරියගේ ඇගේ දුවන්නේ. මගේ පුංචි කෙල්ලත් කාගෙන්වත් හොඳක්‌ මිස දොසක්‌ අහන්නෙ නැහැ. කන්න නැති වුණොත් වතුර ටිකක්‌ බීලා නිදා ගන්නවා. අපිට අනුන්ගේ දේවල් ඕනෑ නෑ." රැලි වැටුණු මුහුණින් සිහින් සිනා රැල්ලක්‌ දිස්‌ විය.

අපි සචිනිගේ මව්පියන්ගෙන් සමුගෙන ඇල්පිටිය ආනන්ද මධ්‍ය මහා විද්‍යාලයට ගියෙමු. විවේක කාලය හඟවන සීනුව නාද විය. රොනට ඇදෙන සමනලුන් මෙන්, පුංචි පැටවු වතුර කරාමය අසලට දිව ගියහ. අපිදු ඒ සුන්දර සමනල පැටවු දෙස මොහොතක්‌ බලා සිටියෙමු. අපේ කාලේ බෝසත් ගුණැති පුංචි සචිනි සමග කතා කිරීමට අපි නොනිමි ආශාවකින් පසු වීමු. ආනන්ද මධ්‍ය මහා විද්‍යාලයේ විදුහල්පතිනියගේ අවසර ඇතිව අප සචිනි සමග කතා කළෙමු. ඇයගේ මුවින් පිට වූයේ මෙවන් වදන් පෙළකි.

"අපිට ඉස්‌කොලේ මිස්‌ලා සර්ලා කියලා දීලා තියෙන්නෙ අනුන්ගේ දේවල් ගන්නා එපා කියලයි. ඒක මට ඒ වේලාවේ මතක්‌ වුණා. මම තාත්තාට කියලා ඒ සල්ලි අයිතිකාරයන්ට දුන්නා. මට කියන්න තියෙන්නෙ ඒක නෙවෙයි. අපේ පාසල ආනන්ද විද්‍යාලයෙන් වෙන් කරන්න හදනවා. ජනාධිපතිතුමාට කියන්න අපිව වෙන් කරන්න දෙන්න එපා කියලා. අපිට ඉගෙන ගන්න තියෙන්නෙ මෙච්චරයි නේ." එය සචිනිගේ දුක්‌ගැන්විල්ලක්‌ පමණක්‌ නොව ඇල්පිටිය ආනන්ද මධ්‍ය මහා විද්‍යාලයේ ගුරු ශිෂ්‍ය දෙපාර්ශ්වයේම එකම දුක්‌ගැනවිල්ල ද විය.

ආනන්ද මධ්‍ය මහා විද්‍යාලයේ ගුරුභවතුන්ගේ පමණක්‌ නොව පුංචි සචිනිගේ ද ප්‍රාර්ථනා එලෙසින්ම ඉටු වේවායි පතන අතර සචිනිලාගේ මේ බෝසත් කතා පුවතින් මතු වී පෙනෙන තවත් යථාර්ථයක්‌ තිබේ. එනම් අද අප ජීවත් වන්නේ මිල මුදල ගැන සිතන සිතුම්වලින් කිළිටි වී ගිය මිනිසුන්ගේ පිරී ඉතිරි ගිය මඩ ගොහොරුවක්‌ වැනි සමාජයකය. අසීමිත ආශාවන් පමණක්‌ නොව ඒවායෙහිම අවසානය වන තවත් ශෝකි ෙ€දාන්ත රැසකටත් සමාජය අද සරු කෙතක්‌ වී තිබෙන්නේත් මේ නිසාය. මෙවන් පසුබිමක කුසට හරි හැටි අහරක්‌ පමණක්‌ නොව ඉණට හරි හැටි වතක්‌ හෝ නැති වුණත් එම මඩ ගොහොරුවට වැටී ජීවත්වනු වෙනුවට මිය යනු යෙහෙකැයි සිතන මිනිසුන් ලොව සිටින්නේ නම් ඒ අතේ ඇඟිලි ගණනටත් වඩා අඩුවෙන්ය. පුංචි සචිනිත්, ඇයගේ පවුලේ අයත් වැටෙන්නේ එවැනි දුර්ලභ වූද උදාරතම වූද විශිෂ්ට මිනිසුන් කොටසකගේ ගණයකටැයි අපි සිතමු. ගම රට පමණක්‌ නොව ඉන් ඉක්‌බිතිව ලොවද යහදහමින් සුවඳවත් වී ගොඩ නැගෙන්නේ මෙවන් බෝසත් මිනිසුන්ම සිටින පසුබිමකය.
ඉරිදා දිවයින ඇසුරිනි

