Wednesday, December 28, 2011

පඩි ගෙවීම සාර්ථකයි. ලංකාව ලකුණු 177 ක් ඉදිරියෙන් කඩුළු 9ක් ඉතිරිව ද.අප්‍රිකාව එරෙහිව පළමු ටෙස්ට් ජයද?

2011-12-27 ඇමෙරිකා ඩොලරය ගැනුම් මිල රු.112.9700 , විකුණුම් මිල රු.114.8800 | බි‍්‍රතාන්‍යය පවුම ගැනුම් මිල රු.175.7000 , විකුණුම් මිල රු.180.1000 | යුරෝ යුරෝපය ගැනුම් මිල රු.146.6500 , විකුණුම් මිල රු.150.9600 | ස්වීස් ප‍්‍රෑන්ක් ගැනුම් මිල රු.119.7200 , විකුණුම් මිල රු.123.8100 | කැනඩා ඩොලරය ගැනුම් මිල රු.109.9000 , විකුණුම් මිල රු.113.4000 | ඔස්ට්‍රේලියා ඩොලරය ගැනුම් මිල රු.113.6700 , විකුණුම් මිල රු.117.6300 | සිංගප්පූරු ඩොලරය ගැනුම් මිල රු.86.7100 , විකුණුම් මිල රු.89.3500 | ජපානය යෙන් ගැනුම් මිල රු.1.4397 , විකුණුම් මිල රු.1.4863 |

සංචාරක ශ‍්‍රී ලංකා පිල සහ දකුණු අප‍්‍රිකානු පිල 

අතර ඩර්බන් නුවරදී පැවැත්වෙන දෙවැනි 

ටෙස්ට් තරගයේ දෙවැනි දිනය වන ඊයේ (27) ශ්‍රී 

ලංකා පිල සියලූ දෙනා දැවී ලකුණු 338 ක් ලබා 

ගත්තේය. ශ්‍රී ලංකා ඉනිම වෙනුවෙන් තිලාන් 

සමරවීර (102) සහ මංගල ටෙස්ට් තරගයට 

සහභාගි වු දිනේෂ් චන්දිමාල් (58) වැඩි ලකුණු 

ලැබුහ.  දකුණු අපි‍්‍රකාව වෙනුවෙන් විශිෂ්ඨ පන්දු 

යැවීමක නිරත වූ මර්චන් ඩ ලෙන්ගර් ලකුණු 

81 කට කඩුලූ 7 ක් දවා ගත්තා.

තරගයේ පළමු ඉනිම නිමා කරමින් දකුණු අප්‍රිකානු 

කණ්ඩායමට සියලුම ක්‍රීඩකයින් දැවී ලබාගත 

හැකිවූයේ ලකුණු 168 ක් පමණි.  

හසීම් අම්ලා 54 ,චානක වෙලගෙදර ලකුණු 52 ට කඩුලු 5 ක් ,රංගන 

හේරත් ලකුණු 49 ට කඩුලු 4 ක් බිඳහෙළීමට සමත්විය
   
ශ්‍රී ලංකා පිල දෙවැනි ඉනිම සඳහා එක කඩුල්ලක් දැවී ලකුණු 7 ක් ලබා 

ලකුණු 177 ක් ඉදිරියෙන් සිටියේය.

ශ්‍රි ලංකාව පළමු ඉනිම 338 සහ දෙවැනි ඉනිම කිසිවකු නොදැවී 7
දකුණු අප‍්‍රිකාව පළමු ඉනිම 168

මාධ්‍ය හමුවේදි අදහස් දක්වමින් තිලාන් සමරවීර පැවසුවේ කණ්ඩායම දැඩි කැපවීමෙන් පුහුණුවීම් කළ බවය.
නිමා වූ වසර 5ක කාලය තුළ ශ්‍රී ලංකාව මෙතරම් කැපවීමෙන් පුහුණුවනු තමන් කිසිදා නොදුටු බව ද ඔහු ප්‍රකාශ කළේය.
ශ්‍රී ලංකා - දකුණු අප්‍රිකා ටෙස්ට් ක්‍රිකට් ඉතිහාසයේ දකුණු අප්‍රිකානු කණ්ඩායමක් ඉණිමකදී අඩුම ලකුණු සංඛ්‍යාවකට දැවී ගියේ ද ඊයේ දිනයේදීය.දකුණු අප්‍රිකා පළමු ඉණිම ලකුණු 168කට සීමා වු අතර වේග පන්දු යවන ක්‍රීඩක චානක වෙළගෙදර සිය ටෙස්ට් දිවියේ හොදම පන්දු යැවීම ඊයේ වාර්තා කළේය. මේ අතර මාධ්‍ය හමුවේදි අදහස් දක්වමින් හෂීම් අම්ලා ප්‍රකාශ කළේ ශ්‍රී ලංකා පන්දු යැවීම ඉතා ඉහළ මට්ටමක තිබූ බවය. තම කණ්ඩායම ඩර්බන්හි කිංග්ස්මේඩ් ක්‍රීඩාංගණයේ අඛණ්ඩව අසාර්ථක වීමට හේතුව වටහා ගැනීමට නොහැකි බවද ඔහු ප්‍රකාශ කළේය.
එම ක්‍රීඩාංගණයේදි දකුණු අප්‍රිකාව අවසන් වරට සහභාගි වූ තරඟ 3ම පරාජය විය.

Saturday, December 24, 2011

5 ශිෂ්‍යත්වයේ කඩඉම් ලකුණු පිටවේ.

5 වසර ශිෂ්‍යත්ව විභාගයේ පාසල්වලට සිසුන් ඇතුළත් කර ගන්නා කඩඉම් ලකුණු අද (23) අධ්‍යාපන අමාත්‍යාංශය ප‍්‍රකාශයට පත් කළා. ඒ අනුව පිරිමි පාසල් අතරින් කොළඹ රාජකීය විද්‍යාලයේ කඩඉම් ලකුණ 182ක් වන අතර මහනුවර ධර්මරාජ විද්‍යාලය සඳහා ප‍්‍රකාශයට පත් කර ඇති කඩඉම් ලකුණ 180ක්. කොළඹ ආනන්ද විද්‍යාලය සහ කුරුණෑගල මලියදේව විද්‍යාලය 178 මට්ටමේ පවතින අතර මහනුවර කිංස්වුඞ් සහ ගාල්ල රිච්මන්ඞ් විද්‍යාලය ලකුණු 177 මට්ටමේ ද පවතිනවා. බාලිකා පාසල් අතරින් කොළඹ  විශාකා විද්‍යාලයේ කඩඉම් ලකුණ 184ක්. දේවි බාලිකා විද්‍යාලය 180ක් වන අතර මහනුවර මහාමායා විද්‍යාලයේ කඩඉම් ලකුණ 179ක්. කුරුණෑගල මලියදේව බාලිකා විද්‍යාලය ලකුණු 178ක් ලෙස ප‍්‍රකාශයට පත් කර ඇති අතර ගාල්ල සවුත්ලන්ඞ් බාලිකා විද්‍යාලයේ කඩඉම් ලකුණ 174ක්. මධ්‍ය මහා විද්‍යාල අතරින් වැඩිම කඩඉම් ලකුණ වන 170 පන්නිපිටිය ධර්මපාල, හොරණ තක්ෂිලා සහ වයඹ රාජකීය විදුහල වෙනුවෙන් ප‍්‍රකාශයට පත් කර තිබෙනවා.



2013 වසරේදී පාසල් විෂය නිර්දේශ වෙනසක් - ඇමැති බන්දුල ගුණවර්ධන

2013 වසරේ විෂය නිර්දේශයේ සංශෝධනයක් සිදු කරන බව අධ්‍යාපන අමාත්‍ය බන්දුල ගුණවර්ධන මහතා පවසයි. 6 ශ්‍රේණිය ද්වීතීයික අංශය සඳහා පෙළ පොත් සියල්ල මෙම වසරේ ලියා අවසන් කරන බවද අමාත්‍යවරයා අවධාරණය කළේ ය.
විෂයානුබද්ධ, ප්‍රාමාණික දැනුමක් ඇති විද්වතුන් හා ග්‍රන්ථකරණයේ අත්දැකීම් පළපුරුදු දැනුම් ඇති පිරිසක් මේ සඳහා දිවා රෑ නොබලා වෙහෙසෙන බවද කී අමාත්‍යවරයා නව පෙළ පොත් ලියා පළකිරීමේ අභියෝගය ලබන වසරේදී ජය ගන්නා බවද අවධාරණය කළේ ය. ශ්‍රී ලාංකීය දූ දරුවන්ට ප්‍රායෝගිකව අභියෝගයන්ට මුහුණ දිය හැකි වෙනස්කම් හා 2013 වසරේ විෂය නිර්දේශය සංශෝධනය කිරීමට පියවර ගත් බවද අමාත්‍යවරයා වැඩිදුරටත් කීය.

Friday, December 23, 2011

චන්දිමාල්ට ටෙස්ට් වරම් ලැබෙයිද?


ශී‍්‍ර ලංකාව සහ දකුණු අපි‍්‍රකාව අතර ඩර්බන්හි, පැවැත්වෙන ටෙස්ට් තරගය සඳහා දිනේෂ් චන්දිමාල් පිතිකරුවෙකු ලෙස ශී‍්‍ර ලංකා පිලට එක් වෙනු ඇතැයි කී‍්‍රඩා විචාරකයන් පවසනවා. දෙසැම්බර් 26 වැනිදා ආරම්භ වන මෙම තරගයට සහභාගී වීමට හැකි වුවහොත් එය චන්දිමාල්ගේ කුළුදුල් ටෙස්ට් තරගය වනු ඇති. මීට එකලොස් වසරකට පෙර ඩර්බන් පිටියේදී ශි‍්‍ර ලංකා පිල සහභාගී වූ බොක්සිං දින ටෙස්ට් තරගය ජය පැරදුමෙන් තොරව නිමාවට පත්වුණා. ඩර්බන් පිටියේදී ශි‍්‍ර ලංකාව අවසන් වරට කි‍්‍රකට් තරගයකට සහභාගී වූ 2003 ලෝක කුසලාන තරගාවලියේදීයි. දකුණු අපි‍්‍රකාව සමග පැවැති එම තරගයෙන් ශී‍්‍ර ලංකාව ජය හිමි කරගත්තා.  කෙසේ නමුත්, ඩර්බන් පන්දුව ඉපිලෙන වේග පන්දු යවන්නන්ට වාසි දායක තනතිල්ලක් ලෙසයි සැලකෙන්නේ.

Wednesday, December 21, 2011

විද්වත් කමිටුවේ අනුමැතිය ලැබී පැය 24 කින් උසස්පෙළ ප්‍රතිඵල

අධ්‍යයන පොදු සහතික පත්‍ර උසස්පෙළ විභාගයේ "ඉසෙඩ් ස්කෝර්" ගණනය කිරීමේ සමීකරණයේ යෝග්‍යතාව සොයාබැලීම සඳහා විද්වත් කමිටුවක් වෙත අද (21) භාරකරන බව විභාග කොමසාරිස් ජනරාල් අනුර එදිරිසිංහ මහතා පවසයි.

එක් එක් විෂයන් අනුව, විෂය ධාරාවන් අනුව සහ එම අගයන් 02 එක්කර පොදු අගයක් ලෙස "ඉසෙඩ් ස්කෝර්" අගයන් තුනක් ගණනය කර ඇති බවත්, එම අදාළ අගයන් මෙසේ විද්වත් කමිටුව වෙත භාරදෙන බවත් අනුර එදිරිසිංහ මහතා සඳහන් කරයි.

ඒ සඳහා විද්වත් කමිටුවේ අනුමැතිය පිළිබඳව එම කමිටුව මගින් විශ්ව විද්‍යාල ප්‍රතිපාදන කොමිෂන් සභාව වෙත දැනුම් දෙන බවත්, පසුව කොමිෂන් සභාව මගින් ඒ සම්බන්ධව විභාග දෙපාර්තමේන්තුව වෙත දැනුම් දෙන බවත් විභාග කොමසාරිස්වරයා පෙන්වා දුන්නේය.

කොමිෂන් සභාව වෙතින් අදාළ අනුමැතිය ලැබී පැය 24 ට පසු උසස් පෙළ විභාග ප්‍රතිඵල නිකුත් කිරීමට කටයුතු කරන බව ඔහු සඳහන් ‍කළේය.

කොළඹදී ඊයේ (20) පැවති මාධ්‍ය හමුවකට එක්වෙමින් අනුර එදිරිසිංහ මහතා මේ බව කියා සිටියේය.

මෙම සතිය ඇතුළත උසස් පෙළ විභාග ප්‍රතිඵල නිකුත් කිරීමට බොහෝ දුරට හැකිවනු ඇති බව ඔහු එහිදී විශ්වාසය පළ කළේය.

Tuesday, December 20, 2011

ඉදිරියේදී සිසුන්ට උසස්පෙළ දී තෝරා ගැනීමට අලුත් විෂයක්

ඉදිරියේදී සිසුන්ට උසස්පෙළ දී විෂය ක්ෂේත්‍රයක් තෝරා ගැනීම සඳහා අලූත් විෂයක් උසස් පෙළට ඇතුල් කරන බව අධ්‍යාපන අමාත්‍ය බන්දුල ගුණවර්ධන මහතා පවසයි. අමාත්‍යවරයා මේ බව කියාසිටියේ, ඩී.එස්. සේනානායක විද්‍යාලයේ 2011-12-02 පැවති ත්‍යාග ප්‍රදානෝත්සවයට සහභාගී වෙමිනි.

ඒ අනුව පෙර පැවති වාණිජ්‍යය, විද්‍යා, ගණිතය සහ කලා විෂයන්ට අමතරව  'තාක්ෂණය' ලෙස අලූත් විෂය ක්ෂේත්‍රයක් යටතේ සිසුන්ට අධ්‍යයන කටයුතු සිදුකළ හැකිය. උසස් පෙළ අවසන් කළ විට අස්වීමේ සහතිකයක් ලබා දෙනවා වෙනුවට නිපුනතා සහතිකයක් ලබා දීමට සැලසුම් කර ඇති බවත් අමාත්‍යවරයා මෙහිදී කියා සිටියේය.
එමෙන්ම සාමාන්‍ය පෙළ විෂය නිර්දේශයේ ද වෙනසක් සිදුවන අතර මෙම සංශෝධනයත් සමග,  සාමාන්‍ය පෙළ ප්‍රධාන විෂයන්ට අමතර අතිරේක විෂයන් තෝරාගැනීමේදී දරුවන් තමා උසස් පෙළට හැදෑරීමට බලාපොරොත්තු වන විෂය ක්ෂේත්‍රයට අදාළ විෂයක්, සාමාන්‍යපෙළ දී හැදෑරීමට හැකිවන අයුරින් විෂයන් තුනක් සාමාන්‍යපෙළ විෂය නිර්දේශයට අතුළත් වන බව අමාත්‍යවරයා මෙහි දී ප්‍රකාශ කළේය. ඒ තුළින් උසස් පෙළ දී එකවර අදාළ විෂයට මුහුණ දීමට සිදුවීමෙන් සිසුන් පත් වන අපහසුතා මගහැරෙන අතර සිසු මනසට පීඩනයකින් තොරව සහ මූලික දැනුමක් සහිතව සිය උසස් අධ්‍යාපනය හැදෑරීමට හැකිවනු ඇත.

පහ ශ්‍රේණිය ශිෂ්‍යත්ව විභාගය සමත්වන සිසුන්ට සහතික පත්‍රයක් ලබා දීමේ වැඩපිළිවෙළක් ද ඊයේ සිට ප්‍රථම වතාවට ආරම්භ කළ බවත් අමාත්‍යවරයා මේ බව කියා සිටියේය.

Monday, December 19, 2011

උ/පෙළ නිර්දේශ දෙකට සැකසූ ඉසෙඩ් ස්‌කෝර් සූත්‍රය තමාටත් නොතේරෙන බව ඇමැති කියයි

අ.පො.ස. උසස්‌ පෙළ ප්‍රතිඵල නිකුත් කිරීම සඳහා නව නිර්දේශයට හා පැරැණි නිර්දේශයට අදාළව විශ්වවිද්‍යාල මහාචාර්යවරුන් සකස්‌ කළ ඉසෙඩ් ස්‌කෝර් සූත්‍රය තමන්ට ද තේරුම්ගත නොහැකි බව අධ්‍යාපන ඇමැති බන්දුල ගුණවර්ධන මහතා පෙරේදා (17 දා) පාර්ලිමේන්තුවේදී ප්‍රකාශ කළේය. නිර්දේශයන් දෙකක්‌ යටතේ විභාගය පැවැත්වීම නිසා ප්‍රතිඵල සම තත්ත්වයට ගෙන ඉසෙඩ් ස්‌කෝර් ලකුණු සකස්‌ කිරීම සඳහා මෙම සූත්‍රය සාදා ඇතැයි ද ඇමැතිවරයා කීවේය.

ප්‍රතිඵල නිකුත් නොකරන ලෙසට විශ්වවිද්‍යාල ප්‍රතිපාදන කොමිසම මීට සති දෙකකට පෙර විභාග දෙපාර්තමේන්තුවට දැනුම් දුන් බවද... ඉසෙඩ් ස්‌කෝර් සඳහා මැදිහත්වී ගණිතය පිළිබඳ විද්වතුන්ගේ ශාස්‌ත්‍රීය කමිටුවක්‌ ලවා සූත්‍රයක්‌ සෑදීමට කොමිසම තීරණය කළ බවද ඇමැතිවරයා කීවේය.

නිර්දේශ දෙකක්‌ යටතේ එකම විෂයයට ප්‍රශ්න පත්‍ර දෙක බැගින් නිකුත් කර ඇතැයි ද කෙසේ වෙතත් මේ වන විට උත්තරපත්‍ර බලා අවසන් යෑයි ද කී ඇමැතිවරයා අධ්‍යාපන අමාත්‍යාංශයට අදාළ ප්‍රතිඵල මීට මාසයකට කලින් වුවද නිකුත් කිරීමේ හැකියාව තිබූ බව ද කීවේය.

ප්‍රතිඵල නිකුත් කිරීමේදී ඉසෙඩ් ස්‌කෝර් ක්‍රමය ප්‍රශ්නයක්‌ වන බව විශ්වවිද්‍යාල ප්‍රතිපාදන කොමිසමට විභාග දෙපාර්තමේන්තුව විසින් මීට මාස තුනකට පෙර දැනුම් දුන් නමුත් ඔවුන් ඊට මැදිහත් වූයේ සති දෙකකට පෙර බවද ඇමැති බන්දුල ගුණවර්ධන මහතා කීවේය.

නව නිර්දේශය සහ පැරැණි නිර්දේශය යටතේ උසස්‌ පෙළ විභාගයට පෙනී සිටි සිසුන්ගේ ඉසෙඩ් ස්‌කෝර් ලකුණු තීරණය කිරීමට විශ්වවිද්‍යාල මහාචාර්යවරුන්ගේ කමිටුව විසින් පේළි අටක සූත්‍රයක්‌ සෑදූ බව කී ඇමැති බන්දුල ගුණවර්ධන මහතා එකී සූත්‍රය හැන්සාඩ් ගත කළේය.

එම සූත්‍රය තමන්ට ද නොතේරෙන බව කී ඇමැතිවරයා උසස්‌ පෙළ විභාගයට පිළිතුරු ලියූ ලක්‍ෂ තුනක සිසුන්ගේ ලකුණු මෙම සූත්‍රයට ආදේශ කර ඉසෙඩ් ස්‌කෝර් ලකුණු තීරණය කිරීමට සිදුව ඇතැයි ද කීය.

එම කටයුතු අවසන් වූ පසුව ලබන සතිය වෙද්දී ප්‍රතිඵල නිකුත් කළ හැකිවන බව කී බන්දුල ගුණවර්ධන මහතා මෙම ඉසෙඩ් ස්‌කෝර් ලකුණු දශමයකින් හෝ වෙනස්‌ වුවොත්... ඒ මත සිසුවකු දොස්‌තර කෙනෙක්‌ හෝ කොන්දොස්‌තර කෙනෙක්‌ විය හැකි බවද ප්‍රකාශ කළේය.

ඉසෙඩ් ස්‌කෝර් ලකුණු සකස්‌ කිරීම විශ්වවිද්‍යාල ප්‍රතිපාදන කොමිසමේ කාර්යයක්‌ යෑයි ද ඒ බව මාස තුනකට පෙර කොමිසමට දැනුම් දුන් බවද කී ඇමැති බන්දුල ගුණවර්ධන මහතා "අනුන්ගේ දේවලට දැන් අපි නිකං බැණුම් අහනවා..." යෑයි ද කීය.

Saturday, December 17, 2011

උසස්‌ පෙළ ප්‍රතිඵල සඳුදා - ඇමැති එස්‌. බී. ඇමති කිව්වත් සඳුදාට බෑ-විභාග කොමසාරිස්


අධ්‍යයන පොදු සහතික පත්‍ර උසස්‌ පෙළ විභාගයේ ප්‍රතිඵල ලබන සඳුදා (19 දා) නිකුත් කිරීමට පියවර ගන්නේ යෑයි උසස්‌ අධ්‍යාපන ඇමැති එස්‌. බී. දිසානායක මහතා ඊයේ (16 දා) පාර්ලිමේන්තුවේදී ප්‍රකාශ කළේය.

අපොස (උ/පෙ) විභාගයේ නව නිර්දේශය හා පැරැණි නිර්දේශය යන දෙකටම පෙනී සිටි සිසුන්ට පොදු වන ඉසෙඩ් ස්‌කොර් ක්‍රමයක්‌ සැකසීමට ගණිත හා සංඛ්‍යාත විශේෂඥයන්ට භාර කළ බවද ඒ අනුව ඔවුන් එවැනි ක්‍රමයක්‌ සකස්‌ කර ඇතැයිද ඇමැති එස්‌. බී. දිසානායක මහතා කීවේය.

ඒ අනුව ලබන සඳුදා වන විට උසස්‌ පෙළ ප්‍රතිඵල නිකුත් කළ හැකි බවද කී ඇමැතිවරයා අලුත් හා පරණ නිර්දේශවලට ඉසෙඩ් ස්‌කෝර් ලකුණු ක්‍රම දෙකක්‌ ලබා දුන්නොත් සංකීර්ණ ප්‍රශ්න ඇති වන බවද කීය.

නව පොදු ක්‍රමය යටතේ ඉසෙඩ් ලකුණු සකස්‌ කරද්දී ශිෂ්‍යයකුට සියයට දශම ගණනක වාසියක්‌ ද තවත් ශිෂ්‍යයකුට සියයට දශම ගණනක අවාසියක්‌ද සිදුවීමට ඉඩ ඇතැයි කී ඇමැතිවරයා එම තත්ත්වය දශම එකකින් අඩුවන පරිදි සකස්‌ කර ඇතැයිද කීය.

එහෙත්
උසස් අධ්‍යාපන අමාත්‍යවරයා ප්‍රකාශ කළ පරිදි අදාළ විභාගයේ ප්‍රතිඵල නිකුත් කිරීම ලබන සඳුදා දිනයේ ද සිදුකිරීමට නොහැකි වන බව විභාග කොමසාරිස් ජනරාල් අනුර එදිරිසිංහ මහතා පැවසුවේය.


කෙසේ වෙතත් අදාළ ප්‍රතිඵල පාසල් තුන්වන වාරය අවසන් වීමට පෙර නිකුත් කෙරෙන බව මීට පෙර ප්‍රකාශ වී තිබුණි.


ප්‍රතිඵල නිකුත් කිරීමේ දී යොදා ගැනෙන ඉසෙඩ් ලකුණු ක්‍රමය පිළිබඳ ගැටලුවක් හේතුවෙන් එය ප්‍රමාද වන බව ඉන් අනතුරුව වාර්තා විය.


අදාළ ගැටලුව සම්බන්ධයෙන් විශ්ව විද්‍යාල ප්‍රතිපාදන කොමිසම සහ විභාග දෙපාර්තමේන්තුව අතර පසුගියදා සාකච්ඡාවක් ද පැවැත්විණි.

Thursday, December 15, 2011

ලංකාව ප‍්‍රසාද ලකුණු 100 කඩයිමෙන් පහළට වැටෙයි

ලෝකයේ ටෙස්ට් පිතිකරුවන් අතර අග‍්‍රස්ථානය කුමාර් සංගක්කාර විසින් තවමත් හිමිකරගෙන සිටිනු ලැබුවද, වසර පහකට පසුව අන්තර්ජාතික ටෙස්ට් කි‍්‍රකට් ශ්‍රේණිගත ලයිස්තුවේ ප‍්‍රසාද ලකුණු 100 කඩයිමෙන් පහළට ශී‍්‍ර ලංකා පිල ඇද වැටී තිබේ. පසුගියදා පාකිස්තානු පිල හමුවේ ලද තරගාවලි පරාජයත් සමගින් ශී‍්‍ර ලංකා කණ්ඩායම ටෙස්ට් කි‍්‍රකට් ගේ‍්‍රණිගත ලයිස්තුවේ පස්වැනි තැනට ඇද වැටී ඇත්තේ ප‍්‍රසාද ලකුණු 99 ක් පමණක් හිමිකර ගනිමිනි.
ශී‍්‍ර ලංකාව අවසන් වරට ප‍්‍රසාද ලකුණු 100 කඩයිමට පහළින් සිටියේ 2006 ජූනි මාසයේදීය. එවකට මාවන් අතපත්තු තුවාල ලබා සිටි හෙයින් තරුණ කී‍්‍රඩකයන් පිරිසක් සමග ශී‍්‍ර ලංකා පිලේ නායකත්වය බාරගත් මහේල ජයවර්ධන එයින් දෙමසකට පසුව, එංගලන්තයට එරෙහිව එංගලන්තයේදී පැවැති ටෙස්ට් තරගාවලිය 1x1 ක් ලෙස සම කරමින් නැවතත් ප‍්‍රසාද ලකුණු 100 කඩයිම පසුකර ගියේය.
පසුව, වරින් වර ටෙස්ට් ශ්‍රේණිගත ලයිස්තුවේ ඉහළ පහළ ගිය ශී‍්‍ර ලංකා කණ්ඩායම වසර 2009 දී ප‍්‍රසාද ලකුණු 120 ක් ලබාගනිමින් ලෝකයේ ටෙස්ට් කණ්ඩායම් ශ්‍රේණිගත කිරීම අනුව දෙවැනි ස්ථානය අත්කරගත්තේය.
දකුණු අපි‍්‍රකානු පිලට එරෙහිව අද (15 වැනිදා) සෙන්චූරියන්හිදී ආරම්භ වන ටෙස්ට් තරගාවලිය සඳහා ශී‍්‍ර ලංකා පිල පිවිසෙන්නේ දෙපිලම ප‍්‍රසාද ලකුණු සටහනේ ඉහළ යාමට බලාපොරොත්තුව සිටින මොහොතකය. ශී‍්‍ර ලංකාව ප‍්‍රසාද ලකුණු සටහනේ පස්වැනි තැන සිටියදී දක-ුණු අපි‍්‍රකාව ප‍්‍රසාද ලකුණු 116 ක් හිමිකර ගනිමින් සටහනේ තුන්වැනි තැන ගෙන සිටී.
මෙම තරගාවලියේදී අඩුතරමේ 1-0 ක ජයක් ලබාගැනීමට ශී‍්‍ර ලංකා පිල සමත් වුවහොත්  ඕස්ටේ‍්‍රලියාව පහතට ඇද දමා ටෙස්ට් ශ්‍රේණිගත කිරීමේ ලයිස්තුවේ සිවුවැනි ස්ථානය ලබාගැනීමට ශී‍්‍ර ලංකා පිලට හැකියාව ඇත. එහෙත් දකුණු අපි‍්‍රකානුවන්ගේ බලාපොරොත්තුව ටෙස්ට් තරගාවලිය 2x0 කින් ජයගෙන ටෙස්ට් ශ්‍රේණිගත සටහනේ දෙවැනි ස්ථානය ලබාගැනීමයි.
කෙසේ වෙතත් ඉදිරි මාස දෙක ඇතුළත ටෙස්ට් ශ්‍රේණිගත කිරීමේ ලයිස්තුව රඳා පවතින්නේ  ඕස්ටේ‍්‍රලියාව සහ ඉන්දියාව අතර පැවැත්වෙන තරගාවලියේ ප‍්‍රතිඵලය මතය.
ප‍්‍රසාද ලකුණු 880 ක් ලබාගනිමින් කුමාර් සංගක්කාර ටෙස්ට් පිතිකරුවන් අතර මුල් තැන ගෙන සිටියදී අන්තර්ජාතික ශේ්‍්‍රණිගත කිරීම් අනුව ලෝකයේ හොඳම ටෙස්ට් පිතිකරුවන් 20 දෙනා අතර ස්ථානයක් හිමිකර ගැනීමට සමත්ව සිටින එකම ශී‍්‍ර ලාංකිකයා වන්නේ තිලාන් සමරවීර (17) පමණි. ප‍්‍රසාද ලකුණු 859 ක් ලබා සිටින ජැක් කලිස් ප‍්‍රසාද ලකුණු 859 ක් ලබා පිතිකරුවන් අතර දෙවැනි ස්ථානයේ සිටී.
ටෙස්ට් පන්දු යවන්නන් අතරේ පෙරමුණ ගෙන සිටින්නේ ප‍්‍රසාද ලකුණු 898 ක් හිමි දකුණු අපි‍්‍රකානු වේග පන්දු යවන්නා වන ඬේල් ස්ටෙයින්ය. දකුණු අපි‍්‍රකාවේම මෝන් මෝකල් ප‍්‍රසාද ලකුණු 760 ක් ලබා තුන්වැනි ස්ථානයේ සිටින අතර ශී‍්‍ර ලංකාවේ රංගන හේරත් ප‍්‍රසාද ලකුණු 626 ක් ලබාගනිමින් 10 වැනි ස්ථානයේ සිටී.

Sunday, December 11, 2011

ශ්‍රී ලංකා ක්‍රිකට්‌ දෙදරීමේ සුල මුල

පොළොවේ පය ගසා ඇවිදිමින් ජීවිතය ගත කළ සත්වයකු හදිසියේ උරගයකු වීනම් (බඩ ගාන සතකු) ඔහුට ජීවිතය රැක ගැනීමට හැකිද? මෙය අප විසින් නිර්මාණය කළ පැනයකි. එයට හේතුව වත්මන් ශ්‍රී ලංකා ක්‍රිකට්‌ පරිපාලනයට කදිම නිදසුන එය බැවිනි.

ශ්‍රී ලංකා ක්‍රිකට්‌ යනු ක්‍රිකට්‌ ක්‍රීඩාවෙන් පියවරෙන් පියවර උස්‌ මහත් වූ ලොව සුපිරි ක්‍රිකට්‌ රාජ්‍යයක්‌ බවට පත් වූ රටකි. විටෙක ශ්‍රී ලංකාව ක්‍රිකට්‌ වලින් ඉහළම ස්‌ථානයක්‌ කරා පැමිණ සිටියේය. තවත් විටෙක ශ්‍රී ලංකා ක්‍රීඩකයෝ තබන ලෝක වාර්තා හමුවේ ශ්‍රී ලංකා ක්‍රිකට්‌ වලට ලෝක ක්‍රිකට්‌ වෙළෙඳ පොළේ වැඩිම ඉල්ලුමක්‌ ලැබිණි. ඉන් පොහොසත් වූ ශ්‍රී ලංකාව 1996 දී ලෝක ක්‍රිකට්‌ ශූරතාවද 2007 සහ 2011 ලෝක ක්‍රිකට්‌ අනුශූරතාවද දිනා ගනිමින් ලෝක ක්‍රිකට්‌ පිටියේ පෙරැළිකාර කණ්‌ඩායම් බවට පත්විය.

එහෙත් අද ඒ පෙරළිකාර කණ්‌ඩායම දිගින් දිගටම පරාජයන් ලබති. ඒ අතර ක්‍රිකට්‌ පරිපාලනයද නන්නත්තාර තත්ත්වයකට පත්ව ඇත. විටෙක ක්‍රිකට්‌ දේශපාලනීකරණය වීමෙන් සහ දිගින් දිගටම අතුරු කමිටු සංකල්පය ක්‍රියාත්මක වීමෙන් මෙසේ ශ්‍රී ලංකා ක්‍රිකට්‌ නන්නත්තාර වූ බව පැහැදිලිව දිස්‌වේ.

2011 ලෝක කුසලාන ක්‍රිකට්‌ තරගාවලියේ සත්කාරක රාජ්‍යයක්‌ බවට පත්වූ ශ්‍රී ලංකාව අදාළ තරගාවලියෙන් අනතුරුව ගතවූ මාස අටක කාලය තුළ ණය බරින් හෙම්බත් විය. එය ක්‍රීඩකයන්ගේ සිට ශ්‍රී ලංකා ක්‍රිකට්‌ හි සේවය කරන සේවකයන්ට පවා පඩි ගෙවා ගත නොහැකි තත්ත්වයකට පත්විය. එම තත්ත්වය අද මෙරට පමණක්‌ නොව ලෝක ක්‍රිකට්‌ පිටියේ සියලුම දෙනා අතර ප්‍රසිද්ධ රහසක්‌ බවට පත්ව තිබේ.

ශ්‍රී ලංකා ක්‍රිකට්‌ මෙතරම් ණය වීමට හේතුව කුමක්‌ද? දුර්වල පරිපාලනය බව එයට කදිම නිදසුනකි. ලෝක කුසලාන තරගාවලියක්‌ පැවැත්වීමෙන් පසු නන්නත්තාර වූ එකම ක්‍රිකට්‌ පරිපාලනය සහ කණ්‌ඩායම බවට ශ්‍රී ලංකාව මේ අතර ඉතිහාස ගතවේ. 1996 ලෝක ක්‍රිකට්‌ කිරුළ ශ්‍රී ලංකාව ජයගන්නා අවස්‌ථාවේ ශ්‍රී ලංකා ක්‍රිකට්‌ ආයතනය සතු සේවකයන් පිරිස 9 ක්‌ පමණ බවට සඳහන් වේ. එහෙත් 2011 ලෝක ක්‍රිකට්‌ අනුශූරතාව දිනා ගන්නා විට ශ්‍රී ලංකා ක්‍රිකට්‌ සේවකයන් පිරිස 300 ක්‌ පමණ බව වාර්තා වේ. ඒ අනුව 1996 ට වඩා සේවක පිරිස 261 කින් පමණ ඉහළ ගොස්‌ ඇත. අදාළ සේවකයන් නඩත්තු කිරීමට අමතරව ලෝක කුසලාන වෙනුවෙන් අලුතින්ම හම්බන්තොට ක්‍රීඩාංගණයක්‌ ඉදිකිරීමට මෙරට ක්‍රිකට්‌ බලධාරීන් තීරණය කළේය. එහිදී හම්බන්තොට මහින්ද රාජපක්‌ෂ ක්‍රීඩාංගණය ඉදිකිරීම සඳහා රුපියල් කෝටි 428 ක පමණ මුදලක්‌ වියදම් වූ බව ක්‍රීඩා ඇමැති මහින්දානන්ද අළුත්ගමගේ මහතා ඉකුත්දා පාර්ලිමේන්තුවේදී සඳහන් කළේය.

අදාළ මුදල වියදම් වූයේ ලෝක කුසලාන ක්‍රිකට්‌ තරගාවලි පැවැත්වීමටය. එහිදී හම්බන්තොට පැවැත්වූයේ ලෝක කුසලාන තරග තුනක්‌ පමණි. අද හම්බන්තොට දිස්‌ත්‍රික්‌කයේ වාර්තා වන අන්දමට තෙවැනි පෙළ ක්‍රීඩා කරන ක්‍රිකට්‌ ක්‍රීඩා සමාජයක්‌ හෝ නොමැත. එහිදී ජාත්‍යන්තර තරග හෝ පළමු පෙළ තරග පවත්වන්නේ වසරකට 10 කටත් අඩු ප්‍රමාණයකි. මෙවැනි දත්ත අනුව හම්බන්තොට ක්‍රීඩාංගණය සඳහා වැය වූ මුදල ශ්‍රී ලංකා ක්‍රිකට්‌ පසුම්බිය සිඳීයැමේ එක්‌ පැතිකඩක්‌ බවට යමෙකුට තර්ක කළ හැකිය.

2011 ලෝක කුසලාන සංවිධානය සඳහා වැඩ භාර ගත් සුරාඡ් දන්දෙණියගේ කළමනාකාරණයෙන් යුත් සේවකයන් සඳහා මාස හයක සිට ලක්‍ෂ ගණනින් වැටුප් ලැබිණි. ඔවුන් වැඩ කරන විට ශ්‍රී ලංකා ක්‍රිකට්‌ සේවකයන් වැඩ නැතිව පඩි ගත්තේය. ඒ ඔවුන්ගේ රාජකාරිය වෙනත් අයෙකු කරන නිසාවෙනි. ලෝක කුසලාන සංවිධානය කළ මහත්වරු කළ කී දෑ අනුව අදටත් එම තරගාවලියේ විය හියදම් පිළිබඳව වාර්තාව සකස්‌ කිරීමට නොහැකි තත්ත්වයක්‌ උද්ගතවී ඇත. ඒ අනුව ලෝක කුසලාන ක්‍රිකට්‌ ප්‍රවේශපත්‍ර මුදල් තවම නිසි ගිණුම්කරණයකට ලක්‌ව නොමැත. වත්මන් ශ්‍රී ලංකා ක්‍රිකට්‌ කඩා වැටීමේ සාරාංශය එසේ සටහන් වුවද ඉන් ඔබ්බට ගිය කඩා වැටීමක්‌ දැන් ආරම්භ වී ඇත.

ශ්‍රී ලංකා ක්‍රිකට්‌ ක්‍රීඩාව ර¹ පවතින්නේ ක්‍රිකට්‌ ක්‍රීඩකයන් දක්‌වන දක්‍ෂතා අනුව මෙරටට ලැබෙන මුදල් ප්‍රමාණය නිසාවෙනි. එහිදී ශ්‍රී ලංකා ක්‍රීඩකයන්ට කෝටි 35 කට ආසන්න මුදලක්‌ ශ්‍රී ලංකා ක්‍රිකට්‌ ණය වී ඇත. එය ඉකුත් ලෝක කුසලාන තරගාවලියේ සිට මේ දක්‌වා ශ්‍රී ලංකා ක්‍රීඩකයන් වෙනුවෙන් ගෙවිය යුතු මුදල්ය. වර්තමානයේ බටහිර ඉන්දීය කොදෙව් කණ්‌ඩායමේ සිටින සුපිරි ක්‍රීඩකයන් වන ක්‍රිස්‌ ගේල්, රම්නරේෂ් සර්වාන් වැනි ක්‍රීඩකයන් තමන්ට හිටි වැටුප් මදි බැවින් ජාතික කණ්‌ඩායම නියෝජනය කිරීම වර්ජනය කර ඇත. එවැනි තත්ත්වයක්‌ ශ්‍රී ලංකා ක්‍රිකට්‌ වලට මෙතෙක්‌ උදාවී නොතිබීම සතුටට කරුණකි. එහිදී ශ්‍රී ලංකා ක්‍රීඩකයන්ට මුදලින් ප්‍රශ්නයක්‌ නොමැති වුවද ඔවුන් වැටුප් නොතකා ක්‍රීඩා කරන ආකාරය පිළිබඳව රටක්‌ වශයෙන් සියල්ලෝම සන්තෝෂ විය යුතුය. එය ආභරණයකට ලක්‌කර ගනිමින් ඔවුන් තරග පරාජ විය නොහැකි බවද සිහිපත් කළ යුතුය.

මේ අතර ශ්‍රී ලංකා ක්‍රිකට්‌ හි සේවය කරන වත්මන් සේවක සංඛ්‍යාව 263 ක්‌ පමණ බව වාර්තා වේ. ඔවුන්ට මාසිකව රුපියල් දෙකෝටි විසිපන්ලක්‍ෂයක පමණ මුදලක්‌ මාසික වැටුප් ගෙවිය යුතුය. එය මෙම මාසයේ මෙතෙක්‌ ගෙවා ගත නොහැකිව ඇත. ඔවුනට මෙම මස ගෙවීමට ඇති මුදලින් රුපියල් මිලියන 110 කට ආසන්න මුදලක්‌ පළමු පෙළ ක්‍රීඩා සමාජ වෙත ලබාදී එම තරගාවලිය පැවැත්වීමට ක්‍රීඩා ඇමැතිවරයා කටයුතු කර ඇති බව වාර්තා වේ.

ඒ අනුව "දිවයින" නොයෙක්‌වර පෙන්වා දුන් අයුරින් ශ්‍රී ලංකා ක්‍රිකට්‌ සේවකයන් කප්පාදු කිරීම ඇරඹූ ක්‍රීඩා ඇමැතිවරයා ශ්‍රී ලංකා ක්‍රිකට්‌ ආයතනයෙන් නඩත්තු වන හම්බන්තොට, ආර්. ප්‍රේමදාස, පල්ලකැලේ සහ දඹුලු ක්‍රීඩාංගණ නඩත්තු කිරීම ආරක්‍ෂක අංශ වෙත පවරන ලදී. ඉන් මසකට ශ්‍රී ලංකා ක්‍රිකට්‌වලට මිලියන ගණනක්‌ වර්තමානයේ ඉතිරි වන බව තතු දත් උද විය පවසයි. මීට අමතරව ශ්‍රී ලංකා ක්‍රිකට්‌ ආයතනයේ පුහුණුකරුවන් 40 ක්‌ ඇතුළු 100 කට වැඩි පිරිසක්‌ ඉවත් කිරීමට ශ්‍රී ලංකා ක්‍රිකට්‌ ආයතනය කටයුතු කළ බව මාධ්‍ය වාර්තා පෙන්වා දෙයි. ඒ අනුව වර්තමානයේ ශ්‍රී ලංකා සේවකයන් පිරිස 150 දක්‌වා අඩුවිය යුතුව ඇතැයි අපගේ මතයයි. මෙය ශ්‍රී ලංකා ක්‍රිකට්‌ නගා සිටුවීමේ එක්‌ පැතිකඩක්‌ ලෙස හැඳින්විය හැකිය. එහෙත් ඉහළ ශ්‍රේණිවල පුටු රත්කරමින් ලක්‍ෂ ගණන් වැටුප් ලබන සේවකයන් අඩ නින්දේ සිට ලබන වැටුප් පිළිබඳව ක්‍රීඩා ඇමැතිවරයා ඇතුළු බලධාරීන් තවම නිසි ක්‍රියාමාර්ග නොගැනීමද කනගාටුදායක තත්ත්වයකි. ඉවත්කරන ලද සේවකයන් ඇතුළු ගිය මස ශ්‍රී ලංකා ක්‍රිකට්‌ සේවකයන්ට ගෙවිය යුතු වැටුප රුපියල් දෙකෝටි විසි පන්ලක්‍ෂයක්‌ පමණ බව වාර්තා වේ.