Read More

ඕස්ටේ‍්‍රලියාවන්ට එරෙහිව තරග බිමට තරංගත් එයි

මේ වන විට මාස තුනක තරග තහනමකට ලක්ව සිටින ආරම්භක පිතිකරු උපුල් තරංග, ලබන මාසයේදී
 ඕස්ටේ‍්‍රලියාවට එරෙහිව පැවැත්වෙන එක්දින සහ ටෙස්ට් තරග සඳහා සහභාගිවීමට නියමිත බව ශී‍්‍ර ලංකා කි‍්‍රකට්
ආයතනයේ උසස් නිලධාරියෙක් පැවසීය. මෙම තරගාවලිය සඳහා තෝරා ගන්නා ලද 20 දෙනකුගෙන් සමන්විත
සංචිතයට තරංග ඇතුළත් වී නොතිබිණ.

”අන්තර්ජාතික කි‍්‍රකට් සභාව විසින් නියම කරන ලද තරග තහනමකට තරංග මුහුණ දී තිබෙන නිසා කිසිම
ආකාරයේ නිල ලේඛණයකට ඔහු ඇතුළත් කරගැනීම අපට කළ නොහැකියි. ඒත් අගෝස්තු 9 වැනිදා
ඔහුගේ තරග තහනම අවසන් වුණාට පස්සේ ඔහුව ශී‍්‍ර ලංකා සංචිතයට ඇතුළත් කළ හැකියි” යයිද එම
නිලධාරියා පැවසීය.

 ඕස්ටේ‍්‍රලියානු පිලට එරෙහිව පැවැත්වෙන විස්සයි/20 තරග දෙකත් පළමු එක්දින තරගයත් තරංගට අහිමි
විය හැකි නමුත් තරගාවලියේ සෙසු තරග වලට සහභාගි වීමේ අවස්ථාව ඔහුට තිබේ.

Read More

ආසනික්‌, කැල්සියම් ආසනේට්‌, කිවුල සහ ලෙඩ රෝග

ආසනික්‌ පිළිබඳව හා කිවුල් ජලයේ නිර්මාණය වන කැල්සියම් ආසනේට්‌ සංයෝගය පිළිබඳව කතාබහක්‌ ඇති වී තිබේ. පළමුවෙන් ම අපි ජලයේ කිවුල යන්න පිළිබඳව පවතින විද්‍යාත්මක පදනම විමසා බලමු.

කිවුල් ජලය ලෙසින් විද්‍යාත්මකව හඳුන්වනුයේ කැල්සියම් හා මැග්නීසියම් අධික ජලයයි. Ca හා ඵට අධික පාෂාණ වන හුණුගල්, ඩොලමයිට්‌, කැල්සියම් ආදිය ජීර්ණය වීමෙන් භූගත ජලයට අධික සාන්ද්‍රණයකින් මේ අයන එක්‌ වේ. කිවුල් ජලය හෙවත් කඨින ජලය වර්ග ද්වයකි. ඒ, තාවකාලික කඨිනත්වය හා ස්‌ථිර කඨිනත්වය ලෙසිනි. තාවකාලික කඨිනත්වය ඇති වනුයේ කැල්සියම් හා මැග්නීසියම් බයිකාබනේට්‌ හේතුවෙනි. එය ජලය නටවා නිවීමෙන් ඉවත් කළ හැකි ය. ජලය නැටවීමේ දී කැල්සියම් හා මැග්නීසියම් බයිකාබනේට සංයෝග වෙන් වේ. පසුව ජලයේ අද්‍රාව්‍ය කාබනේට සංයෝග තැනේ. මේ ජලය පෙරීමෙන් අද්‍රාව්‍ය කාබනේට සංයෝග ඉවත් කර පානයට ලබාගත හැකි ය. එහි දී සිදු වන ප්‍රතික්‍රියාව අපට මෙසේ දැක්‌විය හැකි ය.