ඉන් අඩක්‌ පමණ ඉවත් කිරීමට වත්මන් ශ්‍රී ලංකා ක්‍රිකට්‌ පරිපාලනය සමත්වීම මත එම මුදලද අඩුවිය යුතුය. ඊට පිං පඩි ගන්නා ඉහළ ශ්‍රේණියේ ටයි කෝට්‌ කාරයන්ව එලවා දැමීමට කටයුතු කළහොත් ගෙවිය යුතු මුදල තවත් අඩු වනු ඇත. එවිට ජාත්‍යන්තර ක්‍රිකට්‌ කවුන්සිලයෙන් ශ්‍රී ලංකා ක්‍රිකට්‌ වෙත ලැබිය යුතුව ඇති මුදලින් අදාළ ණය බර 4 න් 3 ක්‌ ගෙවා ගත හැකි වනු ඇත. එය එසේ වුවහොත් ශ්‍රී ලංකා ක්‍රිකට්‌ පෝෂණය කිරීම යළිත් ඇරැඹිය හැකිය. එය කළ හැක්‌කේ අනාගතයේදී නිලවරණයෙන් පත්වන ක්‍රිකට්‌ නිලධාරී මණ්‌ඩලයට පමණි. ඒ වනතුරු ක්‍රිකට්‌ ආයතනයට ඔක්‌සිජන් දීම ක්‍රීඩා ඇමැතිවරයාගේ වගකීමකි. ඉන් අනතුරුව ශ්‍රී ලංකා ක්‍රිකට්‌ ණය කළ බලධාරීන් සෙවීමට ඇමැතිවරයා සහ අලුතින් පත්වන නිලධාරීන් කටයුතු කිරීම එහි අත්‍යවශම රාජකාරිය බවට පත්විය යුතුව ඇත.

අසේල විතාන,
දිවයින ඇසුරෙනි

Thursday, December 8, 2011

උසස්‌ පෙළ ප්‍රතිඵල තවත් ප්‍රමාදයි ?

උසස්‌ පෙළ ප්‍රතිඵල නිකුත් කිරීම සම්බන්ධයෙන් විශ්වවිද්‍යාල ප්‍රතිපාදන කොමිෂන් සභාවේ ඊයේ (07 වැනිදා) පැවැති සාකච්ඡාවේදී අවසන් තීරණයක්‌ ගැනීමට නොහැකි වී තිබේ.

සිසුන්ට අසාධාරණයක්‌ නොවන අයුරින් විශ්වවිද්‍යාල ප්‍රවේශ ක්‍රමවේදය සකස්‌ කිරීම සඳහා පත් කළ කමිටුව විභාග කොමසාරිස්‌ ජනරාල් අනුර එදිරිසිංහ මහතා සමග හෙට (09 වැනිදා) සාකච්ඡා කර අවසන් තීරණයක්‌ ගැනීමට නියමිත බව උසස්‌ අධ්‍යාපන අමාත්‍යාංශයේ ලේකම් ආචාර්ය සුනිල් ජයන්ත නවරත්න මහතා ඊයේ (07 දා ) පැවසීය.

උසස්‌ අධ්‍යාපන ඇමැති එස්‌. බී. දිසානායක මහතාගේ ප්‍රධානත්වයෙන් පැවැති මෙම සාකච්ඡාවට එම අමාත්‍යාංශ ලේකම්වරයා ද විභාග කොමසාරිස්‌ ජනරාල්වරයා සහ විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය ගාමිණී සමරනායක මහතා ඇතුළු පිරිසක්‌ සහභාගි වූහ. ප්‍රතිපාදන කොමිෂන් සභාව විසින් පත් කරන ලද ඉහත කමිටු සාමාජිකයෝ මෙම සාකච්ඡාවට එක්‌ව නොසිටියහ. එම කමිටුව විභාග කොමසාරිස්‌ ජනරාල්වරයා සමග සාකච්ඡා කර තීරණයකට පැමිණිය යුතු බවට ඊයේ (7 දා) තීරණය විය. හෙට එම සාකච්ඡාව පැවැත්වෙන්නේ ඒ අනුවය.

ප්‍රතිඵල නිකුත් කිරීම සම්බන්ධයෙන් ගැටලු සහගත තත්ත්වයක්‌ උද්ගතව ඇත්තේ නව හා පැරැණි වශයෙන් විභාග දෙකකට සිසුන් පෙනී සිටීම නිසාය.

මෙන්න අපේ උන්නාසේලා

නවක වධදීමේ සිද්ධීන්වලට වරදකරුවන් වූ අනුරාධපුර භික්‌ෂු විශ්වවිද්‍යාලයේ ශිෂ්‍ය ස්‌වාමීන් වහන්සේලා එකොළොස්‌ නමක්‌ වහාම ක්‍රියාත්මක වන පරිදි විශ්වවිද්‍යාලයෙන් නෙරපා හැර ඇති අතර තවත් ශිෂ්‍ය භික්‌ෂුන් විසිහය නමකගේ වසර පහක උපරිමයකට යටත්ව ශිෂ්‍යභාවය අහෝසි කර තිබේ.

පසුගිය මාර්තු මාසයේ ශිෂ්‍ය භික්‌ෂුන් වහන්සේලාට නවක වධය දීමේ චෝදනාවට ලක්‌වූ මෙම ශිෂ්‍ය භික්‌ෂුන්වහන්සේලා සම්බන්ධයෙන් විනය කමිටුවක්‌ මගින් විනය පරීක්‌ෂණ පවත්වා කරන ලද නිර්දේශ අනුව උන් වහන්සේලාට දඬුවම් කිරීමට පාලක සභාව පියවර ගත්තේය. එම විශ්වවිද්‍යාලයේ දෙවන සහ තෙවැනි වසරවල අධ්‍යාපනය ලබමින් සිටි මෙම භික්‌ෂුන්වහන්සේලා නවක වධය දීමේ සිද්ධීන්වලට සම්බන්ධ වූ බව විනය කමිටුව හමුවේ තහවුරු වී ඇත.

ශිෂ්‍ය භාවය අහෝසි කිරීමේ දඬුවමට ලක්‌වූ ශිෂ්‍ය භික්‌ෂූන් වහන්සේලා තුන් නමකට වසර පහක තහනමක්‌ද සෙසු භික්‌ෂූන්වහන්සේලාට වසර දෙක හා වසර බැගින්ද තහනම පනවා තිබේ.

විනය කමිටුවේ නිර්දේශ මත හා පාලක සභාවේ අනුමැතිය අනුව මෙම දඬුවම් ක්‍රියාත්මක කළ බව විශ්වවිද්‍යාලයේ මහෝපාධ්‍යාය මහාචාර්ය තුඹුල්ලේ සීලක්‌ඛන්ද නාහිමියෝ ඊයේ (07 දා) සවස පැවැසූහ.

Tuesday, December 6, 2011

කාබයිට් පළතුරු හොදද නරකද?


නිරෝගී ජීවිතයක් ප‍්‍රාර්ථනා කරන්නකු දිනකට පළතුරු ග්රෑම් 300-400 ක් අතර ප‍්‍රමාණයක් ආහාරයට ගත යුතු බව පෝෂණ විද්‍යාඥයින් ගේ මතයයි.
මේ නිසාම පළතුරුවලට සමාජයේ ඇත්තේ නොමද ඉල්ලූමකි. නාගරීකරණයත් වැඩිවන ජනගහනයත් ඒ ඉල්ලූම දෙගුණ තෙගුණ කර තිබේ.
කවර අන්දමකින් හෝ මඩිය තර කර ගන්නා වාණිජ පරමාර්ථ මුදුන්පත් කර ගන්නා ව්‍යාපාරිකයෝ ඒ ඉල්ලූම සපුරන්නට වැරදි මග ගොස් ඉදවාගත් පළතුරු වෙළෙඳ පොළට ගෙන එති.
කාබයිට් වායුව ගසා ඉදවා ගත් පළතුරු මෙන්ම කාබයිට් කුඩු පළතුරු මතට දමා පැහැය වෙනස් කරගත් පළතුරුද දිනපතා වෙළෙඳ පොළට එති.
නිසියාකාරව ස්වභාවිකව ඉදුණු පළතුරක හා කාබයිඞ් ගසා කෘති‍්‍රම ලෙස ඉදවා ගත් පළතුරක වෙනස දැනගත හැක්කේ එය අනුභව කරන මොහොතේදීය. ඒ වන විට පෙරහැර ගොස් හමාරය.
කාබයිඞ් ගැසූ පළතුරු මිනිස් සිරුරට අහිතකර බව පැවසේ. අහිතකර වන්නේ ඇයි? එසේ නම් කාබයිඞ් දමා පළතුරු ඉදවන්නන් අත්අඩංගුවට ගත හැකිද? ඒ කෙසේද? මේ සම්බන්ධව ආහාර විශේෂඥයකුගෙන් හා සෞඛ්‍ය අමාත්‍යංශයේ ආහාර පාලන ඒකකයේ ඉහළ නිලධාරියෙකුගෙන්ද කළ විමසීමකදී ඔවුන් ඉදිරිපත් කළ තොරතුරු ඇසුරෙන් මේ ලිපිය සැකසිණි.
කාබයිඞ් ගසා ඉදවූ පළතුරුවලින් ඉවත් විය යුතු යැයි ආහාර පිළිබඳ විශේෂඥයන් පවසන්නේ ඇයි?
කාබයිඞ් වායුව හෝ කුඩු ජලය සමග යෙදීමෙන් නිකුත් වන්නේ ඇසිටලින් වායුවයි. එහිදී කැල්සියම් හයිඩ්‍රොක්සයිඞ් පළතුරු මත තැන්පත් වේ. ඒවා පළතුරු ලෙලි මත තැන්පත් වෙනවා පමණක් නොව ඒ තුළින් ගෙඩි තුළට කාන්දුවීමට ඉඩකඩ තිබේ.
මෙහිදී අතුරු පළ ලෙස බැරලෝහ බොහොමයක්ද පළතුරු මත තැන්පත් වෙයි. එහිදී ආසනික් වැනි බැරලෝහ තැන්පත් වීම නිසා ඒවා පරිභෝජනය කරන්නන් ගේ ශරීර තුළටද ඇතුළු විය හැකිය.
ආසනික් වැනි බැරලෝහ, රෝග රැසකට මුල්වෙයි. විශේෂයෙන් අක්මාගත රෝග, වකුගඩු රෝග, පෙනහළු රෝග, සමේ රෝග ඒ අතර ප‍්‍රධානය. එහෙත් පළතුරු ගෙඩියකින් දෙකකින් මේ තත්ත්වය ඇති නොවෙයි. එය කලක් ගතවී සිදුවිය හැකිය. ඒ ඒ පුද්ගලයාගෙන් පුද්ගලයාට එකී තත්ත්වය වෙනස්වනු ඇත.
ටිකෙන් ටික මරණය ගෙනන මෙවැනි පළතුරු වෙළෙඳපොළට ගෙන එන්නට වෙළෙඳුන්ට ඇති උවමනාව කුමක්ද? ඊළඟට පැන නගින්නේ එම ප‍්‍රශ්නයයි.
පළතුරු සඳහා වෙළඳපොළේ ඇති විශාල ඉල්ලූම නිසා වෙළෙඳුන් අඹ, ගස්ලබු, කෙසෙල් වැනි පළතුරු මිලදී ගන්නේ ගස් හෝ පලතුරු වතු බදු ගැනීමෙනි. එසේ බදු ගත් පළතුරු වත්තේ ඇති ඉදුණු පැසුනු ඒවා පමණක් නොව මලෙන් එළියට ආ කුඩා ගැට පවා කඩා ගෙන යන්නේ පළතුරු ගසට හෝ වත්තට ඔහු ගෙවූ මුදල උපරිම ලෙස උපයනු සඳහාය.
එසේ ගෙන යන නොපැසුණු පළතුරු ඉදුණු බව පෙන්වා වර්ණ ගැන්වීමට කාබයිඞ් යොදා ගනිති. කාබයිඞ් යෙදීම කෘෂිකර්ම දෙපාර්තමේන්තුවෙන් අනුමත කොට තිබුණේ පළතුරු ගබඩා කළ කාමරයේ මුල්ලක කාබයිඞ් තබා එයින් වායුව නික්මීමට සලසා එමගින් පළතුරු ඉදීමට සැලැස්වීමයි.
අද සිදුකෙරෙන්නේ පළතුරු ගොඩ ගසා ඊට කාබයිඞ් කුඩු ඉස ජලය ඉසීමයි. මෙහිදී එහි ඇති සියලූ ගෙඩි කහපැහැ ගැන්වේ. නමුත් ඒ ලෙල්ල පමණි. මේ පළතුරු පැසී ඉදුනු පළතුරු වලින් වෙන්කොට හඳුනාගැනීමට පාරිභෝගිකයාට නොහැකිවේ.
පළතුරක් ඉදීම ස්වභාවික ක‍්‍රියාවලියකි. එකී භෞත රසායනික ක‍්‍රියාවලිය කාබයිඞ් යෙදීමෙන් සිදුනොවේ. ස්වභාවික ක‍්‍රියාවලියේදී පළතුරේ ඇති අම්ල හා පිෂ්ඨය සීනි බවට පරිවර්තනය වී පළතුර මෘදු වේ. පැණි රසවේ. එහෙත් කාබයිඞ් මගින් නික්මෙන ඇසිටිලින් වායුව මගින් සිදුකරන්නේ වර්ණ ගැන්වීම පමණකි. එවිට පළතුර මෘදු නොවේ.
පළතුරක ඉදීම සඳහා අවශ්‍ය උත්තේජනය ලබාදෙන ඒතිලීන් වායුව යොදා ගැනීම සඳහා රසායනිකයක් මේ වන විට කෘෂිකර්ම දෙපාර්තමේන්තුව මගින් අනුමත කොට ඇත. ඒ එත‍්‍රල් වේ. එත‍්‍රල් රසායනිකය මගින් නිකුත් කරන එතිලීන් වායුව මගින් සිදුකරන්නේ පැසුණු පළතුරක් ඉදීම සඳහා උත්තේජනයක් සැපයීමය.
සම්ප‍්‍රදායිකව කෙසෙල් දුම් ගැස්සවීමෙන් ඉදවීමේ ක‍්‍රමයේදී ද සිදුකරන්නේ බූව සහිත කොළ වර්ග සමග කෙසෙල් කැන් වළ දමා වළ තුළට දුම් ගසා එම දුම වළතුළ ඇති බූව සහිත කොළ වර්ග රත්වෙද්දී නිකුත් වන එතිලීන් වායුව මගින් කෙසෙල් ගෙඩි ඉදීමට උත්තේජනය සැපයීමයි.
කාබයිඞ් වලින් පළතුරු ඉදවීම 1993 අංක 788/7 දරන ආහාර පනතේ රෙගුලාසි අනුව සපුරා තහනම් වේ. එසේ කරන ස්ථාන අල්ලා ගැනීම තරමක් අපහසු වන නමුත් මහජන සෞඛ්‍ය පරීක්ෂකවරුන්ට සෞඛ්‍ය අමාත්‍යංශයට උපදෙස් දී ඇත්තේ පළතුරු ඉදවන ස්ථානවල ඇති ඇටවුම් පරීක්ෂා කරන ලෙසය.
එම ස්ථානවල කාබයිඞ් තිබී අසුවුවහොත් පළතුරු ඉදවීම සඳහා කාබයිඞ් යොදාගත් බවට පූර්ව නිගමනයකට පැමිණ නීතිමය පියවර ගැනීමට මහජන සෞඛ්‍ය පරීක්ෂකවරුන්ට අවස්ථාව තිබේ.
කාබයිඞ් දුම ගසා ඉදවූ පළතුරු පියවි ඇසින් පරික්ෂා කිරීමෙන් සොයාගත නොහැකි නමුත්, කාබයිඞ් කුඩු ඉසින ලද පළතුරු විද්‍යාගාර පරික්ෂාවකදී සොයාගත හැක. කාබයිඞ් කුඩු වලට වතුර වැදුණ විට ඇසිටලින් වායුව නිකුත් වීමත් සමගම කැල්සියම් හයිඩ්‍රොක්සයිඞ් ලෙල්ලේ තැන්පත්වේ. ස්වභාවිකව ඉදුණු පළතුරක ලෙල්ලේ කිසිසේත්ම කැල්සියම් හයිඩ්‍රොක්සයිඞ් තැන්පත් වී තිබිය නොහැක.
කලකට ඉහත කෘෂිකර්ම දෙපාර්තමේන්තුවට පළතුරු ඉදවීමට කාබයිඞ් දුම් ගැසීම අනුමත කර තිබූ බව සැබෑවකි. එහෙත් එය අද වන විට වැරදි භාවිතයට එක්ව තිබේ. එය මහ පරිමාණ ජාවාරමක් බවට පත් කරගෙන පාරිභෝගිකයන් මුලා කිරීම දක්වා යන ගමන හේතුවෙන් පාරිභෝගිකයන් සදාකාලිකව රෝගීන් බවට පත්වන තත්ත්වය වැළැක්වීමට ආහාර පනත අනුව ක‍්‍රියාකිරීමට මහජන සෞඛ්‍ය පරීක්ෂකවරුන්ට පුළුල් බලතල ලබාදී තිබේ.
මෙසේ පළතුරු ඉදවන තැනක් හෝ පුද්ගලයෙක්  පිළිබඳව නොඑසේ නම් එවැනි පළතුරු විකුණන්නට ඇති විටෙක ඒ පිළිබඳව ආසන්නයේම වෙසෙන මහජන සෞඛ්‍ය පරීක්ෂකට දැනුම් දිය හැකි නම් එයද සමාජයට කරන යහපතක් වනු ඇත.
සෞඛ්‍ය අමාත්‍යංශයේ ආහාර පාලන ඒකකයේ සහකාර අධ්‍යක්ෂක එච්. හපුතන්ත‍්‍රි සහ රජයේ හිටපු රස පරීක්ෂක ඊ.ජී. සෝමපාල යන මහත්වරුන් සමග කළ සාකච්ඡාවකිනි.

එක්‌ ගුරුවරයකු පමණක්‌ සිටින පාසල් 92 ක්‌ රට පුරා

එක්‌ ගුරුවරයකු පමණක්‌ සිටින පාසල් 92 ක්‌ රට පුරා ඇතැයි අධ්‍යාපන ඇමැති බන්දුල ගුණවර්ධන මහතා ඊයේ (05 වැනිදා) පාර්ලිsමේන්තුවේදී කීය.

ගුරුවරුන් දෙදෙනකු සිටින පාසල් 168 ක්‌ද ගුරුවරුන් තිදෙනකු සිටින පාසල් 254 ක්‌ද ඇතැයි කී ඇමැතිවරයා ගුරුවරුන් හතර දෙනකු සිටින පාසල් 375 ක්‌ ඇතැයිද කීය.  ගුරුවරුන් දහයට අඩු පාසල් 1936 ක්‌ ඇතැයිද කී ඇමැතිවරයා ළමයින් පනහට අඩු පාසල් 1552 ක්‌ දක්‌වා ඉහළ ගොස්‌ ඇතැයිද කීය.

පළමු ශ්‍රෝණියට එක්‌ දරුවකු හෝ ඉල්ලුම් නොකරන පාසල් 124 ක්‌ වන බවද ළමයින් දහයක්‌වත් ඉල්ලුම් නොකරන පාසල් සංඛ්‍යාව සමස්‌ත පාසල් සංඛ්‍යාවෙන් සියයට 25 ක්‌ බවද අධ්‍යාපන අමාත්‍යාංශය පිළිබඳ වැය ශිර්ෂ විවාදයේදී ඇමැතිවරයා කීය.

Monday, November 21, 2011

උසස්‌ පෙළ විභාගයේ ප්‍රතිඵල නිකුත් කෙරෙන්නේ විෂය ධාරා 5ක්‌ යටතේය

ප්‍රථම වරට මෙවර අධ්‍යයන පොදු සහතික පත්‍ර (උසස්‌ පෙළ) නව නිර්දේශ විභාගයේ ප්‍රතිඵල නිකුත් කෙරෙන්නේ විෂය ධාරා 5ක්‌ යටතේ බැව්  විභාග කොමසාරිස්‌ ජනරාල් අනුර එදිරිසිංහ මහතා පැවසී ය. මෙහි දී අදහස්‌ දැක්‌වූ ඒ මහතා "මෙතෙක්‌ ප්‍රතිඵල නිකුත් කළේ ගණිත විද්‍යා වාණිජ හා කලා යන විෂය ධාරා 4ක්‌ යටතේයි. එහෙත් වසර 2008 දී නව නිර්දේශ සංකලන සඳහා අධ්‍යාපන අමාත්‍යංශ්‍ය නිකුත් කළ චක්‍රලේඛයට අනුව මෙවර නව නිර්දේශ විභාගයේ ප්‍රතිඵල සඳහා පොදු විෂයක්‌ ද ක්‍රියාත්මක වනවා. පසුගිය අගෝස්‌තු මාසයේ පැවැති නව නිර්දේශ විභාගය සඳහා අයදුම්කරුවන් එක්‌ ලක්‌ෂ හතළිස්‌ පන් දහසක්‌ පමණ පෙනී සිටියා. පැරැණි නිර්දේශ විභාගය සඳහා පෙනී සිටියේ අයදුම්කරුවන් එක්‌ ලක්‌ෂ හතළිස්‌ දහසක්‌ පමණයි. නව නිර්දේශ විභාගයට පාසල් අයදුම්කරුවන් වැඩි පිරිසක්‌ පෙනී සිටිය නිසා ප්‍රථමයෙන් නව නිර්දේශ ප්‍රතිඵලත් ඉන් දින කීපයකට පසුව පැරැණි නිර්දේශ ප්‍රතිඵලත් නිකුත් කිරීමට බලාපොරොත්තු වෙනවා." විෂය ධාරා 5ක්‌ යටතේ උසස්‌ පෙළ ප්‍රතිඵල නිකුත් කෙරෙන ප්‍රථම අවස්‌ථාව මෙය බවත් විෂය ධාරා 5ක්‌ යටතේ නිකුත් කරන ප්‍රතිඵල අනුව විශ්වවිද්‍යාලවලට සිසුන් ඇතුළත් කිරීමේ කටයුතු සිදු කෙරෙන බවත් ඒ මහතා පැවසී ය.

Friday, November 18, 2011

මහේලට එක්‌දින ලකුණු 10,000 ට තව ලකුණු 13 යී


ලෝක කුසලාන තරගාවලියෙන් පසු එක්‌දින තරගාවලි ජයක පහස විඳ නොමැති ශ්‍රී ලංකා කණ්‌ඩායම අදාළ පරාජිත ගමනට තිත තැබීමේ ප්‍රධාන අරමුණ ඇතිව අද (18 දා) පාකිස්‌තානය සමගින් පැවැත්වෙන තෙවැනි එක්‌දින තරගයට පිවිසෙන්නේ තරගාවලිය 2/1 ක්‌ ලෙස පෙරමුණ ගැනීමේ ධනාත්මක බලාපොරොත්තු පොදි බැඳගෙනය. ඩුබායි ජාත්‍යන්තර ක්‍රිකට්‌ ක්‍රීඩාංගණයේදී දිවා/රාත්‍රි තරගයක්‌ වශයෙන් පැවැත්වෙන මෙම තරගය ශ්‍රී ලංකා වේලාවෙන් ප.ව. 4.15 සිට සී. එස්‌. එන්. නාළිකාව ඔස්‌සේ විකාශනය කෙරෙනු ඇත.

ඉකුත් සඳුදා පැවැති තරගයේ ජය ශ්‍රී ලංකාව අත්කර ගැනීමට සමත්වීමත් සමග තරග පහකින් සමන්විත එක්‌දින තරගාවලිය 1-1 ක්‌ ලෙස සමකර ගැනීමට ශ්‍රී ලංකාව සමත්වී සිටින බැවින්, අද තරගයද ජය ගනිමින් තරගාවලියේ ඉදිරි තරග සඳහා ඉහළ මානසිකත්වයකින් යුතුව අවතීර්ණ වීම තමන් ඇතුළු කණ්‌ඩායමේ බලාපොරොත්තුව බව ශ්‍රී ලංකා නායක ටී. එම්. ඩිල්ෂාන් සඳහන් කළේය.

එම පරාජිත ගමන අවසන් කිරීම වෙනුවෙන් වන සියලු උපාය මාර්ග සකස්‌ කරමින් ශ්‍රී ලංකා කණ්‌ඩායම ඊයේ (17 දා) ඩුබායි ජාත්‍යන්තර ක්‍රිකට්‌ ක්‍රීඩාංගණයේදී සිය පුහුණුවීම්වලට සහභාගි වූ අතර ඒ අතරතුර පැවැති මාධ්‍ය හමුවේදී ඩිල්ෂාන් ඉහත අදහස්‌ පළ කර සිටියේය. මෙම තරගයට පෙර ශ්‍රී ලංකා කණ්‌ඩායම පෙරේදා (16 දා) සිය පුහුණුවීම්වල නිරත වූ නමුත් පාකිස්‌තාන කණ්‌ඩායම ඊයේ දිනයේදී පමණක්‌ පුහුණුවීම් වල නියෑළුණේය.

මෙම තරගය දෙපිලටම ඉතාම වැදගත් තරගයක්‌. ඒ මොකද කියනවා නම් මේ තරගය දිනන පිලට පුළුවන් සාජාහි පැවැත්වෙන මීළඟ තරගයට හිස කෙළින් තියාගෙන සහභාගි වන්න. සඳුදා පැවැති තරගය ජයගැනීමත් සමග කණ්‌ඩායමේ ආත්මවිශ්වාසය ඉහළ ගොස්‌ තිබෙනවා. එහිදී අපි බලාපොරොත්තු වෙනවා එම ජයග්‍රාහී මානසිකත්වය දිගටම පවත්වා ගනිමින් තරගාවලිය 2/1ක්‌ ලෙස පෙරමුණ ගෙන ඉදිරි තරග සඳහා අවතීර්ණ වන්න. අපි ඒ සඳහා පසුගිය දවස්‌ දෙකේම හොඳින් පුහුණුවීම් කළා. මං හිතන්නේ අපේ සියලුම ක්‍රීඩකයන් මෙම අභියෝගයට සූදානමින් සිටිනවා. යනුවෙන් ඩිල්ෂාන් සඳහන් කළේය.

ශ්‍රී ලංකා කණ්‌ඩායමේ සියලුම සාමාජිකයන් ඊයේ සහ පෙරේදා දිනයන්හි සිය පුහුණුවීම්වල නිරත වුවද ඇඟිල්ලේ ඇතිවී තිබෙන ආබාධිත තත්ත්වයක්‌ මත ශ්‍රී ලංකා නායකයා සිය පිතිකරණ පුහුණුවීම්වලින් වැළකී සිටියේය. සඳුදා පැවැති තරගය අතරතුරදී උමර් අක්‌මාල් විසින් එල්ල කරන ලද පහරක්‌ ඩිල්ෂාන්ගේ මහපට ඇඟිල්ලේ වැදී තිබීම මත සහ එහි ඉදිමුම ඊයේ වන තුරුත් බැස නොයැම ඩිල්ෂාන්ට සිය පුහුණුවීම් අහිමිවීමට හේතු වූවේය. එහෙත් අද තරගයට ඔහුගේ සහභාගිවීම එතරම් අවදානම් තත්ත්වයක නොවන බවද සඳහන් විය.

අද තරගය සඳහා යොදා ගැනෙන්නේද ඉකුත් තරග 2 ට යොදාගත් තණතීරුවම වන බැවින් එය අද තරගයේදී කණ්‌ඩායමට කෙසේ බලපායිද යන්න මාධ්‍ය විසින් ශ්‍රී ලංකා නායකයාගෙන් ප්‍රශ්න කර සිටියේය. එහිදී පිළිතුරු දුන් ශ්‍රී ලංකා නායකයා, එම තණතීරුවේදී පළමු භාගය දඟ පන්දු යවන්නන්ට උචිත අයුරින් හැසිරෙන බවත්, සවස්‌ යාමයේදී ඇතිවන දැඩි පිනි තත්ත්වය මත එය ක්‍රමයෙන් වේග පන්දු යවන්නන්ට උචිත ලෙස හැසිරෙන බවත් සඳහන් කර සිටියේය. එහිදී වැඩිදුරටත් අදහස්‌ දැක්‌වූ ශ්‍රී ලංකා නායකයා, මෙය අලුත් තරගයක්‌ බැවින් එහිදී මුලින් පන්දුවට පහර දීමට සිදුවුවහොත් තරගයේ ජය ගැනීමට හොඳ ආරම්භයක්‌ ලබා ගත යුතුවීම අනිවාර්ය බවද සඳහන් කර සිටියේය.

අද තරගයටද බොහෝ දුරට දෙවැනි තරගයට ක්‍රීඩා කළ කණ්‌ඩායමම ක්‍රීඩා කරනු ඇතැයි අපේක්‍ෂා කෙරේ. එහිදී තණතීරුවේ හැසිරීම අනුව අද තරගයේදී තවත් දඟ පන්දු යවන්නකු ක්‍රීඩා කරවීමට උත්සුක වන්නේද යන්න කරන ලද ප්‍රශ්න කිරීමකදී අදහස්‌ දැක්‌වූ ශ්‍රී ලංකා නායකයා, තමන්ද ඇතුළුව දඟ පන්දු යවන්නන් තිදෙනකු කණ්‌ඩායමේ සිටීම හේතුවෙන් තවත් අතිරේක දඟ පන්දු යවන්නකු කණ්‌ඩායමට එකතු කිරීම ඵලක්‌ නොවන ක්‍රියාවක්‌ බවද සඳහන් කළේය.

zමම හිතන්නේ මාත් ඇතුළුව කණ්‌ඩායමට දඟ පන්දු යවන්නන් තුන් දෙනෙකු සිටින නිසා තවත් දඟ පන්දු යවන්නකු ක්‍රීඩා කරවීමේ අවශ්‍යතාවක්‌ නැහැ. පසුගිය තරගයේදී සික්‌කුගේ ප්‍රසන්න කඩුලු දවා ගැනීමට සමත් නොවුණත් ඔහු ඉතාම හොඳින් පන්දු යෑව්වා. එහිදී පන්දුවාර 10 ඔහු ලකුණු 40 ක්‌ වැනි අඩු සංඛ්‍යාවකට යෑව්වා. ඒත් එක්‌කම මාලිංග ප්‍රමුඛ වේග පන්දු යවන්නන් තිදෙනාම ඔවුන්ගේ සේවය ඉතා හොඳින් කණ්‌ඩායමට ලබා දුන්නා. ඒක නිසා මම හිතන්නේ නැහැ පන්දු යෑවීමේ අංශය වෙනසක්‌ සිදුකළ යුතුයි කියලා. යනුවෙන් ඩිල්ෂාන් පැවැසීය.

දෙවැනි තරගය ජය ගැනීමට ශ්‍රී ලංකා කණ්‌ඩායම සමත් වුවත් එහිදී ශ්‍රී ලංකා කණ්‌ඩායමේ මැද පෙළ පන්දුවාර කිහිපයේදී ලකුණු ලබා ගැනීමේ වේගය ඉතාමත් පහළ මට්‌ටමක පැවැතියේය. එහෙත් තරංග සහ මහේල දෙදෙනා එකතුව සිව්වැනි කඩුල්ල වෙනුවෙන් සාර්ථක සම්බන්ධතාවක්‌ පැවැත්වීම මත එම තත්ත්වයෙන් ගොඩ ඒමට ශ්‍රී ලංකාවට හැකි විය. අද තරගයේදී මහේල ජයවර්ධන ලකුණු 13 ක්‌ ලබා ගැනීමට සමත් වුවහොත් ශ්‍රී ලංකාව වෙනුවෙන් එක්‌දින ලකුණු 10,000 සීමාව පසු කර ගිය දෙවැනි ක්‍රීඩකයා බවට පත්වීමට මහේලට අවස්‌ථාව උදා වනු ඇත. මෙම තරගය මහේලගේ 355 වැනි තරගය වන අතර එයට පෙර හෙතෙම මුළු ලකුණු 9983 ක්‌ රැස්‌ කර ගැනීමට සමත්ව සිටියි.

දෙවැනි තරගයේදී මැද පෙළින් ලකුණු ලබා ගැනීමේ වේගය අඩුවීම සම්බන්ධව අපි සාකච්ඡා කළා. එම තත්ත්වය මග හරවා ගනිමින් කඩුලු අත ඉතිරි කරගෙන ලකුණු 240 ක්‌ පමණ ලබා ගැනීම තමයි අපේ ඉලක්‌කය. මං හිතන්නේ හැමෝම දන්නවා ප්‍රහාරාත්මක වේගය රඳවා තබා ගනිමින් කොහොමද ක්‍රීඩා කළ යුත්තේ කියලා. යනුවෙන් ඩිල්ෂාන් පැවැසීය.

අද තරගය පැවැත්වෙන සිකුරාදා දිනය එක්‌සත් අරාබි එමීර් රාජ්‍යයට නිවාඩු දිනයක්‌ බැවින් මෙහි වෙසෙන බොහෝ ශ්‍රී ලාංකිකයන් තරගය නැරඹීමට පැමිණෙනු ඇතැයි සහ එහිදී ඔවුන් තම කණ්‌ඩායමට විශාල සහයක්‌ ලබා දෙනු ඇතැයි තමන් විශ්වාස කරන බවද ඩිල්ෂාන් සඳහන් කළේය.

Wednesday, November 16, 2011

තැපැල් වර්ජනයෙන් ලියුම් මග රැදෙයි

වැඩබලන තැපැල්පති එම්. කේ. බී. දිසානායක මහතාට ඉල්ලා අස්‌වන ලෙස බලකරමින් තැපැල් වෘත්තීය සමිති එකමුතුව පෙරේදා (14 වැනිදා) ආරම්භ කළ අඛණ්‌ඩ උපවාසය සහ අතිකාල වර්ජනය හේතුවෙන් ඊයේ (15 දා) සවස වන විට ලියුම් ලක්‍ෂ හතකට අධික ප්‍රමාණයක්‌ කොළඹ මධ්‍යම තැපැල් හුවමාරු මධ්‍යස්‌ථානය තුළ සිර වී තිබිණි.

සාමාන්‍ය ලියුම්, ලියාපදිංචි ලිපි සහ පාර්සල් මෙම ලිපි තොගයට ඇතුළත් වේ. තැපැල් දෙපාර්තමේන්තුවේ හදවත බඳු කොළඹ මධ්‍යම තැපැල් හුවමාරු මධ්‍යස්‌ථානයේ කටයුතු ද මේ වන විට මුළුමණින්ම වාගේ අකර්මන්‍ය වී තිබේ. පිට පළාත්වල සිට ගෙනෙන ලද තැපැල් මලු මධ්‍යම තැපැල් හුවමාරු මධ්‍යස්‌ථානය තුළ ගොඩගසා ඇති අතර මෙරට තැපැල් අංශය සම්පූර්ණයෙන්ම පාළුවට ගොස්‌ තිබිණි.
දිවයිනේ විවිධ ප‍්‍රදේශයන්හි තැපැල් කාර්යාල සඳහා දිනපතා යැවෙන මුද්දර තොග බෙදාහැරීම ද අඩපණ වී ඇතැයි දල මෙම ගැටළුව ඉක්මනින් නිරාකරණය නොවුණහොත් ඉදිරි දිනවලදී මුද්දර හිඟයක් ඇතිවීමටත් ඉඩ ඇතැයි වෘත්තීය සමිති එකමුතුවේ සාමාජිකයෙක් පැවැසීය.

මධ්‍යම තැපැල් හුවමාරු මධ්‍යස්‌ථානයේ සේවකයන් ආරම්භ කර ඇති උපවාසයට සහ අතිකාල වර්ජනයට සම්පූර්ණ සහයෝගය ලබා දීමට ප්‍රධාන තැපැල් කාර්යාලවල සහ උප තැපැල් කාර්යාලවල සේවකයන් ද මේ වන විටත් තීරණය කර තිබේ. තැපැල්පතිවරයා ඉල්ලා අස්‌නොවුණහොත් හෙට (17 වැනිදා) වන විට රට පුරා සියලුම තැපැල් කටයුතු අඩාල වනු ඇතැයි විශ්වාස කරයි.

Friday, November 11, 2011

මාවන් හා දිල්ෂාන්ට අභියොගක් අද


ශ්‍රී ලංකාව සහ පාකිස්‌තානය අතර ටෙස්‌ට්‌ ක්‍රිකට්‌ තරගාවලිය පසුගිය සඳුදායින් නිමාවට
පත්වූයේ පාකිස්‌තානය හමුවේ තරගාවලිය 1/0 ක්‌ වශයෙන් ශ්‍රී ලංකාව පරාජයට පත්වෙමිනි. එංගලන්තය සහ ඔස්‌ටේ්‍රලියාව සමගින් පැවැති තරගාවලි දෙකෙහි 'කාබන්' කොපියක්‌' බඳුවූ මෙම තරගාවලියත් පරාජයට ප්‍රධාන මූලාශ්‍රය වූයේ පිතිකරුවන්ගෙන් ලැබිය යුතු සේවය කණ්‌ඩායමට නොලැබී යාමයි. එහිදී එංගලන්තය සමගින් එංගලන්තයේදීද ඔස්‌ටේ්‍රලියාව සමග තම මව්බිමේදීද තරගාවලි පරාජය වූවා සේ සමානව අදාළ පාකිස්‌තානය තරගාවලිය නිමාවීමෙන් පෙනී යන්නේ දිගින් දිගටම වන වැරැදි නිවැරදි කරගැනීමට ක්‍රීඩකයන් නොපෙළඹීමය.

අදාළ තරගාවලිය යටතේ ශ්‍රී ලංකාව ප්‍රථමයෙන්ම තරග වැදුණේ අබුඩාබිහිදිය. එහිදී අනපේක්‍ෂිත අන්දමින් පළමු ඉනිම ලකුණු 197 කට සීමා වූ ශ්‍රී ලංකාවට පාකිස්‌තානුවන් කඩුලූ 6 ක්‌ දැවී ලබා දුන් ලකුණු 511 ක දැවැන්ත අභියෝගය පහසු එකක්‌ නොවීය. තරගයේ තෙවැනි දිනයේදීම නැවතත් ඉනිමක පරාජයෙන් බේරීමේ සටන ඇරඹූ ශ්‍රී ලංකා කණ්‌ඩායමට දිනය අවසානයේදී එක්‌ කඩුල්ලකට ලකුණු 47 ක්‌ ලබා සිටියේය. ඉනිකම පරාජයෙන් ගැලවීම සඳහා තවත් ලකුණු 314 ක්‌ පිටුපසින් සිට ඇරඹූ ශ්‍රී ලංකා ඉනිමට ආරම්භක පිතිකරුවකුගෙන් සිදුවිය යුතු සේවය කුමක්‌ද යන්න තරංග පරණවිතාන නොදන්නවා විය යුතුය. නැතිනම් එතරම් විශාල ලකුණු සංඛ්‍යාවක්‌ හඹා යැමට ඇති ශ්‍රී ලංකා ඉනිමේදී තමා මුහුණ දුන් පළමු පන්දුවෙන්ම ප්‍රතිවාදීන්ට වාසියක්‌ වන අන්දමින් කිසිම විටෙකත් දැවී නොයනු ඇත. තමාට එරෙහිව එන ප්‍රතිවාදියාව අවතක්‌සේරුවෙන් සැලකීම පරණවිතානගේ පුරුද්ද බව ඔහු මීට පෙර පැවැති තරගවලදී හොඳින් ඔප්පු කර තිබේ.

එය මැනවින් පැහැදිළිවනුයේ ඔස්‌ටේ්‍රලියාව සමගින් ඉකුත්දා ගාල්ලේදී අවසන් වුණු තරගය දෙස ගෙන බැලීමේදීය. ජයග්‍රහණය සඳහා ලකුණු 379 ක දැවැන්ත ජයග්‍රාහී ඉලක්‌කයක්‌ හඹා ගිය ශ්‍රී ලංකා කණ්‌ඩායමට තරංගගේ දායකත්වය වූයේ රයන් හැරිස්‌ගේ පළමු කඩුල්ල ලෙස ඉක්‌මනින්ම පිටියෙන් ඉවතට යැමයි. මෙය ආරම්භක පිතිකරුවකුගෙන් කිසි විටෙකත් බලාපොරොත්තු නොවිය යුතු තත්ත්වයකි.