Ca(HCO3)2 (aq)→ CO2(g)+ H 2O(l)+CaCO3(s)
Mg(HCO3)2 (aq)→ CO2(g)+ H2O(l)+MgCO3(s)

ජලය නටවා ඉවත් කරගත හැකි මේ කඨ§නත්වය තාවකාලික කඨිනත්වය ලෙස හැඳින්වේ. මීට අමතරව ජලයේ දිය වී ඇති සල්ෆේට්‌, ක්‌ලෝරයිඩ ආදිය ජලයේ කඨ§නත්වය කෙරෙහි සුළු බලපෑමක්‌ ඇති කරයි.

ස්‌ථිර කඨිනත්වය ඇති වනුයේ කැල්සියම් හා මැග්නීසියම් කාබනේට හේතුවෙනි. එය ඉවත් කර ගැනීම අපහසු ය. කඨ§නත්වය නැත හොත් කිවුල රසායන විද්‍යාවේ දී ප්‍රකාශ කරනුයේ CaCO3 සාන්ද්‍රණය ලෙසිනි. එසේ CaCO3 සාන්ද්‍රණය ලීටරයට මිලිග්‍රෑම් 60-120

(60-120mg/L))ත් අතර නම් එම ජලය මධ්‍ය කිවුල් ජලය ලෙසත්, 120-180 mg/L අතර නම් කිවුල් ජලය ලෙසත්, 180ට අධික නම් අධික ලෙස කිවුල් ජලය ලෙසත් ගැනේ. ශ්‍රී ලංකාවේ වියළි කලාපයේ බෙහොමයක්‌ ප්‍රදේශවල ජලය අධික කිවුල් ජලය හෝ කිවුල් ජලය වේ. මේ ප්‍රදේශ අතරට ඇඹිලිපිටිය, හම්බන්තොට, මොණරාගල, අනුරාධපුර, පොළොන්නරුව මෙන්ම යාපනය ද අයත් වේ.

ජල භූ රසායන විද්‍යාවට අනුකූලව ජලයේ කිවුල හෝ කඨ§නත්වයට ප්‍රබලව බලපානුයේ Ca, Mg මූලද්‍රව්‍ය හා ඒවායේ කාබනේට බයිකාබනේට ප්‍රභේද පමණකි. එසේ ම ජලයේ කඨ§නතාව ප්‍රදේශයෙන් ප්‍රදේශයට වෙනස්‌ වන්නේ නම් ඒ එහි ඇති තාවකාලික හෝ ස්‌ථිර කඨිනත්වය පමණකි. එනිසා කඨ§න ජලය හම්බන්තොටින් වේ වා පදවියෙන් වේ වා වෙනත් ප්‍රදේශයකින් වේ වා නියෑදි දෙකක්‌ ගත් කල ඒවායේ වෙනසක්‌ ඇති වන්නේ නම් ඒ Caල ඵට බයිකාබනේට හා කාබනේට සාන්ද්‍රණ පමණකි.

දැන් අපි කැල්සියම් ආසනේට්‌ සංයෝගය පිළිබඳව විමසා බලමු. කැල්සියම් ආසනේට්‌ (Ca3(AsO4)2 යනු අධික විෂ සහිත සංයෝගයක්‌ බැව් සැබෑ ය. එහෙත් මේ ද්‍රව්‍යය ජලයේ ඉතා ම අඩුවෙන් ද්‍රවණය වන සංයෝගයකි. එය ජලයේ දිය කිරීම ඉතා අපහසු ය. මේ සංයෝගය මිනිසා විසින් කෘමිනාශක කෘෂි රසායන ද්‍රව්‍යයක්‌ ලෙසට භාවිත කොට ඇත. පසුව ලෙඩ් ආසනේට්‌ හා කැල්සියම් ආසනේට්‌වල විෂ ස්‌වභාවය හේතුවෙන් එවැනි අකාබනික ආසනික්‌ ප්‍රභේද කෘමිනාශක ලෙස භාවිත කිරීම අප රටේ ද ඇතුළුව නොයෙකුත් රටවල තහනම් කිරීමට ලක්‌ විය. කැල්සියම් ආසනේට්‌ ස්‌වාභාවිකව නිර්මාණය වේ නම් ජල භූ රසායනයට අනුව එය අතිශය වටිනා කාරණයකි. මන්ද යත් කැල්සියම් ආසනේට්‌වල අඩු ද්‍රdව්‍යතාව හේතුවෙන් ඒවා තැන්පත් වී ආසනික්‌ ජලයේ දිය වී තිබෙනවාට වඩා අඩු විෂ තත්ත්වයක්‌ එමගින් ඇති වන නිසා ය. මේ විද්‍යාත්මක ක්‍රමය හේතුකොට බටහිර රටවල් බොහොමයක්‌ ජලයෙන් ආසනික්‌ ඉවත් කිරීම සඳහා කැල්සියම් භාවිත කරනු දක්‌නට හැකි ය.

අනෙක්‌ කාරණය වන්නේ කැල්සියම් ආසනේට්‌ හේතු කොට වකුගඩු රෝගී තත්ත්ව ඇති වීමේ සාක්‌ෂි සොයාගැනීමේ අපහසුතාවයි. සාමාන්‍යයෙන් ආසනික්‌ විෂ වීම් මගින් ඇති වනුයේ පිළිකා හටගැනීම් ය. ආසනික්‌ හා කැල්සියම් ආසනේට්‌වල දීර්ඝකාලීන විෂභාවය සෙවීම සඳහා ලෝකය පුරා කර ඇති පර්යේෂණ පත්‍රිකා බොහොමයක සඳහන් වනුයේ ද සමේ, අක්‌මාවේ පිළිකා තත්ත්වයන් ය. කැල්සියම් ආසනේට්‌ කෘෂි රසායන ද්‍රව්‍ය භාවිත කර නිපදවූ ආහාර මගින් කළ පර්යේෂණයක දී තහවුරු වී තිබුණේ ද එමගින් ඇති විය හැක්‌කේ සමේ පිළිකා තත්ත්වයන් බවයි. එහෙත් කැල්සියම් ආසනේට්‌ බීමෙන් පමණක්‌ වකුගඩු රෝගී තත්ත්ව ඇති විය හැකි බැව් පෙනී ගොස්‌ ඇත.

විද්‍යාත්මක සත්‍යතාව සලකා බලන කල ආසනික්‌ අපේ ආහාරයේ ජලයේ දක්‌නට හැකි සංයෝගයකි. එහෙත් අප බිය විය යුතු වනුයේ එහි සාන්ද්‍රණය හෝ අප විසින් ලබා ගන්නා මාත්‍රාව අධික ලෙස ඉහළ නම් පමණකි. දැනට පවත්නා විද්‍යාත්මක සාධක සලකා බලන කල අපට බිය විය යුතු තත්වයක්‌ උදා වී නැත. එසේ ආසනික්‌ පස සමග මිශ්‍ර වී ඇත්නම් කන්න දෙකක්‌ පළිබෝධ නාශක නොමැති ව වගා කිරීමෙන් ප්‍රශ්නය නිරාකරණය වන්නේ ද නැත. බැර ලෝහ පරිසරයේ බොහෝ කල් රඳා පවතින බැවින් එලෙස කන්න දෙකක්‌ වගා නො කර සිටීමෙන් හෝ පළිබෝධනාශක නො යෙදීමෙන් ප්‍රශ්නය නො විසඳේ.

අප පානය කරන ජලයේ ද ආසනික්‌ හමු වේ. ඒ අංශු මාත්‍ර ප්‍රමාණයකිනි. ලීටරයකට මයික්‍රොග්‍රෑම් 1-5ත් අතර ප්‍රමාණයකින් ආසනික්‌ ජලයේ දක්‌නට ලැබීම සාමාන්‍ය ය. ශ්‍රී ලංකාවේ උණු වතුර ළිං ජලයේ ද ආසනික වැඩි වශයෙන් දක්‌නට හැකි ය. ශ්‍රී ලංකාවේ සහල්වල ද ආසනික්‌ ඉතා සුළු වශයෙන් දක්‌නට තිබේ. එම අගයන් ද ලෝකයේ අනෙකුත් සහල් නිපදවන රටවල් හා සැසැඳීමේ දී අඩු ප්‍රමාණයකි. අන්තර්ජාතික පර්යේෂණ පත්‍රිකාවල සඳහන් ආකාරයට ශ්‍රී ලංකාවේ සහල්වල ආසනික්‌ පවතින සාමාන්‍ය අගය 0.2 mg/kg පමණ වේ. මේ තත්ත්වය ශරීරයට හානිදායක නො වන ප්‍රමාණයක්‌ බැව් විද්‍යාත්මකව සනාථ කර ඇත. 
විදුසර ඇසුරිනි

Read More

ලබන 5 දාට පෙර ගැටලුවලට විසඳුම් ඕනෑ ගුරු සංගම් 3 කින් රජයට රතු එළියක්‌

ගුරු සේවයේ පවතින ගැටලුවලට ලබන මස 5 වැනිදාට පෙර විසඳුම් නොලැබුණහොත් දැනුම් දීමකින් තොරව දැඩි වෘත්තීය ක්‍රියාමාර්ග ගැනීමට ප්‍රධාන පෙළේ ගුරු වෘත්තීය සංගම් තුනක්‌ තීරණය කර ඇත.