පිට පිටම තරග 11 කදී ජයග්‍රහණයක්‌ නොලබා සිටින ශ්‍රී ලංකා කණ්‌ඩායම, එක්‌සත් අරාබිකරයට පැමිණියේ කෙසේ හෝ තරගයක්‌ ජයග්‍රහණය කිරීමේ අදිටනින් විය. ඒ සඳහා වන ආරම්භය ලබා දීමට පරණවිතාන සහ තිරිමාන්න දෙදෙනා සමත්වූයේද යන්න ඔවුන් දෙදෙනා පන්දුවට පහර දුන් ආකාරය ගෙන බැලීමේදී කිසි ලෙසකින්වත් සිතිය නොහැක.

එහිදී දෙදෙනාම කරන ලද්දේ තරගයට මෙන් පන්දුව නිදැල්ලේ හැරීම විය. තිරිමාන්න යනු ජාත්‍යන්තර පිටියට ආධුනිකයකු වුවත් ටෙස්‌ට්‌ තරග 25 කදී (එම තරගය ඔහුගේ 23 වැනි තරගය විය) ශතක 2 ක්‌ ලබා සිටින පරණවිතාන එහිදී පන්දුවට පහර දුන් ආකාරය පිලිබඳව කිසිසේත් සෑහීමකට පත්විය නොහැක. ටෙස්‌ට්‌ තරගයක්‌ ජය ගැනීමට නම් තරගයේ පළමු දිනයේ දක්‌වනු ලබන දක්‍ෂතා බෙහෙවින් ඉවහල් වේ. තරගයක ලකුණු ලබා ගැනීමේ වේගය පිළිබඳ එතරම් සැලකිල්ලක්‌ නොදක්‌වනු ලැබුවද එය අදහාගත නොහැකි තරමට මන්දගාමීවී ගොඩනැගීම සම්බන්ධව ඇත්තේ කණගාටුදායක තත්ත්වයකි. එහිදී පළමු පන්දුවාර 25 තුළදී ශ්‍රී ලංකා ආරම්භක පිතිකරුවන් සිය ලකුණු පුවරුවට ලබා දීමට සමත්වූයේ ලකුණු 46 ක්‌ පමණි.

ආරම්භක පිතිකරුවකුගේ ප්‍රධාන වගකීම වන්නේ නව පන්දුව හැකිතාක්‌ පරණ කොට එහි ඔපය අඩු කිරීම වේ. එහෙත් පරණවිතාන සහ තිරිමාන්න දෙදෙනා විසින් හැකි සෑම අවස්‌ථාවකදීම පන්දුව නිදැල්ලේ හැරීමට යැමෙන් සිදුවූයේ පන්දුව ඔපය අඩුවනවා නොව ශ්‍රී ලංකා ලකුණු පුවරුවේ ලකුණු ලබා ගැනීමේ වේගය අඩුවීමය. ඉන් සිදුවන්නේ ඔවුන්ගෙන් පසු පිතිකරුවන්ට නව පන්දුවටද මුහුණ දෙමින් අඩාල වූ වේගයද රඳවා ගනිමින් පන්දුවට පහරදීම වේ. එවැනි පීඩනයක්‌ පසුපෙළට පැමිණීමද ඉක්‌මනින් කඩුලු දැවී යැමේ අතුරු ඵලයක්‌ ලෙස හැඳින්විය හැක.

එමෙන්ම මෙම තරගාවලි ත්‍රිත්වයේදීම ශ්‍රී ලංකා කණ්‌ඩායම තරග වැදුණේ පුහුණුකරුවන් තිදෙනකු යටතේදීය. ප්‍රථමයෙන් පැවැති එංගලන්ත තරගාවලිය ස්‌ටුවර්ට්‌ ලෝ යටතේද, ප්‍රභල ඔස්‌ටේ්‍රලියානුවන් සමගින් වන සංචාරය රොමේෂ් රත්නායක යටතේද ශ්‍රී ලංකාව තරග වැදුණි. පාකිස්‌තානය සමග තරගාවලිය ජෙµa මාෂ් යටතේය. පුහුණුකරුවන් තිදෙනකුගේම ගුරුහරුකම් ලැබුවද දිගින් දිගටම එකම වරද සිදුවනුයේ පුහුණුකරුගේ දක්‍ෂතාව මඳ කමද එසේත් නැතහොත් සිය දුර්වලතා හඳුනාගනිමින් ඒවා නිවැරදි කර ගැනීමට ක්‍රීඩකයන්ට ඇති අවශ්‍යතාවද යන්න අතර දැන් පැහැදිළි වෙනස අවබෝධ වේ.

ඉකුත් එංගලන්ත සංචාරයට පෙර ශ්‍රී ලංකා කණ්‌ඩායමට පිතිකරණ පිළිබඳ විශේෂඥ පුහුණුකරුවකු නොවීය. එම තරගාවලියේදී මාවන් අතපත්තු කණ්‌ඩායමට පිවිසෙන්නේ එවකට අතුරු කමිටුව විසින් අලුතින් නිර්මාණය කළ පිතිකරු පුහුණුකරුගේ පුරප්පාඩුවට මාවන් පත්කරමිනි. හැඟෙන පරිද්දට ශ්‍රී ලංකා කණ්‌ඩායමට 'කණකොකා' හඬලන ලද්දේ මාවන් පැමිණි දා සිටදැයි කෙනෙකුට සිතිය හැක. මන්ද යත් ඔහු පැමිණි දා සිට අඛණ්‌ඩව දක්‍ෂතා දක්‌වමින් සිටි ශ්‍රී ලංකා කණ්‌ඩායම සිතා ගත නොහැකි තරමට පිතිකරණයෙන් දුර්වලතාවයට පත්වීම මත විය.

සමස්‌තයක්‌ ගත් විට මෙම තරගාවලිය කුමාර් සංගක්‌කාරගේ තරගාවලියක්‌ යෑයි හැඳින්වුවහොත් එය නිවැරදිය. අබුඩාබියි පැවැති තරගයේදී අසරණ භාවයට පත්ව තිබූ ශ්‍රී ලංකා කණ්‌ඩායමට ජීවයක්‌ ගෙන දුන් සංගක්‌කාර එහිදී ප්‍රසන්න ජයවර්ධනනගේ සහයෝගයද ඇතිව තරගය බේර නොගන්නට නවක ක්‍රීඩකයන් රැසක්‌ පසුවන පාකිස්‌තානය හමුවේ ශ්‍රී ලංකාව පරාජය පත්වන්නට ඉඩ තිබුණේ තරගාවලිය 2/0 ක්‌ ලෙසය. එහිදී සංගක්‌කාර ද්විත්ව ශතකයක්‌ ශතකයක්‌ සහ තවත් අර්ධ ශතක දෙකක්‌ සමගින් මුළු ලකුණු 516 ක්‌ රැස්‌ කරන ලද්දේ ඉනිමක ලකුණු ලැබීමේ සාමාන්‍ය 86 ක්‌ රඳවා ගනිමිනි.

මෙහිදී නායක ඩිල්ෂාන් මෙන්ම කණ්‌ඩායමේ පසුවන පළපුරුදුම ක්‍රීඩකයන් වන මහේල ජයවර්ධනද කණ්‌ඩායමට ලබාදුන් සේවය පිළිබඳව කිසි විටෙකින්වත් සෑහීමකට පත්විය නොහැක. පාකිස්‌තානයට එරෙහිව ක්‍රීඩා කළ ඉනිම 6 දීම මහේල රැස්‌ කරන ලද්aදේ ලකුණු 102 ක්‌ පමණකවීම ඔහුගේ අසාර්ථකත්වය පැහැදිලි කරවන්නක්‌ වී තිබේ.

ලකුනු 92 ක්‌ රැස්‌ කර හැරෙන්නට නායකයකු ලෙස තම සේවය කණ්‌ඩායමට ලබාදීමට ඩිල්ෂාන් අපොහොසත් වී සිටියි. නායකයා ලෙස පත්වීම් ලැබීමෙන් පසු ඩිල්ෂාන් පිට පිටම පරාජයට පත්වූ තෙවැනි තරගාවලිය වශයෙන් මෙම තරගාවලිය සටහන් වේ.

ශ්‍රී ලංකාව දෙසින් කලකට පසු වේග පන්දු යවන්නකුගේ දක්‍ෂතාවක්‌ දැක ගැනීමට හැකිවූ තරගාවලියක්‌ ලෙස මෙම තරගාවලිය හැඳින්විය හැක. පිතිකරුවන්ට පාරාදීසයක්‌ ලෙස යෑයි සැලකෙන සාජා තණතීරුවේදී චානක වෙලගෙදර විසින් ක්‍රියාත්මක කරන ලද පන්දුවාර කිහිපය තුළදී කඩුලු 5 ක්‌ දවා ගැනීම කැපි පෙනුණි. අදාළ දක්‍ෂතාව විශේෂත්වයක්‌ ලෙස සඳහන් කළ හැක්‌කේ අවසන් වරට චමින්ද වාස්‌ 2008 වසරේදී ප්‍රොවිඩන්ස්‌ ක්‍රිඩාංගණයේදී ලබා ගත් කඩුලූ 5 න් පසු කිසිම ශ්‍රී ලංකා වේග පන්දු යවන්නකු සිය මව්බිමෙන් පිටතදී කඩුලු 5 ක්‌ දවා ගෙන නොතිබීමය.

ටෙස්‌ට්‌ තරගාවලියේ කළු පැල්ලම දැන් අතීතයට එක්‌ව ගොසිනි. එහෙත් ඩිල්ෂාන් නායකත්වයට පත්වීමෙන් පසු ශ්‍රී ලංකාව මෙතෙක්‌ ටෙස්‌ට්‌ හෝ එක්‌දින තරගාවලියක්‌ ජයගෙන නොමැත. දැන් ඩිල්ෂාන්ට ඇත්තේ සිය නායකත්වය යටතේ පළමු තරගාවලිය ජය ලබා ගැනීමය. එය අදින් (11 දා) ආරම්භ වන එක්‌දින තරගාවලියේදී හෝ හැකිවනු ඇතැයි අපි බලා සිටිමු.


Wednesday, November 9, 2011

කැම්පස් ලැප්ටොප් වලට රස්සාවක් ලැබෙන තුරු පොලිය ගෙවීම අනිවාර්යයි

මෙවර විශ්වවිද්‍යාලවලට ඇතුළත් වන නවක සිසු සිසුවියන්ට ලබාදෙන ලැප්ටොප් පරිගණක සඳහා රැකියාවක්‌ ලැබෙන තෙක්‌ වන වසර කිහිපයේ පොලියද එකතු කෙරෙන නිසා දෙමව්පියෝ දැඩි දුෂ්කරතාවකට පත්ව සිටිති.

උපාධිය ලබා රැකියාවක්‌ද හිමිවීමෙන් පසුව ගෙවීමේ පදනම මත ලැප්ටොප් ලබාදෙන බව උසස්‌ අධ්‍යාපන අමාත්‍යාංශය ප්‍රකාශ කළද අවම වශයෙන් වසර තුනක පොලිය අමතරව එකතු වන නිසා ලැප්ටොප් පරිගණකයක්‌ සඳහා වෙළෙඳපොළේ පවතින සාමාන්‍ය මිලට වඩා කිහිපගුණයක්‌ අවසානයේ ගෙවීමට සිදුවන බවද ඔවුහු පවසති. දරුවන්ට සහනයක්‌ වශයෙන් අමාත්‍යාංශය මෙම ක්‍රමය ආරම්භ කළද සත්‍ය වශයෙන්ම සිදුවන්නේ අමතර බරක්‌ දෙමව්පියන්ට පැටවීම යෑයිද දෙමව්පියෝ සඳහන් කරති.

මෙම අමතර පොලී ගෙවීම පිළිබඳව නොදැන දැනට ඇතැම් සිසුන් පරිගණක ලබාගෙන ඇති අතර ඇතැම් දෙමව්පියෝ පරිගණක ලබාගැනීම ප්‍රතික්‍ෂේප කර සිටිති.

බැංකු ණය ක්‍රමයක්‌ යටතේ සිසුන්ට පරිගණක ලබාදෙන හෙයින් අදාළ ණය මුදලට පොලියක්‌ ගෙවීම අනිවාර්ය යෑයි මේ පිළිබඳව අප කළ විමසුමකට පිළිතුරු දුන් උසස්‌ අධ්‍යාපන අමාත්‍යාංශ ලේකම් ආචාර්ය සුනිල් ජයන්ත නවරත්න මහතා පැවසීය.

Sunday, November 6, 2011

ඔස්‌ටියෝපොරෝසිස්‌ හා පිටි කිරි

"ඔස්‌ටියෝපොරෝසිස්‌ රෝගී තත්ත්වය නිසා කොඳු ඇට පෙළේ ඇති වන වකගැසීම, කල් පවතින කොන්දේ වේදනාව සහ සෘජුකාය විලාසයේ වෙනස්‌කම් ඇති වන අතර මේ රෝගීන් ගේ ඇවිදීමේ හා සිටගෙන සිටීමේ විලාසයේ ද වෙනස්‌කම් ඇති වනවා. ඒ වගේ ම මෙය වයස්‌ගත කාන්තාවන් හා පිරිමින් අතර බහුල ව පවතින රෝගයක්‌." යනුවෙන් කරාපිටිය වෛද්‍ය පීඨයේ කාය වෛද්‍ය විශේෂඥ මහාචාර්ය සරත් ලේකම්වසම් පැවසී ය. ඔක්‌තෝබර් 20 වැනි දිනට යෙදුණු ලෝක ඔස්‌ටියෝපොරෝසිස්‌ දිනය වෙනුවෙන් සෞඛ්‍ය අධ්‍යාපන කාර්යංශයේ පැවැති මාධ්‍ය හමුවක දී තවදුරටත් අදහස්‌ දැක්‌වූ මහාචාර්ය ලේකම්වසම් "ඔස්‌ටියෝපොරෝසිස්‌ රෝගයෙන් පෙළෙන කෙනකු එයින් වැළකීම සඳහා වෛද්‍යවරයකු ගේ උපදෙස්‌ අනුව ප්‍රතිකාර කරගත යුතුයි. කැල්සියම් වැඩිපුර ගැනීමෙන් ඔස්‌ටියෝපොරෝසිස්‌ රෝගය සුව වේ යෑයි සිතීම නුවණට හුරු නැහැ. ඒ නිසා පිටිකිරි වර්ග මඟින් හෝ ආහාර මඟින් හෝ පෙති වර්ග මඟින් කැල්සියම් ශරීරයට ලබා දීමෙන් ඔස්‌ටියෝපොරෝසිස්‌ සුව වනවා යෑයි කියා දැන්වීම් ප්‍රචාරය කිරීම ජනතාව මුළා කිරීමක්‌. මේ රෝගී තත්ත්වය වයස්‌ගත වීම නිසා ම ඇති වන්නේ නෑ. අස්‌ථි බිඳී යැම මේ රෝගයේ සංකීර්ණ ම අවස්‌ථාවයි. කෙනකු මේ රෝගී තත්ත්වයට ගොදුරු වන්නේ දැයි අස්‌ථි ඝනත්වය මැන ගැනීමෙන් දැනගන්න පුළුවන්. මේ සඳහා අස්‌ථි ඝනත්ව මානය (Bone dencitometer) නම් උපකරණය භාවිත කරනවා. මේ උපකරණය ශ්‍රී ලංකාවේ සීමිත රෝහල් ප්‍රමාණයක තිබෙනවා. මෙවැනි පරීක්‍ෂණයකින් කිසියම් අයකුට ඔස්‌ටියෝපොරෝසිස්‌ රෝගය වැළඳීමේ අවදානමක්‌ ඇති දැයි සොයා ගැනීමෙන් පසු ප්‍රතිකාර ලබා ගැනීමෙන් අස්‌ථි නිරෝගීතාව රැකගන්න පුළුවන්" යනුවෙන් පැවසී ය. මෙහි දී අදහස්‌ දැක්‌වූ ශ්‍රී ලංකා ජාතික රෝහලේ රක්‌තවාතවේද විශේෂඥ වෛද්‍ය ලලිත්

විඡේරත්න, ශරීරයේ අස්‌ථි නිර්මාණය වී තිබෙන අස්‌ථි බදාම දුර්වල වීමෙන් අස්‌ථි ව්‍යqහය වෙනස්‌ වෙනවා. මෙය ඔස්‌ටියෝපොරෝසිස්‌ නම් රෝගය ඇති වීමට හේතුවක්‌. අස්‌ථි බිඳී යැම මෙහි සුලබ ලක්‌ෂණයයි. ගෝලීය වශයෙන් කාන්තාවන් මිලියන 200ක්‌ පමණ මේ රෝගයෙන් පීඩා විඳිනවා. යුරෝපයේ ඇමෙරිකාවේ සහ ජපානයේ පමණක්‌ මිලියන 75ක්‌ පමණ කාන්තාවෝ මේ රෝගයෙන් පීඩා විඳිනවා. සාමාන්‍යයෙන් වසය අවුරුදු 60ත් 70ත් අතර කාන්තාවන් තිදෙනකු ගෙන් එක්‌ අයකු මේ ඔස්‌ටියෝපොරෝසිස්‌ රෝගයෙන් පෙළෙන අතර වයස අවුරුදු 80 ඉක්‌මවූ කාන්තාවන් තිදෙනකු ගෙන් දෙදෙනකු මේ රෝගයෙන් පීඩා විඳින බැව් සමීක්‍ෂණවලින් අනාවරණය වී තිබෙනවා. ලෝකයේ සැම තත්පර 3කට වරක්‌ වැටීමෙන් අස්‌ථි බිඳී යැමක්‌ සිදු වනවා. ශ්‍රී ලංකාවේ වසර 2006 දී උකුළු ඇට බිඳී යැම් 2700ක්‌ පමණ සිදු වුණා. වසර 2040 වන විට මේ සංඛ්‍යාව 7000ක්‌ වේ යෑයි අනුමාන කරනවා. මේ නිසා දැඩි අවදානම් සහිත පුද්ගලයන් තෝරාගෙන ප්‍රතිකාර කිරීමෙන් හා අස්‌ථි නිරෝගීතාවට මුල සිට ම යොමු කිරීමෙන් අස්‌ථි බිඳී යැම් වළක්‌වා ගත හැකියි" යනුවෙන් පැවසී ය.

Friday, November 4, 2011

සංගාගෙන් ලෝක වාර්තාවක්

තිකරුවකු ලෙස දිගින් දිගටම අසාර්ථක වුවද තීරණාත්මක මොහොතේදී යළි ලකුණු අතරට පැමිණීමට නායක ටී. එම්. ඩිල්ෂාන් සමත්වීම සහ දෙවැනි කඩුල්ල වෙනුවෙන් ශතක ලාභී කුමාර් සංගක්‌කාර සමග එක්‌ව ගොඩනංවන ලද ලකුණු 172 ක ලකුණු සබඳතාවත් හේතුවෙන් පාකිස්‌තානයට එරෙහිව ක්‍රියාත්මක වන තෙවැනි ටෙස්‌ට්‌ ක්‍රිකට්‌ තරගයේ පළමු දිනට (03 දා) ක්‍රීඩාව නිමා කරන විට කඩුලු 2 ට ලකුණු 245 ක්‌ ලබා ස්‌ථාවර තත්ත්වයකට ශ්‍රී ලංකාවට පැමිණ සිටියේය.

මෙම තරගාවලිය යටතේ පෙර පැවැති තරග දෙකෙහිදී පළමු ඉනිමේ දැඩි අසාර්ථක භාවයකට පත්වුණු ශ්‍රී ලංකා කණ්‌ඩායමට ශක්‌තියක්‌ වූ කුමාර් සංගක්‌කාර සහ නායක ටී. එම්. ඩිල්ෂාන් දෙදෙනා ශ්‍රී ලංකා ඉනිමට ජීවය දෙමින් දෙවැනි කඩුල්ල වෙනුවෙන් ලකුණු 172 ක්‌ එක්‌ කරමින් ශ්‍රී ලංකා ඉනිම ශක්‌තිමත් කිරීමේ මූලික අඩිතාලම සකස්‌ කළේය.

ඊයේ දිනයේදී සාජා ක්‍රිකට්‌ පිටිය වර්ණවත් කළ සංගක්‌කාර තමා මුහුණ දුන් 232 වැනි පන්දුවේදී මිඩ් විකට්‌ කලාපයට ඉහළින් රෙහ්මාන්ට එරෙහිව හයේ පහරක්‌ එල්ල කරමින් තම 27 වැනි ශතකය සම්පූර්ණ කර ගත්තේය. පාකිස්‌තානයට එරෙහිව 7 වැන්න ලෙසින් වාර්තා වූ මෙම ශතකයත් සමග දිනය අවසන් වන විට පන්දු 263 කට මුහුණදී සිටි සංගක්‌කාර හයේ පහර 2 ක්‌ සහ හතරේ පහර 11 ක්‌ සමග සිය ඉනිම ශක්‌තිමත් කර ගැනීමට සමත් විය.

එමෙන්ම ඊයේ දිනයේදී සංගක්‌කාරගේ ඉනිමට ලකුණු 29 ක්‌ එකතුවනවාත් සමග සිය ටෙස්‌ට්‌ ක්‍රිකට්‌ දිවියේ ලකුණු 9000 සීමාව පසු කර යැමට හෙතෙම සමත්වූවේය. අදාළ ලකුණු සංඛ්‍යාව පසු කර යැමත් සමග ලොව වේගයෙන්ම ලකුණු 9000 සීමාව පසු කළ ක්‍රීඩකයාගේ ලෝක වාර්තාවට සංගක්‌කාර හිමිකම් කීම ඊයේ දිනයේදී සිදුවූ තවත් සුවිශේෂතම සිදුවීමක්‌ විය. තමාගේ 172 වැනි ඉනිම වූ මෙම ඉනිමේදී සංගක්‌කාර විසින් බිඳ හෙළන ලද්දේ ඉන්දීය පිතිකරු රාහුල් ඩ්‍රාවිඩ් විසින් ඉනිම 176 කදී සම්පූර්ණ කරන ලද ලකුණු 9000 ලෝක වාර්තාව විය. ඒ අනුව සංගක්‌කාර ශ්‍රී ලංකාව වෙනුවෙන් ලකුණු 9000 සීමාව පසු කළ දෙවැනි සහ ලොව 10 වැන්නා බවටද පත්විය. සංගක්‌කාර මීට පෙර තම ලකුණු 8000 සීමාවද පසුකර ගියේ එම ලෝක වාර්තාවද තමා සතුකර ගනිමිනි.

ශ්‍රී ලංකා ඉනිමේ පළමු කඩුල්ල ලෙස තරංග පරණවිතාන (04) මුලු ලකුණු සංඛ්‍යාව ලකුණු 05 ක්‌ව සටහන්ව තිබියදී දැවී ගිය නමුත් තේ පානය තෙක්‌ තම කඩුලු ආරක්‍ෂා කර ගත් ඩිල්ෂාන් සහ සංගක්‌කාර යුගල ශ්‍රී ලංකා ලකුණු පුවරුව එක්‌ කඩුල්ලකට ලකුණු 170 දක්‌වා ඉහළ දැමීමට සමත්වූහ.

තේ පානයෙන් පසු යවන ලද තරගයේ 61 වන පන්දුවාරයේදී ශතකයට තවත් ලකුණු 08 ක්‌ ආසන්නව සිටි ඩිල්ෂාන්ව තම පළමු ගොදුරු බවට පත් කර ගැනීම සයිඩ් අඡ්මාල් සමත්වීම මත තම 13 වැනි ටෙස්‌ට්‌ ශතකය වාර්තා කර ගැනීමට ඩිල්ෂාන්ට තිබූ පහසුම අවස්‌ථාව අහිමිව ගියේය.

දිවා භෝජනයට පෙර ගුල් විසින් එවන ලද පන්දුවක්‌ ඩිල්ෂාන්ගේ අත් ආවරණවල වැදී කඩුලු රකින අක්‌මාල්

රැකගත්තද තම මංගල ටෙස්‌ට්‌ තරගයට විනිශ්චය දෙමින් සිටි ශවීර් තරපෝරෙ විසින් එය නිෂ්ප්‍රභා කරන ලදී. එම දුර්වල තීරණය නොවන්නට ලකුණු 92 ක්‌ දක්‌වා දුර ගිය ඩිල්ෂාන්ගේ ඉනිම ලකුණු 33 කදී අවසන් වනු ඇත.

ඩිල්ෂාන් දැවී යැමත් සමග සංගක්‌කාරට එක්‌වූ මහේල ජයවර්ධන දිනය අවසනදී ලකුණු 32 ක්‌ ලබා සිටියේය.

ළහිරු තිරිමාන්න වෙනුවට කෝසල කුලසේකරත් සුරංග ලක්‌මාල් වෙනුවට සුරාඡ් රන්දිව් ශ්‍රී ලංකා කණ්‌ඩායමට කැඳවා තිබිණ. ඒ අනුව මෙම තරගාවලිය යටතේ ටෙස්‌ට්‌ වරම් දිනූ දෙවැනි ක්‍රීඩකයා බවට සහ ශ්‍රී ලංකාව වෙනුවෙන් ටෙස්‌ට්‌ වරම් ලද 121 වැනි ක්‍රීඩකයා බවට කෝසල කුලසේකර පත්විය.

Thursday, November 3, 2011

ශ්‍රී ලංකා කණ්‌ඩායමේ අද වෙනසක් කරයිද?

තමන්ට සුපුරුදු තණතීරුවල ක්‍රීඩා කිරීමේදී කණ්‌ඩායමකට භුක්‌ති විඳිය හැකි වාසියට කිසිදු කණ්‌ඩායමක්‌ හිමිකම් නොකියන ශ්‍රී ලංකා/පාකිස්‌තාන ටෙස්‌ට්‌ තරගාවලියේ පළමු තරග දෙකෙහිදී දුර්වල ක්‍රීඩා විලාශයක්‌ පෙන්නුම් කළ ශ්‍රී ලංකා කණ්‌ඩායමට ගිලිහී ගොස්‌ තිබෙන අභිමානය යළි ළඟා කර ගැනීම සඳහා ලැබෙන අවසන් තරග අවස්‌ථාව අද (03 දා) එක්‌සත් අරාබි එමීර් රාජ්‍යයෙහි පිහිටි සාජා ක්‍රිකට්‌ ක්‍රීඩාංගණයේදී උදා වේ.

දිගින් දිගටම පිතිකරුවන් අසාර්ථක වීම මත මෙම තරගාවලියේදී පසුබෑමකට ලක්‌ව සිටින ශ්‍රී ලංකා පිතිකරුවන්, තමන්ට හිමිවී තිබෙන වගකීම කුමක්‌ද යන්න වටහා ගනිමින් මෙම තරගයට අවතීර්ණ වීමට තමා ඇතුළු කණ්‌ඩායම උපරිම උත්සාහයක නිරත වන බව ශ්‍රී ලංකා නායක ටී. එම්. ඩිල්ෂාන් සඳහන් කරයි.

දෙරට අතර තරග තුනකින් සමන්විත ටෙස්‌ට්‌ ක්‍රිකට්‌ තරගාවලිය 1-0 ක්‌ වශයෙන් පෙරමුණ ගැනීමට පාකිස්‌තානය සමත්ව සිටින බැවින් අද තරගයේ ජය ශ්‍රී ලංකාවට තවත් පැත්තකින් වැදගත් වනුයේ ටෙස්‌ට්‌ ක්‍රිකට්‌ ශ්‍රේණිගත කිරීම්වල පස්‌වැනි ස්‌ථානය තවදුරටත් රැක ගැනීම සඳහා වේ.

ශ්‍රී ලංකා කණ්‌ඩායම පසුගිය තරග දෙකෙහිදීම පිතිකරුවන් 7 දෙනකුගෙන් සහ ප්‍රධාන පන්දු යවන්නන් සිව්දෙනකු සමගින් අවතීර්ණ වූ නමුත් අද තරගයේදී එය බොහෝ විට ප්‍රධාන පිතිකරුවන් 6 දෙනෙකුගෙන් සහ පන්දු යවන්නන් 5 දෙනෙකුගෙන් සමන්විත වීමට ඉඩ තිබෙන බවද ඩිල්ෂාන් සඳහන් කරයි.

මෙහිදී 'දිවයින' හමුවේ වැඩි දුරටත් අදහස්‌ දක්‌වා සිටි ඩිල්ෂාන්, 6 යි 5 සංයුතියෙන් ක්‍රීඩා කළහොත් බොහෝ විට තමන් නැවතත් ආරම්භක පිතිකරුගේ ස්‌ථානයේ ක්‍රීඩා කිරීමට ඉඩ ඇති බවද සඳහන් කර සිටියේය. මෙහිදී ඒ සඳහා කණ්‌ඩායමේ ප්‍රධාන පුහුණුකරු ජෙෆ් මාෂ්ද කැමැත්තෙන් පසුවන බවද සඳහන් කර සිටි හෙතෙම, ඒ සියල්ලම උදෑසන තණතීරුව නිරීක්‍ෂණය කිරීමෙන් පසු තීරණය කිරීමට නියමිත බව පැවසීය.

අපි බලන්නේ කොහොම හරි මේකේ පිතිකරුවන් හය දෙනෙකු සහ ප්‍රධාන පන්දු යවන්නන් පස්‌දෙනෙකු සමගින් අවතීර්ණ වීමට. එසේ වුවහොත් අනිවාර්යයෙන්ම මට ඉනිම ආරම්භ කරන්න සිදුවෙනවා. මම ඉනිම ආරම්භ කිරීම සම්බන්ධව අපේ පුහුණුකරුත් කැමැත්තෙන් ඉන්නේ. හෙට උදෑසන තණතීරුව බලලා ඒ සියල්ල තීරණය වේවි' යනුවෙන් ඩිල්ෂාන් අදහස්‌ දැක්‌වීය.

ඒ අනුව අද තරගයේදී ඩිල්ෂාන් ඉනිම ඇරඹීමේ කටයුත්තේ නිරත වුවහොත් ආධුනික ආරම්භක පිතිකරු ළහිරු තිරිමාන්නට සිය ස්‌ථානය අහිමිව යනු ඇති අතර ඒ සඳහා වන හොඳම ආදේශකයා වන්නේ සංචිතයට ප්‍රථම වරට එක්‌ව සිටින කෝසල කුලසේකර වේ. තුන් ඉරියව් ක්‍රීඩකයකු ලෙස කණ්‌ඩායමට එක්‌ව සිටින කුලසේකර, අද තරගයට ක්‍රීඩා කළහොත් පිතිකරුවකුගේ මෙන්ම පන්දු යවන්නකුගේ වාසියද ශ්‍රී ලංකා කණ්‌ඩායමට ලබාගත හැකි වනු ඇත.

"අද තරගයේ කෝසලට හොඳ අවස්‌ථාවක්‌ තියෙනවා. මොකද මැතිව්ස්‌ පන්දු යවන්නෙත් නැති නිසා මේ තරගයේදී පිතිකරුවකුගේ මෙන්ම පස්‌වැනි පන්දු යවන්නා ලෙස ඔහුගේ සේවය කණ්‌ඩායමට ලබා ගන්න පුලුවන්." යනුවෙන් සඳහන් කරන ශ්‍රී ලංකා නායකයා, පිට දඟ පන්දු යවන සුරාඡ් රන්දිව්වද අද තරගයේදී යොදා ගැනීමේ අදහසක්‌ පවතින බවද සඳහන් කළේය. වේග පන්දු යවන සුරංග ලක්‌මාල්, ආරම්භක තරග දෙකෙහිදී එතරම් දස්‌කම් අතරට පැමිණීමට අපොහොසත්වී සිටීම මත අද තරගයට ක්‍රීඩා කිරීම සඳහා රන්දිව්ට වැඩි ඉඩ කඩක්‌ පවතිනු ඇත.

මෙම තරගාවලිය ආරම්භවීමට පෙර ශ්‍රී ලංකාව වෙනුවෙන් ටෙස්‌ට්‌ ලකුණු 10,000 සීමාව පසුකර යැමට ලකුණු 148 ක්‌ අවශ්‍යව සිටි මහේල ජයවර්ධන, මෙම තරගාවලිය යටතේ ක්‍රීඩා කළ ඉනිම හතරේදීම රැස්‌ කිරීමට සමත්වූයේ ලකුණු 48 ක්‌ පමණි.

අද තරගය පැවැත්වෙන සාජා ක්‍රීඩාංගණය සහ ශ්‍රී ලංකාව අතර ඇත්තේ ඉතා සුන්දර මතක සටහනකි. මෙම ක්‍රීඩා පිටියේදී ප්‍රථමයෙන්ම පවත්වා ඇති ජාත්‍යන්තර තරගය වන්නේ ශ්‍රී ලංකාව සහ පාකිස්‌තානය අතර 1984 වසරේ පැවැති එක්‌දින තරගය වේ. එම තරගයේදී පාකිස්‌තානය හමුවේ කඩුලූ 5 ක ජයක්‌ ශ්‍රී ලංකා කණ්‌ඩායම අත් කර ගන්නා ලද්දේ සාජා ක්‍රිකට්‌ ක්‍රීඩාංගණ ඉතිහාසයේ පළමු ජාත්‍යන්තර ජය ශ්‍රී ලංකාව ඉදිරියෙන් සටහන් වෙමිනි.

ඊයේ දිනය ශ්‍රී ලංකා කණ්‌ඩායමට විවේක දිනයක්‌ වූ නමුත් පාකිස්‌තානු කණ්‌ඩායම සවස්‌ යාමයේදී සිය පුහුණුවීම් වල නිරතවනු දක්‌නට ලැබිණ. එහිදී අද තරගය පිළිබඳව අදහස්‌ දක්‌වා සිටි පාකිස්‌තානු නායක මිස්‌බා උල්හක්‌ සඳහන් කරන්නේ, තම කණ්‌ඩායමේ සියලූම සගයන් තමන්ගේ වගකීම කුමක්‌ද යන්න වටහා ගනිමින් ක්‍රීඩා කිරීම මත තමාට පැවරී ඇති නායකත්වයේ වගකීම ඉතාම පහසු එකක්‌ බවට පත්වී තිබෙන බවයි. "අපේ ක්‍රීඩකයන් හරි අවස්‌ථාවෙදි හරි තීරණ ගත්තා. එහිදී ඔවුන් සෑම විටෙකම ධනාත්මක චින්තනයෙන් යුතුව ක්‍රීඩා කිරීම කණ්‌ඩායමට මහත් පිටිවහලක්‌ වුණා. එය මගේ වගකීමත් ඉතාම පහසු කරවන්නක්‌" යනුවෙන් වැඩිදුරටත් ඔහු පැවසීය.

Tuesday, November 1, 2011

ඇසේ සුද නිසා වන අන්ධ බව ඉවත් කල හැකියි

මෙවර ලෝක දෘෂ්ටි දිනයේ තේමාව "ඇසේ සුද නිසා ඇති වන අන්ධ භාවය වළක්‌වා ගනිමු" යන්නයි. අන්ධභාවය අද ලෝකයට ම ප්‍රධාන ගැටලුවක්‌. සැම තත්පර 12කට වරක්‌ ලෝකයේ කොතැනක හෝ කෙනෙක්‌ අන්ධ භාවයට පත් වෙනවා. අන්ධ භාවයට පත් අවුරුදු 50ට වැඩි අය ගෙන් සියයට 82ක්‌ ඇසේ සුද නිසා අන්ධ වූ අයයි.මේ අනුව ලොව පුරා මිලියන 39ක්‌ පමණ දෙනා විවිධ හේතු නිසා අන්ධ භාවයට පත් වී සිටිනවා. මේ අය ගෙන් සියයට 80කට කවර හෝ ප්‍රතිකාරයක්‌ කළ හැකියි. ලෝකයේ මිලියන 18ක්‌ දෙනා ඇසේ සුද නිසා අන්ධ වූ අයයි." යනුවෙන් සෞඛ්‍ය අමාත්‍යංශයේ අතිරේක ලේකම් වෛද්‍ය පී. ජී. මහීපාල පැවසී ය.
පසුගිය 10 වැනි දින ලෝක දෘෂ්ටි දිනය වෙනුවෙන් සෞඛ්‍ය අධ්‍යාපන කාර්යංශයේ පැවැති මාධ්‍ය හමුවේ දී තවදුරටත් අදහස්‌ දැක්‌වූ වෛද්‍ය මහීපාල, "ලෝක සෞඛ්‍ය සංවිධානය වසර 1999 දී අයි. ඒ. ඒ. පී. කියන සංවිධානය සමග එකතු වෙලා විෂන් 2020 කියන වැඩසටහන ක්‍රියාත්මක කළා. මෙහි අරමුණ වසර 2020 වන විට වළක්‌වාගත හැකි අන්ධභාවය වළක්‌වා ගැනීමයි. කලකට පෙර කළ පුරෝකථනයකට අනුව වර්ෂ 1980 දී ලෝකයේ මිලියන 30ක්‌ අන්ධභාවයට පත් වී තිබෙනවා. වර්ෂ 1990 දී මෙය මිලියන 38ක්‌ වූ අතර වසර 2000 වන විට මිලියන 45 වේ යෑයි සිතුවත් ප්‍රමාණයෙන් අඩු වීමක්‌ පෙන්නුම් කරනවා. හේතුව විෂන් 2020 වැඩසටහන ක්‍රියාත්මක වීමයි. මේ හේතුවෙන් වසර 2010 වන විට ලෝකයේ බිලියන 76ක ජන කොටසක්‌ අන්ධභාවයට පත් වේ යෑයි සිතුවත් එහි අඩු වීමක්‌ පෙන්නුම් කරනවා. ශ්‍රී ලංකාවෙත් ඇසේ සුද නිසා අන්ධභාවයට පත් වන්නන් සිටිනවා.
අන්ධභාවයට බලපාන ප්‍රධාන හේතු අතර, ඇසේ සුද, ග්ලුකෝමාව, ළමා වියේ අන්ධ බව, දෘෂ්ටි අබාධ, දියවැඩියාව, අක්‍ෂි ආබාධ හේතු වෙනවා. ඇසේ සුද රජයේ රෝහලක අක්‍ෂි ඒකකයෙන් සැත්කමකින් ඉවත් කළ හැකියි. ශල්‍යකර්මයකින් සුද ඉවත් කර කෘත්‍රිම කාචයක්‌ තැන්පත් කිරීමෙන් පෙනුම යථා තත්ත්වයට පත් කළ හැකියි. රජයේ රෝහල්වල වසරකට සැත්කම් 75000ක්‌ පමණ සිදු කරනවා. උතුරුමැද පළාතේ පසුගිය මාස කීපය තුළ සැත්කම් 500කට වඩා ප්‍රමාණයක්‌ සිදු කළා. වසර 2010 දී විෂන් 2020 වැඩ සටහනට ශ්‍රී ලංකාව අත්සන් කළා. එතැන් සිට මේ කාලය තුළ විෂන් 2020 වැඩසටහන යටතේ අක්‌ෂි ඒකකවලට අවශ්‍ය ශල්‍ය උපකරණ සැපයීම හා එමගින් ඇසේ සුද ඉවත් කිරීම සඳහා රිඡ්වේ ආර්යා ළමා රෝහලට රුපියල් මිලියනයක්‌ වැය කළා.
රත්නපුර, අම්පාර, දික්‌ඔය මොණරාගල, කල්මුනේ සහ යාපනය යන රෝහල් සඳහා පමණක්‌ රුපියල් ලක්‌ෂ 17ක මුදලක්‌ වැය කළා. නව අක්‍ෂි ඒකක ඉදි කිරීම හා වැඩි දියුණු කිරීම තුළින් ඇසේ සුද ඉවත් කිරීම සඳහා කන්තලේ, බලපිටිය, කෑගල්ල, හොරණ, රිඡ්වේ ආර්යා ළමා රෝහල, යාපනය මන්නාරම, දික්‌ඔය යන රෝහල් සඳහා වැය කළ මුදල රුපියල් මිලියන 137ක්‌. රිඡ්වේ ආර්යා ළමා රෝහලට පමණක්‌ රුපියල් මිලියන 90ක්‌ හා දික්‌ඔය රෝහලට රුපියල් මිලියන 20ක්‌ වැය කළා. යාපනය රෝහලට වැය කළ මුදල රුපියල් මිලියන 6ක්‌. පසුගිය පොසොන් පොහොය දින කිලිනොච්චිය රෝහලේ ඇසේ සුද ඉවත් කිරීමේ ශල්‍යකර්ම 198ක්‌ සිදු කළා. වෙසක්‌ පෙහොය දිනයේ දී වව්නියාව දිස්‌ත්‍රික්‌ රෝහලේ ඇසේ සුද ඉවත් කිරීමේ සැත්කම් 350ක ප්‍රමාණයක්‌ සිදු කළා.
අපේ රටේ අක්‍ෂි ශල්‍ය වෛද්‍යවරුන් දුෂ්කර ප්‍රදේශවලට ගිහින් අක්‍ෂි රෝගීන් හඳුනාගෙන ශල්‍යකර්ම කිරීමේ ක්‍රමවේදයක්‌ දිවයින පුරා ක්‍රියාත්මක වෙනවා. ඒ නිසා අවශ්‍ය ශල්‍යකර්ම කිරීම හා අවශ්‍ය කාච ලබා දීමත් විෂන් 2020 හරහා හැකි වී තිබෙනවා." යනුවෙන් පැවසී ය.

 



 

 

Wednesday, October 26, 2011

පාකිස්තානයට අවුරුදු 5කින් නෑ ලංකාවට තරග 12 කින් ජයක් නෑ අද මොනවා වෙයිද?

ටෙස්‌ට්‌ තරග 12 කට පසුව ජයග්‍රහණයක්‌ බලාපොරොත්තුවෙන් ලතවෙන ශ්‍රී ලංකාව අද (26 දා) පාකිස්‌තානය සමඟ පැවැත්වෙන දෙවැනි ටෙස්‌ට්‌ ක්‍රිකට්‌ තරගයට අබුඩාබි ජාත්‍යන්තර ක්‍රිකට්‌ ක්‍රීඩාංගණයේදී සහභාගි වෙයි. තරගය ශ්‍රී ලංකා වේලාවෙන් අද පෙ.ව. 11.30 ට ආරම්භ වන අතර සී.එස්‌.එන්. නාලිකාව ඔස්‌සේ තරගය සජීවි විකාශය කෙරේ.