අධ්‍යාපන වෘත්තිකයන්ගේ සංගමය, සමස්‌ත ලංකා එක්‌සත් ගුරු සංගමය හා ලංකා ගුරු සංගමය මෙම තීරණය ගෙන තිබේ.

අධ්‍යාපන අමාත්‍යාංශය විසින් සකස්‌ කරන ලද අතුරු වැටුප් යෝජනාව ක්‍රියාත්මක කිරීම 2008/45 දින චක්‍රලේඛයෙන් පසුව උද්ගත වූ පුහුණු ගුරුවරුන්ගේ සහ උපාධිධාරී ගුරුවරුන්ගේ වැටුප් විෂමතා ඉවත් කිරීම, ගුරු වෘත්තීය සංගම්වල අදහස්‌ විමසීමකින් තොරව කැබිනට්‌ මණ්‌ඩලයට ඉදිරිපත් කර ඇති විදුහල්පති හා ගුරු සේවා ව්‍යවස්‌ථා සම්බන්ධයෙන් යළි සාකච්ඡා කිරීමට අවස්‌ථාව ලබා ගැනීම යන ඉල්ලීම් පිළිබඳ මෙම සංගම් අධ්‍යාපන ලේකම් එච්. එම්. ගුණසේකර මහතා සමඟ සාකච්ඡා කර ඇති අතර මෙම ගැටලුවලට අදාළව ලබන 5 වැනිදා තවත් සාකච්ඡාවක්‌ ලබාදීමට ද ලේකම්වරයා එකඟ වී ඇත. එහිදී මෙම ගැටලුවලටත් විසඳුම් ඉදිරිපත් කරන බව ද ගුණසේකර මහතා දැනුම් දී තිබේ.

නිලධාරීන්ගේ එකඟතා පිළිබඳ අතීතයේ හොඳ අත්දැකීම් තිබෙන බව ද මෙවරද එකඟතා කඩවුවහොත් ගුරු වෘත්තීය සංගම් දැඩි ක්‍රියාමාර්ග ආරම්භ කරමින් විශාල බලපෑමක්‌ එල්ල කිරීමට සූදානමින් සිටින බව ද එම ගුරු සංගම් නියෝජිතයෝ පවසති.

Read More

වැටුප් ප්‍රශ්නයට විසඳුමක්‌ නොදී කල්මැරීමට විරෝධය උසස්‌ පෙළ ලකුණු පටිපාටි හදන්න මෙවර ඇදුරන් නෑ

විශ්වවිද්‍යාල ආචාර්යවරුන්ගේ වැටුප් ප්‍රශ්නයට විසඳුම් ලබාදීම දිගින් දිගටම කල්මැරීමට විරෝධය පළකරමින් මෙවර උසස්‌ පෙළ විභාගයේ ලකුණු දීමේ පටිපාටි සකස්‌ නොකිරීමට විශ්වවිද්‍යාල ආචාර්යවරුන්ගේ සමිති සම්මේලනය තීරණය කර ඇත.

උසස්‌ පෙළ උත්තර පත්‍ර ඇගැයීම් කටයුතු අධීක්‍ෂණය වර්ජනය කරන බව එම සම්මේලනය දැනටමත් විභාග කොමසාරිස්‌ ජනරාල් අනුර එදිරිසිංහ මහතාට ලිඛිතව දන්වා තිබේ. අධ්‍යාපන ඇමැති බන්ධුල ගුණවර්ධන මහතා ප්‍රකාශ කර තිබුණේ ආචාර්යවරුන් වර්ජනය කරන්නේ නම් සුදුසුකම් සහිත ගුරුවරුන් ඒ සඳහා යොදාගන්නා බවය. විශ්වවිද්‍යාල ආචාර්යවරුන්ගේ වෘත්තීය ක්‍රියාමාර්ග විවේචනය කරමින් අධ්‍යාපන ඇමැතිවරයා මෑතකදී කර තිබූ ප්‍රකාශයකටද ආචාර්යවරුන්ගේ සමිති සම්මේලනය දැඩි අප්‍රසාදය පළ කරයි. උසස්‌ පෙළ ලකුණු දීමේ පටිපාටි සකස්‌ නොකිරීමට එම ප්‍රකාශයද හේතුවක්‌ වී ඇත.