ශ්‍රී ලංකාව අවසන් වරට සහභාගි වූ ටෙස්‌ට්‌ තරග 12 තුළදී පරාජයන් තුනක්‌ ලබා ඇති අතර එහිදී එකදු ජයග්‍රහණයක්‌ හෝ ලබාගැනීමට අපොහොසත් වී තිබේ. ශ්‍රී ලංකාව අවසන් වරට ටෙස්‌ට්‌ ජයග්‍රහණයක්‌ වාර්තා කිරීමට සමත් වූයේ ඉකුත් වසරේ ඉන්දියාවට එරෙහිව ගාල්ල ක්‍රීඩාංගණයේදීය. එම තරගය මුත්තයියා මුරලිදරන්ගේ සමුගැනීමේ තරගයද විය.

දෙරට අතර පැවැති පළමු ටෙස්‌ට්‌ තරගය විසඳුමකින් තොරව නිමා වුවද එහිදී කණ්‌ඩායම් දෙකේ සිදුවූ වැරැදි හඳුනාගනිමින් අද පැවැත්වෙන තරගයට අවතීර්ණ වන බව කණ්‌ඩායම් දෙකේම විශ්වාසය වී තිබේ.

"දින පහේ තරග ක්‍රීඩා කරන හැමෝම කණ්‌ඩායම වෙනුවෙන් කුමක්‌ හෝ විශේෂ දෙයක්‌ කළ යුතුයි. විශේෂයෙන් ටෙස්‌ට්‌ තරගයක පළමු ඉනිම ඉතාම විශේෂයි. පළමු ඉනිමේදී අඩු ලකුණු සංඛ්‍යාවකට දැවී ගියොත් තරගය බේරා ගන්න ගොඩක්‌ අමාරුයි. නමුත් අපි පළමු ටෙස්‌ට්‌ තරගයේ පළමු ඉනිම අඩු ලකුණු සංඛ්‍යාවකට දැවී ගිහිල්ලත් තරගය විසඳුමකින් තොරව නිමා කර ගැනීම, අද තරගයේදී කණ්‌ඩායමේ මානසිකත්වය ඉහළ දමන්නක්‌ වී තිබෙනවා. විශේෂයෙන් අපේ නවක පන්දු යවන්නන්ට විශ්වාසයෙන් පන්දු යවන්න නම් පිතිකරුවන් විදිහට ලොකු ලකුණු ගණනක්‌ ලකුණු පුවරුවේ පෙන්වන්න ඕන." යනුවෙන් ඩිල්ෂාන් අද තරගය පිළිබඳව අදහස්‌ දක්‌වයි.

පිතිකරුවකු ලෙස පසුබෑමකට ලක්‌ව සිටින ඩිල්ෂාන් එහිදී අද තරගයේදී තමාගේ දායකත්වය පිළිබඳව අදහස්‌ දක්‌වමින් "මම පෞද්ගලිකව විශ්වාස කරනවා. අද තරගයේදී ලකුණු අතරට පැමිණෙන්න පුළුවන් කියල. මැද පෙළ පිතිකරුවකු විදිහට කණ්‌ඩායමට ලබා දිය යුතු ලකුණු ප්‍රමාණය ලබා ගැනීමට හැකි වෙතැයි මම විශ්වාස කරනවා" යනුවෙන් පැවසීය.

පළමු ටෙස්‌ට්‌ තරගය ජය ගැනීමට බොහෝ අවස්‌ථාවක්‌ තිබුණත් තරග විසඳුමකින් තොරව නිමා වූයේ තම පන්දු යවන්නන් තීරණාත්මක උඩපන්දු හයක්‌ අතහැරීම බව පාකිස්‌තාන් පුහුණුකරු මොෂින් ඛාන් මේ අතර පවසයි.

"පළමු තරගය අපට ජය ගන්න බැරි වුණේ පන්දු රැකීම දුර්වල වූ නිසා. ඒත් පිතිහරඹය සහ පන්දු යෑවීම උසස්‌ මට්‌ටමේ තිබුණා. අපි මේ තරගයට එන්නෙ පන්දු රැකීම පිළිබඳව වැඩි අවධානයක්‌ යොමු කරලා. පළමු තරගයේ ස්‌ලිප් ස්‌ථානයේ තවුෆික්‌ උමාර් අතින් උඩපන්දු කිහිපයක්‌ අතහැරුණා. ඔහුගේ අතේ ඇඟිල්ලක සුළු ආබාධයක්‌ තිබුණ නිසා එහෙම වෙන්න ඇති. ක්‍රිකට්‌ ක්‍රීඩාවේ එවැනි දේවල් වෙනවා. නමුත් ආබාධයක්‌ තියෙන විට පන්දු යවන්නන් මාරු කරමින් ස්‌ථානගත කිරීම අවශ්‍යයි." යනුවෙන් මොෂින් ඛාන් සඳහන් කරයි. පාකිස්‌තාන කණ්‌ඩායම අවසන් වරට 2006 දී අස්‌ගිරිය ක්‍රීඩාංගණයේ පැවැති තරගයේදී ශ්‍රී ලංකාව පරාජය කිරීමෙන් අනතුරුව ගෙවුණු වසර 5 කට අධික කාලයේදී ශ්‍රී ලංකාවට එරෙහිව ටෙස්‌ට්‌ ජයක්‌ ලැබීමට අපොහොසත් වී තිබේ. ශ්‍රී ලංකාව අවසන් වරට 2009 දී එස්‌.එස්‌.සී ක්‍රීඩාංගණයේදී පාකිස්‌තානය ටෙස්‌ට්‌ තරගයකදී පරාජය කිරීමට සමත්ව ඇත.

අද තරගය පැවැත්වෙන අබුඩාබි ක්‍රීඩාංගණයේ තණතීරුව පිතිකරුවන්ට යෝග්‍ය වනු ඇතැයි අපේක්‍ෂා කෙරේ. මෙම ක්‍රීඩාංගණයේ පවත්වා ඇති එකම ටෙස්‌ට්‌ තරගය පාකිස්‌තානය සහ දකුණු අප්‍රිකාව අතර ඉකුත් 2010 වසරේ පවත්වා තිබේ. එම තරගය විසඳුමකින් තොරව නිමා වුවද දෙපිළම කඩුලු 18 ක්‌ දැවී ලකුණු 1386 ක්‌ ලබා තිබීම මත මෙම තණතීරුව පිතිකරුවන්ට යෝග්‍ය තණතීරුවක්‌ ලෙස නිගමනයකට පැමිණිය හැක.

ශ්‍රී ලංකා පිතිකරු මහේල ජයවර්ධන මෙම තරගයේදී ලකුණු 116 ක්‌ ලබාගතහොත් ඔහු ටෙස්‌ට්‌ ලකුණු දස දහස (10000) සම්පූර්ණ කළ පළමු ශ්‍රී ලංකා පිතිකරුවා මෙන්ම එවැනි දස්‌කමක්‌ කළ ලොව 9 වැනි ක්‍රීඩකයා වීමේ භාග්‍ය ලබනු ඇත. ශ්‍රී ලංකාව වෙනුවෙන් මෙතෙක්‌ ටෙස්‌ට්‌ ලකුණු 10,000 ක්‌ වාර්තා කිරීමට කිසිම ක්‍රීඩකයකු සමත්වී නොමැත.

පළමු තරගයට ක්‍රීඩා කළ ශ්‍රී ලංකා කණ්‌ඩායමේ එක්‌ වෙනස්‌කමක්‌ පමණක්‌ අද තරගයේදී අපේක්‍ෂා කළ හැක. එහිදී නුවන් ප්‍රදීප් වෙනුවට දඟ පන්දු යවන ක්‍රීඩක සුරාඡ් රන්දිව් ක්‍රීඩා කිරීමේ වැඩි අවස්‌ථාවක්‌ පවතී. යම් හෙයකින් රන්දිව් ක්‍රීඩා නොකළහොත් ඒ වෙනුවට ධම්මික ප්‍රසාද් හෝ කෝසල කුලසේකර ක්‍රීඩා කිරීමේ අවස්‌ථාවක්‌ ඇති බවද නිල නොලත් ආරංචි මාර්ගවල සඳහන් වේ.

පළමු තරගයට ක්‍රීඩා කළ පාකිස්‌තාන් කණ්‌ඩායම අද තරගයට ක්‍රීඩා කිරීමේ වැඩි අවස්‌ථාවක්‌ පවතී.

අද තරගයට ක්‍රීඩා කිරීමට අපේක්‍ෂිත ශ්‍රී ලංකා කණ්‌ඩායම - තරංග පරණවිතාන, ළහිරු තිරිමාන්න, කුමාර් සංගක්‌කාර, මහේල ජයවර්ධන, තිලකරත්න ඩිල්ෂාන් (නායක), ඇන්ජලෝ මැතිව්ස්‌, ප්‍රසන්න ජයවර්ධන, රංගන හේරත්, සුරංග ලක්‌මාල්, චානක වෙලගෙදර, නුවන් ප්‍රදීප් හෝ සුරාඡ් රන්දීව්.

පාකිස්‌තානු කණ්‌ඩායම - ඉම්රාන් µර්හත්, මොහොමඩ් හෆිස්‌, යුනිස්‌ ඛාන්, මිස්‌බා උල් හක්‌(නායක), අසීස්‌ චීමා, ෂොයෙබ් මලික්‌, අද්නන් අක්‌මාල්, උමාර් ගුල්, වහාබ් රියාස්‌, අබ්දූර් රෙහෙමාන් සහ සයීඩ් අඡ්මාල්.

Tuesday, October 18, 2011

මුරලි නැතුව තවත් ටෙස්ට් තරග පරාජයක්ද? නැතිනම් එය වෙනස්කල හැකිවේද?

තමන්ට සුපුරුදු තණතීරුවල ක්‍රීඩා කිරීමේදී කණ්‌ඩායමකට භූක්‌ති විඳිය හැකි වාසියට කිසිදු කණ්‌ඩායමක්‌ හිමිකම් නොකියන ශ්‍රී ලංකා - පාකිස්‌තාන ක්‍රිකට්‌ තරගාවලියේ සමාරම්භය සනිටුහන් කරනු ලබන පළමු ටෙස්‌ට්‌ තරගය අද (18 දා) අබුඩාබිහි ෂෙයික්‌ සහීඩ් ක්‍රීඩාංගණයේදී ශ්‍රී ලංකා වේලාවෙන් පෙ.ව. 11.30 ට ආරම්භ වේ.

ෂෙයික්‌ සහීඩ් ක්‍රීඩාංගණයේදී මීට පෙර පාකිස්‌තාන කණ්‌ඩායම සහ දකුණු අප්‍රිකාව අතර එක්‌ ටෙස්‌ට්‌ තරගයක්‌ පමණක්‌ පවත්වා ඇති බැවින් එම තරගය මත පදනම්ව තණතීරුව පිළිබඳව ස්‌ථීර නිගමනයකට පැමිණීම එතරම් කාලෝචිත නොවේ. එහෙත් නිරන්තරයෙන්ම වියළි කාලගුණික තත්ත්වයක්‌ මෙන්ම පැවැති එකම සහ පළමු තරගයේදීම දෙපිළම ලකුණු 400 ඉක්‌මවා ලබා ගැනීමට සමත්වූ බැවින් මෙම තණතීරුව පිතිකරුවන්ට යෝග්‍ය බව අනුමාන කෙරේ.

මුත්තයියා මුරලිදරන්ගේ සමුගැනීමේ තරගය වූ ගාල්ලේදී පැවැති තරගය ජය ගැනීමෙන් පසු මෙතෙක්‌ සහභාගි වූ තරග 11 දීම ටෙස්‌ට්‌ තරග ජයග්‍රහණයක්‌ වාර්තා කිරීමට ශ්‍රී ලංකා කණ්‌ඩායම අපොහොසත්ව සිටියි. එමෙන්ම ටී. එම්. ඩිල්ෂාන් නායකත්වයට පත්වීමෙන් පසු නායකත්වය ලබා දුන් තරගාවලි ද්විත්වයේදීම (එංගලන්තය සහ ඔස්‌ටේ්‍රලියාව) පරාජයට පත්ව සිටින ශ්‍රී ලංකා පිල අද ආරම්භ වන තරගාවලියට පිවිසෙන්නේ වසර 2 කට අධික කාලයක්‌ තිස්‌සේ වාර්තා කිරීමට නොහැකිව තිබූ ටෙස්‌ට්‌ තරග ජය ලබා ගැනීමේ බලාපොරොත්තු ඇතිවය.

ප්‍රතිවාදී රටවල් පාකිස්‌තානයේදී තරග වැදීම ප්‍රතික්‍ෂේප කිරීම මත පාකිස්‌තාන පිල ටෙස්‌ට්‌ තරග හිඟයකට මුහුණ දී සිටියත් අවසන් වරට සිම්බාබ්වේ සමග පැවැති ටෙස්‌ට්‌ තරගය ජය ගැනීමට සමත්වීම මත අද ආරම්භ වන තරගාවලියට ඔවුන් පිවිසෙන්නේ ජයග්‍රාහී මානසිකත්වයකිනි.

ටෙස්‌ට්‌ කණ්‌ඩායම් ශ්‍රේණිගත කිරීමේදී ඉහළ ස්‌ථානයකට පැමිණීමට ඇති හැකියාව මත මෙම තරගාවලිය දෙපිළටම බෙහෙවින් වැදගත් වේ.

ශ්‍රේණිගත කිරීම්හි පස්‌වැනි ස්‌ථානයේ සිට මෙම තරගාවලියට අවතීර්ණ වන ශ්‍රී ලංකා කණ්‌ඩායම(ප්‍රසාද ලකුණු 103), තරගාවලියේ ජය අත්කර ගැනීමට සමත් වුවහොත් ශ්‍රේණිගත කිරීම්හි සිව්වැනි ස්‌ථානය දක්‌වා ඉදිරියට පැමිණීමට අවස්‌ථාව උදාවනු ඇත. ප්‍රසාද ලකුණු 94 ක්‌ ලබා එහි හයවැනි ස්‌ථානයේ පසුවන පාකිස්‌තානු පිල මෙම තරගාවලිය ජය ගැනීමට සමත් වුවහොත් ශ්‍රී ලංකාව අභිබවා පස්‌වැනි ස්‌ථානය දක්‌වා ඉදිරියට පැමිණෙනු ඇත.ටෙස්‌ට්‌ පිතිකරුවන් ශ්‍රේණිගත කිරීමේ පළමු ස්‌ථානයට පැමිණීමට සමත් වූ හිටපු නායක කුමාර් සංගක්‌කාර, අවසන් තරගාවලි කිහිපයේදී කැපී පෙනෙන තරමේ දක්‍ෂතා දැක්‌වීමට අපොහොසත් වීම හේතුවෙන් මේ වන විට එම පස්‌වැනි ස්‌ථානය දක්‌වා පහත බැස තිබේ. මෙම තරගාවලියේදී හෙතෙම පිත්තෙන් දස්‌කම් දැක්‌වීමට සමත් වුවහොත් එහිදී අංක 02 ස්‌ථානය දක්‌වා පැමිණිමට අවස්‌ථාව උදා වී තිබේ.

මෑත කාලයේදී කණ්‌ඩායමෙන් ඉවත් කර සිටි ෂොයෙබ් මලික්‌ නැවතත් කණ්‌ඩායමට එකතු වීම මත පාකිස්‌තානු කණ්‌ඩායමේ ශක්‌තිය තවත් වර්ධනය වී ඇති බැවින් එහිදී තරගය ජය ගැනීමට නම් ශ්‍රී ලංකාව මුහුණ දෙනු ලබන ප්‍රධාන අභියෝගය වන්නේ එතරම් අත්දැකීම් අඩු පන්දු යවන්නන්ගෙන්, පාකිස්‌තානු කණ්‌ඩායමේ කඩුලු 20 දවා ගැනීම වේ.

එහිදී ශ්‍රී ලංකා කණ්‌ඩායම සතු ප්‍රබලම පන්දු යවන්නා රංගන හේරත් වන අතර ඔහු හැර සෙසු පන්දු යවන්නෝ පසුගිය තරගවලදී එතරම් සාර්ථකත්වයක්‌ පෙන්නුම් කිරීමට අපොහොසත් වූහ.

ඔස්‌ටේ්‍රලියාව සමඟ පැවැති තරගාවලියේදී ටෙස්‌ට්‌ වරම් ලද ශමින්ද එරංගද ආබාධයකට ලක්‌වී කණ්‌ඩායමෙන් ඉවත් වීම මත අද තරගයේදී ඔහුගේ ස්‌ථානය බොහෝ දුරට නුවන් ප්‍රදීප්ට හිමිවීමට ඉඩ තිබේ. ලසිත් මාලිංගගේ පන්දු යෑවීමේ ඉරියව්වට සමාන ඉරියව්වක්‌ සතු නුවන් ප්‍රදීප් අද දිනයේදී ටෙස්‌ට්‌ වරම් දිනාගත හොත් ඔහු ශ්‍රී ලංකාව වෙනුවෙන් ටෙස්‌ට්‌ වරම් දිනූ 119 වැනි ක්‍රීඩකයා බවට පත්වනු ඇත.

මෙම තරගාවලිය මහේල ජයවර්ධනටද ඉතා සුවිශේෂී තරගාවලියක්‌ වන්නේ ශ්‍රී ලංකාව වෙනුවෙන් ටෙස්‌ට්‌ ලකුණු 10,000 සීමාව පසු කළ පළමු පිතිකරුවා වීඹට ආසන්නව සිටින හේතුවෙනි. මේ වන විටත් ටෙස්‌ට්‌ තරග 122 ක්‌ නියෝජනය කර ඇති ජයවර්ධන මුලු ලකුණු 9852 ක්‌ රැස්‌ කරගෙන සිටින අතර ඔහුට ලකුණු 10,000 සීමාව පසු කර යැමට තවත් ලකුණු 148ක්‌ අවශ්‍යව ඇත.

Wednesday, October 5, 2011

ගුරුවරුන්ගේ වැටුප් තවත් පහලටද?

අධ්‍යාපන අමාත්‍යංශය මේ වනවිට සකස්‌ කර ඇති නව ගුරු සේවා ව්‍යවස්‌ථාවට අනුව අධ්‍යාපන විද්‍යා පීඨවලින් පුහුණුව ලබන ගුරුවරුන් ගුරු සේවා ව්‍යවස්‌ථාවට ඇතුළත් වීම සඳහා උපාධියක්‌ ලබා ගැනීම අවශ්‍ය වේ.

මෙතෙක්‌ ශේ්‍රණි පහක්‌ යටතේ පැවැති ගුරු සේවාව
ශේ්‍රණි හතරක්‌ දක්‌වා අඩු කර ඇති අතර අධි ශේ්‍රණියක්‌ද ඒ යටතේ වෙයි. අධි ශේ්‍රණියට ඇතුළත් විය හැක්‌කේ ගුරු උපදේශකවරුන්ට හා අංශ ප්‍රධාන ධුර දරන ගුරුවරුන්ට පමණි. මෙම ශ්‍රේණි හතරට අමතරව අන්තර්කාලීන ශ්‍රේණි වශයෙන් 3-i සහ 3-ii හඳුන්වා ඇති අතර විද්‍යා පීඨ පුහුණුව අවසන් කරන්නන් අයත් වන්නේ එම අන්තර්කාලීන ශේ්‍රණිවලටය. අන්තර්කාලීන ශේ්‍රණිවල සිටිමින් උපාධිය සම්පූර්ණ කිරීමෙන් පසුව ගුරු සේවයට ඇතුළත් විය හැකිය.

මීට වසර තුනකට පෙර අධ්‍යාපන අමාත්‍යාංශය විසින්ම අනුමත කරනු ලැබූ වැටුප් පරිමාණයන්ට වඩා අඩු වැටුප් තල නව ව්‍යවස්‌ථාවට ඇතුළත් කර ඇත. අමාත්‍යංශය අනුමත කළ වැටුප් පරිමාණයන්ට අනුව පළමු පන්තියේ ගුරුවරයකුගේ වැටුප රුපියල් 25,515 ක්‌ වුවත් නව ව්‍යවස්‌ථාවට ඇතුළත් කර ඇත්තේ රුපියල් 21,750 කි. දෙවැනි පන්තියේ පළමු ශේ්‍රණියේ ගුරුවරයකුට නව සේවා ව්‍යවස්‌ථාවෙන් යෝජනා කර ඇත්තේ රුපියල් 18,950 කි. අමාත්‍යංශය අනුමත කර තිබූ වැටුප් පරිමාණය රුපිsයල් 22935 කි.