ආචාර්යවරුන්ගේ වැටුප් වැඩි කිරීමේ ඉල්ලීම්වලට ප්‍රතිචාර වශයෙන් මීට දෙසතියකට පෙර ආණ්‌ඩුව පාර්ශ්වයෙන් ඉදිරිපත් කළ යෝජනාවට ආචාර්යවරුන්ගේ සමිති සම්මේලනය එකඟතාව පළ කර තිබිණි.

ආණ්‌ඩුවෙන් ඉදිරිපත් කළ යෝජනාවට එකඟ වී දෙසතියකට ආසන්න කාලයක්‌ ගතවී ඇතත් මෙතෙක්‌ කිසිදු ප්‍රතිචාරයක්‌ ලැබී නැතැයිද මෙම ප්‍රශ්නය විසඳීම කල්මැරීම එතරම් යහපත් තත්ත්වයක්‌ නොවන බවද එම සමිති සම්මේනයේ සභාපති ආචාර්ය නිර්මාල් රන්ජිත් දේවසිරි මහතා "දිවයින" ට ඊයේ (10 වැනිදා) පැවැසීය. එමෙන්ම අධ්‍යාපන ඇමැතිවරයා ආචාර්යවරුන් විවේචනය කරමින් කර ඇති ප්‍රකාශය පිළිබඳව ආචාර්යවරුන් බලවත් අප්‍රසාදයකින් පසුවන බවද සභාපතිවරයා සඳහන් කළේය.

කෙසේ වෙතත් උසස්‌ පෙළ විභාගයේ ප්‍රශ්නපත්‍ර සකස්‌ කිරීමේ කටයුතු පැහැර නොහරින බවත් දේවසිරි මහතා ප්‍රකාශ කළේය.

Read More

දිනේෂ් චන්දිමාල් ශතකය ලබා ගැනිමෙන් අනතුරුව නායකයින්ගේ අදහස්

දෙවැනි තරගයේ සිට සුපුරුදු දස්‌කම් අතරට පැමිණීමට සමත්ව සිටින ශ්‍රී ලංකා කණ්‌ඩායමේ දක්‍ෂතා ඉදිරි තරග දෙකේදීත් එලෙසින්ම පවත්වාගත හැකි වුව හොත් එංගලන්තය සමඟ එක්‌දින තරගාවලිය පහසුවෙන්ම ජය ගත හැකි බව ශ්‍රී ලංකා නායක ටී. එම්. ඩිල්ෂාන් පවසයි.

තරග 5 කින් සමන්විත ශ්‍රී ලංකා-එංගලන්ත එක්‌දින තරගාවලිය යටතේ ලෝඩ්ස්‌හිs පෙරේදා (03 දා) පැවැති තෙවැනි තරගයෙන් එංගලන්ත පිල පරදා කඩුලු 6 ක පහසු ජයක්‌ ලැබීමට ශ්‍රී ලංකා කණ්‌ඩායම සමත්විය. එම තරගයෙන් පසුව පැවැති මාධ්‍ය හමුවේදී ඩිල්ෂාන් සිය අදහස්‌ දක්‌වා සිටියේය.

"අපි දෙවැනි සහ තෙවැනි තරගවලදී හොඳින් ක්‍රීඩා කළ නිසා තරග ජයගැනිමට හැකි වුණා. මේ වගේම ඉදිරි තරග දෙකේදීත් ක්‍රීඩා කිරීමට හැකි වුණොත් අපිට තරගාවලිය පහසුවෙන්ම ජය ගන්න පුලුවන්" යනුවෙන් ඩිල්ෂාන් සඳහන් කරයි.

අදාළ තරගාවලිය යටතේ ඕවල්හි පැවැති පළමු තරගයෙන් එංගලන්තය හමුවේ ලකුණු 110 ක පරාජයක්‌ ලැබුවද දෙවැනි තරගයෙන් ලකුණු 69 ක ජයක්‌ සහ තෙවැනි තරගයෙන් කඩුලු 6 ක ජයක්‌ ලැබීම මත මේ වන විට තරගාවලිය 2-1 ක්‌ ලෙස පෙරමුණ ගැනීමට ශ්‍රී ලංකාව සමත්වී සිටියි.

තෙවැනි තරගයේදී ශ්‍රී ලංකා ජයග්‍රහණය වෙනුවෙන් සුපිරි ඉනිමක්‌ ක්‍රීඩා කළ 21 හැවිරිදි ක්‍රීඩක දිනේෂ් චන්දිමාල් පන්දු 126 කදී නොදැවී ලකුණු 105 ක්‌ (හයේ පහර 2 යි හතරේÊපහර 11 යි) වාර්තා කිරීමට සමත්විය. චන්දිමාල්ගේ දෙවැනි ශතකය ලෙසින් මෙම ශතකය වාර්තා වූයේ ඔහු සහභාගිවූ හයවැනි එකදින තරගයේදී වීම විශේෂත්වයක්‌ වේ.

"ශතකයක්‌ ලබා ගැනීම ඕනෑම පිතිකරුවකුට විශේෂ දෙයක්‌. එහෙත් ලෝඩ්ස්‌හි ශතකයක්‌ ලබා ගන්නවා කියන්නේ තවත් ඉතා සුවිශේෂයි. එය චන්දිමාල්ටත් එහෙමයි. ඔහු මෙම තරගයේදී පන්දුවට පහර දෙමින් තරගය නිමා කළේ පරිණත ක්‍රීඩකයකු ක්‍රීඩා කරන අන්දමිනුයි. මෙය ශ්‍රී ලංකාවේ අනාගත ක්‍රීඩාවට හොඳ පෙර නිමිත්තක්‌" යනුවෙන් ලෝඩ්ස්‌ ක්‍රීඩා පිටියේ චන්දිමාල් ලද ශතකය පිළිබඳව ඩිල්ෂාන් අදහස්‌ දැක්‌වීය.

මෙහිදී චන්දිමාල්ට ශතකය ලබා ගැනීම වෙනුවෙන් ඇන්ජලෝ මැතිව්ස්‌ ලකුණු ලබා ගැනීමෙන් වැළකී සිටි අතර එය ඩිල්ෂාන්ගේ කණස්‌සල්ලට හේතුවූ අයුරක්‌ දැක ගැනීමට හැකි විය.

හතළිස්‌ තුන්වැනි පන්දු වාරයේ පස්‌වැනි පන්දුවේ සිට පන්දුවට පහරදීමට පිටියට පිවිසි මැතිව්ස්‌ එහිදී මුහුණ දුන් පන්දු 21 කදී රැස්‌ කරගන්නා ලද්දේ එක්‌ ලකුණක්‌ පමණි.

"ඔවුන් ඒ වෙලාව ක්‍රීඩා කළ විදියට ඇත්තටම මට පොඩි කලකිරීමක්‌ ඇති වුණා. ළාබාල ක්‍රීඩකයන් නිසා ඔවුන් හැම තිස්‌සේම තරගයකදී බොහෝ දේවල් ඉගෙන ගන්නවා" යනුවෙන් ඩිල්ෂාන් පවසයි.

චන්දිමාල්ට ශතකය ලබා ගැනීම සඳහා 47 වැනි පන්දුවාරයට මුහුණ දුන් මැතිව්ස්‌ එහිදී එක්‌ ලකුණක්‌ හෝ ලබා නොගැනීමට වගබලා ගත්තේය.

මේ පිළිබඳව එංගලන්ත නායක ඇලෙස්‌ටෙයාර් කුක්‌ සඳහන් කර සිටියේ මෙවැනි සිදුවීම් දෙස ක්‍රිකට්‌ ලෝකය බලන්නේ කලකිරීමකින් බවයි.

මෙම තරගයේදී එංගලන්තය වෙනුවෙන් ලකුණු 119 ක්‌ ලබාගනිමින් පිත්තෙන් දස්‌කම් දැක්‌වූ කුක්‌ ඒ පිළිබඳව වැඩිදුරටත් මෙසේ අදහස්‌ දැක්‌වීය.

"ඒක හරි වෙනස්‌ සිදුවීමක්‌. මේ වගේ සිදුවීමක්‌ මීට පෙර මම කවදාවත් දැකලා නැහැ. ඔවුන්ට ඒ දෙය කිරීමට අවශ්‍ය නම් ඒ දේ කිරීමේ සම්පූර්ණ අයිතිය තියෙනවා. ඒත් ඒ අයුරින් ක්‍රීඩා කිරීම එක්‌තරා දුරටකට පුදුම සහගතයි. ඒ දෙස ක්‍රිකට්‌ ලෝකය බැලුවේ කලකිරීමකිනුයි" සඳහන් කර සඳහන් කර සිටියේය.

දෙරට අතර සිව්වන තරගය මෙම හෙට (6දා) නොටින්හැම්හිදී පැවැත්වේ.

Read More

රෑට අයෙත් කරුවලේ ඉන්න වෙයිද ඇමතිතුමෝ?

ජල විදුලි බලාගාරවල ජල මට්ටම ශීඝ්‍රයෙන් පහත බැසීම නිසා විදුලිය කැපීමේ අවශ්‍යතාව පවතින බව වාර්තා වේ.

මේ හේතුවෙන් ඉදිරියේ දී විදුලිය දෛනිකව පැය කිහිපයක් විසන්ධි කිරීමේ අවදානමක් පවතින බව පැවසෙයි.

දැනටමත් ඇතැම් ප්‍රදේශවල දිනකට නිශ්චිත කාලයක් විදුලිය විසන්ධි කරන බව ද වාර්තා වේ.

කෙසේවෙතත් මේ වන විට විදුලිය විසන්ධි කිරීමේ අවශ්‍යතාවක් නොමැති බව මේ සම්බන්ධයෙන් අද ‍දෙරණ කළ විමසීමක දී විදුලිබල හා බලශක්ති අමාත්‍යාංශය පැවසීය.

එහෙත් ඉදිරි මාස දෙකක කාලය තුළ බලාගාර ආශ්‍රිත ප්‍රදේශවලට වර්ෂාව නොලැබුණහොත් විදුලිය විසන්ධි කිරීමේ අවශ්‍යතාවක් මතුවනු ඇති බව ද එම අමාත්‍යාංශය පෙන්වා දෙනු ලැබීය.

මෙරට විදුලිබල අවශ්‍යතාවෙන් 48% ක ප්‍රමාණයක් උත්පාදනය කරන්නේ ජල විදුලිය මගිනි.

මේ වන විට ජල විදුලිබලාගාරවලින් විදුලිය උත්පාදනය 28% ක් පමණ වන බවයි විදුලිබල හා බලශක්ති අමාත්‍යාංශය පැවසීය.

විදුලිබලාගාර ආශ්‍රිත ජල මට්ටම පිළිබඳ අධ්‍යයනය කර විදුලි කප්පාදුවක් සිදුකළ යුතු ද යන්න වර්තා කිරීම සඳහා කමිටුවක් පත්කර ඇති බව විදුලිබල මණ්ඩල ආරංචි මාර්ග සඳහන් කරයි.

මේ පිළිබඳ විදුලිබල මණ්ඩලයේ සභාපති මහාචාර්ය විමලධර්ම අබේවික්‍රම මහතාගෙන් අද දෙරණ විමසීමක් කරනු ලැබීය.

මෙම කමිටුව පත් කර ඇත්තේ විදුලිය අරපිරිමැස්මෙන් භාවිත කිරීම පිළිබඳ ජනතාව දැනුවත් කිරීම සඳහා බව ඔහු පැවසුවේය.

විදුලිය කැපීමේ කිසිදු අවදානමක් නොමැති බව විදුලිබල හා බලශක්ති අමාත්‍ය පාඨලී චම්පික රණවක අමාත්‍යවරයාගෙන් ද අද‍දෙරණ කළ විමසීමකදී ඔහු සඳහන් කළේය.

කෙසේවෙතත් විදුලිය අරපිරිමැස්මෙන් භාවිත කරන ලෙස ජනතාවගෙන් ඉල්ලා සිටින බව ද අමාත්‍යවරයා පැවසුවේය.

ජල විදුලිය නිෂ්පාදනය සීමා කිරීමට සිදුවීම හේතුවෙන් ඉන්ධන මගින් විදුලිය උත්පාදනය කිරීම කෙරෙහි අවධානය යොමු කර ඇති බව අමාත්‍යවරයා කියා සිටියේය.

ඉන්ධන මගින් විදුලි උත්පාදනයට අධික පිරිවැයක් දැරීමට සිදුවන බව පාඨලී චම්පික රණවක අමාත්‍යවරයා වැඩිදුරටත් අවධාරණය කළේය.

Read More