මෙම කරුණු අනාවරණය වූයේ අධ්‍යාපන වෘත්තිකයන්ගේ සංගමය නාරාහේන්පිට අභයාරාමයේ ඊයේ (04 වැනිදා) පැවැත්වූ මාධ්‍ය හමුවේදීය.

ගුරු වෘත්තීය සංගම් සමඟ සාකච්ඡාවකින් තොරව සකස්‌ කර ඇති මෙම සේවා ව්‍යවස්‌ථාවට විරෝධය පළකරන බව එම සංගමයේ ප්‍රධාන ලේකම් ඥනරත්න වීරකෝන් මහතා පැවසීය. මෙම ව්‍යවස්‌ථාව බලහත්කාරයෙන් ක්‍රියාත්මක කළහොත් දැඩි වෘත්තීය ක්‍රියාමාර්ග ගන්නා බවත් ඒ මහතා සඳහන් කළේය.

Thursday, September 29, 2011

2011 වසරේ 5 ශ්‍රේණි ශිෂ්‍යත්ව විහාගයේ කඩයීම් ලකුණු

මෙවර පහ වසර ශිෂ්‍යත්වයෙන් සමත් වුණු සිසුන් ජනප්‍රිය පාසල්වලට තෝරා ගැනීමට හා ශිෂ්‍යාධාර ප්‍රදානය කිරීමේ දී අවශ්‍ය වන ඒ ඒ දිස්‌ත්‍රික්‌කවලට අදාළ ලකුණු සීමා විභාග දෙපාර්තමේන්තුව විසින් පසුගිය 15 වැනි දින නිකුත් කරන ලදී. ජනප්‍රිය පාසල් සඳහා ඉල්ලුම්පත් ඉදිරිපත් කළ යුත්තේ දිස්‌ත්‍රික්‌කයේ අවම ලකුණු සීමාව හෝ ඊට වැඩි ලකුණු ලබා සිටින සිසුන් පමණි. මේ ඉල්ලුම්පත් ඉදිරි කාලයේ දී පාසල්වලින් මාපියන්ට ලැබෙනු ඇත. සිසුවකුට පිළිගත නොහැකි ලකුණක්‌ ලැබී ඇතැයි සිතන්නේ නම් ඒ සම්බන්ධයෙන් අභියාචනයක්‌ ඉදිරිපත් කළ හැකි ය. එවැනි සිසුන් ගේ 3, 4 සහ 5 යන ශ්‍රේණිවල වාර අවසාන විභාග ප්‍රතිපලවල ප්‍රගති වාර්තාවල සහතික කරන ලද පිටපත්, අයදුම්කරුවන් ගේ සාධනය පිළිබඳ පන්ති භාර ගුරුවරයා ගේ හෝ අංශ ප්‍රධානියා ගේ විස්‌තරාත්මක වාර්තාවක්‌ අභියාචනය සමග ඉදිරිපත් කළ යුතු ය. සියලු ම අභියාචනා ඔක්‌තෝබර් 01 වැනි දිනට පෙර විභාග කොමසාරිස්‌ ජනරාල්, ඇගයීම් ශාඛාව, ශ්‍රී ලංකා විභාග දෙපාර්තමේන්තුව, තැපැල් පෙට්‌ටිය 1503, කොළඹ යන ලිපිනයට එවිය යුතු ය.
මේ අභියාචනා විදුහල්පති පමණක්‌ ඉදිරිපත් කළ යුතු අතර මාපියන්, පන්තිභාර ගුරුවරුන් ඉදිරිපත් කරන අභියාචනා නො පිළිගන්නා බව විභාග කොමසාරිස්‌ ජනරාල් අනුර එදිරිසිංහ මහතා පවසයි.

අවම ලකුණු සීමා

දිස්‌ත්‍රික්‌කය                          සිංහල මාධ්‍යය                  දෙමළ මාධ්‍යය

 01. කොළඹ                            156                                    153

02. ගම්පහ                              156                                    153

03. කළුතර                             156                                    153

04. මහනුවර                           156                                    153

05. මාතලේ                           156                                    153

06. නුවරඑළිය                        149                                    149

07. ගාල්ල                             156                                    153

08. මාතර                              156                                    153

09. හම්බන්තොට                   152                                    149

10. යාපනය -                                                                  151

11. කිලිනොච්චි -                                                            147

12. මන්නාරම -                                                              150

13. වව්නියාව                       143                                    150

Wednesday, September 21, 2011

ශ්‍රී ලංකාව 5ට යයි ඔස්‌ට්‍රේලියාව 4ට එයි

තෙවැනි තරගය ජයගනිමින් තරගාවලිය 1-1 ක්‌ වශයෙන් සමකර ගැනීම සඳහා ශ්‍රී ලංකා කණ්‌ඩායම තබා තිබූ බලාපොරොත්තු සුන් කළ ඔස්‌ටේ්‍රලියානු නායක මයිකල් ක්‌ලාක්‌, නායකත්වයේ ඉනිමක්‌ ක්‍රීඩා කරමින් රැස්‌ කළ ශතකය ප්‍රධාන කොට දෙරට අතර කොළඹ එස්‌. එස්‌. සී. පිටියේ ඊයේ (20 දා) අවසන් වුණු අවසන් ටෙස්‌ට්‌ තරගය ජය පැරදුමෙන් තොරව නිමාවට පත්විය. ඒ අනුව මෙම තරගාවලිය 1/0 ක්‌ වශයෙන් ජයගත් ඔස්‌ටේ්‍රලියානු කණ්‌ඩායම වෝන්/මුරලි ශූරතාව නැවත වරක්‌ තම රට වෙත රැගෙන යැමට සමත්වූවේය.

2006 වසරේදී පාකිස්‌තානය හමුවේ ටෙස්‌ට්‌ තරගාවලියක්‌ පරාජයට පත්වීමෙන් පසු ගෙවුණු වසර 6 කට ආසන්න කාලයේදී ශ්‍රී ලංකාව සිය මව්බිමේදී තරගාවලියක්‌ පරාජයට පත්වූ පළමු අවස්‌ථාව ලෙසින් ඔස්‌ටේ්‍රලියාව සමගින් ඊයේ අවසන් වුණු තරගාවලිය හැඳින්විය හැක. එමෙන්ම අවසන් වසර 10 කාලයේදී සිය මව්බිමේදී පරාජයට පත්වූ තෙවැනි තරගාවලිය වශයෙන්ද මෙම තරගාවලිය හැඳින්විය හැක. එම කාලසීමාවේදී ශ්‍රී ලංකාව පරාජයට පත්ව ඇත්තේ 2004 වසරේ ඔස්‌ටේ්‍රලියාව සමගින් සහ 2006 වසරේ පාකිස්‌තානය සමගින් පැවැති තරගාවලි ද්විත්වය වේ.

ඊයේ දිවා ආහාරයට ප්‍රථම ඔස්‌ටේ්‍රලියානු කඩුලූ කිහිපයක්‌ ඉක්‌මනින් දවා ගැනීම අත්‍යවශ්‍ය වූ නමුත් දුර්වල පන්දු රැකීම සහ නියමිත එල්ලයක්‌ නොමැතිව පන්දු යෑවීම මත දිවා භෝජනය වන විට ශ්‍රී ලංකා කණ්‌ඩායමට දවා ගත හැකි වූයේ පිලිප් හියුස්‌ (126) පමණි. ඔස්‌ටේ්‍රලියානු ඉනිම පන්දු වාර 138.5 කදී නිමා වන විට දෙවැනි ඉනිම සඳහා ලකුණු 488 ක්‌ එක්‌ කරගැනීමට සමත්වී සිටියේය. ජයග්‍රහණය වෙනුවෙන් ලකුණු 332 ක ඉලක්‌කයක්‌ හඹා ගිය ශ්‍රී ලංකා කණ්‌ඩායම තරගය නිමා කරන විට පන්දුවාර 2 ක්‌ අවසනදී කිසිවකු නොදැවී ලකුණු 07 ක්‌ වාර්තා කර ගෙන සිටියේය.

ශතක ලාභී මයිකල් ක්‌ලාක්‌, තම පළමු ලකුණු 50 සම්පූර්ණ කිරීම සඳහා ඊයේ දිනයේදී පන්දු 97 කට මුහුණ දුන් නමුත්, ශතකය කරා ගිය ගමනේදී රැස්‌ කළ ලකුණු 50 සඳහා වැය කරන ලද්දේ පන්දු 58 ක්‌ පමණක්‌ වීම විශේෂත්වයක්‌ විය. ක්‌ලාක්‌ ලකුණු 21 ක්‌ සහ ලකුණු 71 ක්‌ ලබාගෙන සිටින අවස්‌ථාවන්හිදී හේරත්ගේ පන්දු හමුවේ දවා ගැනීම සඳහා ආසන්න අවස්‌ථා 2 ක්‌ ලබා දුන් නමුත් එය කඩුලු රකින ක්‍රීඩක ප්‍රසන්න ජයවර්ධන අතින් ගිලිහී යැම මත තම 15 වැනි ටෙස්‌ට්‌ ශතකය මෙන්ම ශ්‍රී ලංකාවට එරෙහිව වූ දෙවැනි ශතකයද වාර්තා කර ගැනීමට ඔහු සමත්විය. පිටියට පිවිසි අවස්‌ථාවේදී රංගන හේරත්ගේ පන්දු හමුවේ තරමක පීඩනයෙන් යුතුව පන්දුවට පහර දුන්නද, විටෙක ආක්‍රමණකාරී ලෙසින්ද තවත් විටෙක කඩුල්ලේ රැඳී සිටිමින්ද ක්‍රීඩා කළ ඥාණාන්විත පිතිහරඹය නිමා වූයේ හේරත්ගේම පස්‌වැනි ගොදුර බවට පත්වෙමිනි. ඒ වන විටත් පන්දු 178 කට මුහුණ දී සිටි ක්‌ලාක්‌ හතරේ පහර 14 කින් සහ හයේ පහර 3 කින් තම ඉනිම අලංකාර කරගනිමින් ලකුණු 112 ක්‌ වාර්තා කරගෙන සිටියේය. ක්‌ලාක්‌ සහ මයිකල් හසී එකතුව පස්‌වැනි කඩුල්ල සඳහා වාර්තා කරන ලද ලකුණු 176 ක සබඳතාව දෙරට අතර පස්‌වැනි කඩුල්ලේ හොඳම සබඳතාව වේ.

මෙම ඉනිමේදී ශ්‍රී ලංකා කණ්‌ඩායමේ සාර්ථකම පන්දු යවන්නා බවට පත්වූ රංගන හේරත් ලකුණු 157 කට පිතිකරුවන් 7 කු දවා ගනිමින් තම ටෙස්‌ට්‌ ක්‍රිකට්‌ දිවියේ හොඳම පන්දු යෑවීම වාර්තා කර ගත්තේය. අදාල පන්දු යෑවීමත් සමග ශ්‍රී ලංකාව වෙනුවෙන් ටෙස්‌ට්‌ කඩුලූ 100 සීමාව පසු කළ සිව්වැනි පන්දු යවන්නා බවටද පත්වීමට හේරත් සමත්වුවේය. හෙරත්ට පෙර ශ්‍රී ලංකාව වෙනුවෙන් කඩුලූ 100 සීමාව පසු කර ඇත්තේ මුත්තයියා මුරලිදරන් (800), චමින්ද වාස්‌ (355) සහ ලසිත් මාලිංග (101) පමණි. එමෙන්ම එය හේරත්ගේ ටෙස්‌ට්‌ ක්‍රිකට්‌ දිවියේ කඩුලු 5 කට වඩා වැඩියෙන් දවා ගත් 6 වැනි අවස්‌ථාව ලෙසින්ද වාර්තා විය.

ඔස්‌ටේ්‍රලියානු කණ්‌ඩායමේ අංක 10 පිතිකරුවා වූ කෝප්ලන්ඩ් විසින් හේරත්ගේ පන්දුවකට එල්ල කරන ලද ස්‌වීප් පහරක්‌, අත්ආවරණයේ වැදී උඩ පන්දුවක්‌ ලෙස ජයවර්ධන රැක ගත්තද එය නොදැවී යැමක්‌ ලෙස ටෝනි හිල් විනිසුරුවරයා තීරණය කළේය. එහෙත් පුණරූපනවලදී එය නිසැකයෙන්ම දැවී යැමක්‌ ලෙස සටහන් වූවත් තෙවැනි විනිසුරු විනිසුරු විමසීම සඳහා වූ අවස්‌ථා දෙකම අවසන්වී තිබීම මත කඩුලු 8 ක්‌ ලබා ගැනීමට හේරත්ට තිබූ අවස්‌ථාව ගිලිහී ගියේය. මෙවර තරගාවලියේ වැඩිම ලකුණු ලාභියා බවට පත්වූ මයිකල් හසී ඊයේ දිනයේදී නැවතත් ලකුණු 93 ක්‌ ලබා ගැනීමට සමත්වූවේය. ඒ අනුව ඔහු මෙවර තරගාවලියේදී ඉනිම 5 කදී රැස්‌ කරන ලද ලකුණු සංඛ්‍යාව ලකුණු 463 ක්‌ වේ. ශතක 2 ක්‌ සහ අර්ධ ශතක 2 ක්‌ වාර්තා කළ හසීගේ ඉනිමක ලකුණු ලබා ගැනීමේ සාමාන්‍ය 92.60 ක්‌ වශයෙන් සටහන් වේ. අවසන් වරට ඔස්‌ටේ්‍රලියානු පිතිකරුවකු එක්‌ තරගාවලියකදී ලකුණු 400 ක්‌ ඉක්‌මවා යැමට සමත්වී ඇත්තේ පිලිප් හියුස්‌ (415) වන අතර එය පසුගිය 2008/09 දකුණු අප්‍රිකානු තරගාවලියේදී වේ. ඊට පසු ගෙවුණු කාල සීමාවේදී ඔස්‌ටේ්‍රලියාව වෙනුවෙන් තරගාවලියකදී ලකුණු 400 ක්‌ පසු කළ එකම පිතිකරුවා බවටද හසී පත්විය. පළමු තරග දෙකේදී මෙන්ම මෙම තරගයේ වීරයා සම්මානයද සහ තරගාවලියේ වීරයා සම්මානයද මයිකල් හසී විසින් දිනා ගන්නා ලදී. දෙරට අතර ටෙස්‌ට්‌ තරගාවලිය අවසානයේදී ජාත්‍යන්තර ටෙස්‌ට්‌ ශ්‍රේණිගත කිරීම්වල ශ්‍රී ලංකාව පස්‌වැනි ස්‌ථානයට සහ ඔස්‌ටේ්‍රලියාව එහි සිව්වැනි ස්‌ථානයට පත්විය.

ශ්‍රී ලංකාවේ මීළග සංචාරය වන්නේ නොවැම්බර් මස 15 වැනිදා සිට පාකිස්‌තානය සමගින් ඩුබායිහිදී පැවැත්වීමට නියමිත ටෙස්‌ට්‌ තරග 3 කින්, එක්‌දින තරග 5 කින් සහ එක්‌ පන්දුවාර 20/20 තරගයකින් සමන්විත තරගාවලිය වේ.

Friday, September 16, 2011

ටෙස්‌ට්‌ ලෝක ශූරතාවට සිංහයන්ද කැන්ගරුවන්ද තීරනය අද සිට ssc හිදී

තම මව් බිමේදී තරග කළද මෙතෙක්‌ පැවැති ටෙස්‌ට්‌ තරග 2 හිදීම දුර්වල ක්‍රීඩා විලාශයක්‌ පෙන්නුම් කළ ශ්‍රී ලංකා කණ්‌ඩායමට, ගිලිහී ගොස්‌ තිබෙන අභිමානය යළි ළඟා කර ගැනීම සඳහා ඔස්‌ටේ්‍රලියානු කණ්‌ඩායමට එරෙහිව ලැබෙන අවසන් තරග අවස්‌ථාව වන අද (16 දා) කොළඹ එස්‌. එස්‌. සී. පිටියේදී ආරම්භවන තෙවැනි ටෙස්‌ට්‌ තරගයෙන් උදාවේ.

දෙරට අතර ගාල්ලේදී පැවැති පළමු ටෙස්‌ට්‌ තරගයෙන් ලකුණු 125 ක පරාජයක්‌ සහ පරාජය පෙනි පෙනී තිබූ පල්ලකැලේ තරගය වර්ෂාව හේතුවෙන් ජය පැරදුමෙන් තොරව අවසන්වීම මත මේ වන විටත් තරගාවලිය 1/0 ක්‌ වශයෙන් ඔස්‌ටේ්‍රලියාව පෙරමුණේ පසුවෙයි.

ලෝක ටෙස්‌ට්‌ ක්‍රිකට්‌ ඉතිහාසයේ පළමු වතාවට පැවැත්වෙන ටෙස්‌ට්‌ ලෝක ශූරතාවට සුදුසුකම් ලැබීමේ බලාපොරොත්තුවෙන් පසුවන ශ්‍රී ලංකා කණ්‌ඩායමට ශ්‍රේණිගත කිරිමේදී සිව්වැනි ස්‌ථානයේ රැඳී සිටීමටනම් මෙම තරගයේ ජය දැඩි සාධකයක්‌ බවට පත්ව තිබේ. නිබඳවම වාසිදායක ප්‍රතිඵල ලබා දෙනු ලබන එස්‌. එස්‌. සී. තණතීරුවේදී ශ්‍රී ලංකා කණ්‌ඩායම අවසන් වරට සහභාගිවී ඇති ටෙස්‌ට්‌ තරග 17 න් පරාජයට පත්වී ඇත්තේ එක්‌ තරගයක්‌ පමණක්‌ වන අතර ඒ 2004 වසරේ රිකී පොන්ටින්ගේ නායකත්වයෙන් සංචාරක ඔස්‌ටේ්‍රලියානු කණ්‌ඩායම සමග පැවැති තරගය වේ. සෙසු තරග 16 අතුරින් තරග 4 ක්‌ පමණක්‌ ජය පැරදුමෙන් තොරව අවසන් වූ අතර ඉතිරි තරග සියල්ලෙහිම ජය ශ්‍රී ලංකාව සතුවිය.

පල්ලකැලේ පැවැති අවසන් තරගයේ දෙවැනි ඉනිමේදී ශ්‍රී ලංකා පිතිකරුවන් යළි සුපුරුදු දක්‍ෂතා අතරට පැමිණී බැවින් ඔවුන් මෙම තරගයේදී ඔස්‌ටේ්‍රලියානුවන්ට එරෙහිව හොඳින් තරග වදිනු ඇතැයි අපේක්‍ෂා කරන නමුත් එයට හරස්‌වීමට ඉඩ ඇති ප්‍රධානම සාධකය බවට පත්වී ඇත්තේ මේ දිනවල කොළඹ ප්‍රදේශයට ඇද හැළෙන වර්ෂාව වේ.

ලොව වැඩිම ජනප්‍රියතාවක්‌ හිමි ක්‍රීඩකයා සම්මානය දිනා ගත් කුමාර් සංගක්‌කාරට අද තරගය සුවිශේෂී තරගයක්‌ වේ. මේ වන විටත් ටෙස්‌ට්‌ තරග 99 කට ක්‍රීඩා කර ඇති සංගක්‌කාරගේ 100 වැනි ටෙස්‌ට්‌ තරගය මෙම තරගය වේ. එම තරගය කෙසේ හෝ ජය ගනිමින් තරගාවලිය ජය පැරදුමෙන් තොරව අවසන් කිරීම තමා ඇතුලූ තම කණ්‌ඩායමේ බලාපොරොත්තුව බව ඊයේ පැවැති මාධ්‍ය හමුවේදී ඔහු සඳහන් කර සිටියේය.

අද තරගය පිළිබ අදහස්‌ දැක්‌වූ සංගක්‌කාර, '100 වැනි තරගය මේ තරගය විශේෂත්වයක්‌ නැහැ. පළමු තරගයට සහභාගි වුණත් 100 වැනි තරගයට සහභාගි වුණත් වැදගත් වන්නේ තරගයේ ජයග්‍රහණයයි. ඒ නිසා 100 වැනි තරගයට හරි වටිනාකමක්‌ එක්‌ වන්නේ මෙම තරගය ජයග්‍රහණය කළහොත් පමණයි' යනුවෙන් සඳහන් කළ අතර ක්‍රීඩාවෙන් සමුගත් පසු තමන්ට ඉත§රි වන්නේ මෙවැනි දේවල මතකයක්‌ පමණක්‌ බවද හෙතෙම සඳහන් කර සිටියේය.

සංගක්‌කාරට පෙර ශ්‍රී ලංකාව වෙනුවෙන් ටෙස්‌ට්‌ තරග 100 ක්‌ නියෝජනය කර ඇත්තේ ක්‍රීඩකයන් සිව් දෙනෙකු පමණක්‌ වන අතර සංගක්‌කාර එහි පස්‌වැන්නා වේ. ඔහුට පෙර පෙර මුත්තයියා මුරලිදරන්(132), මහේල ජයවර්ධන(121), චමින්ද වාස්‌ (111) සහ සනත් ජයසුරිය (110) ශ්‍රී ලංකාව වෙනුවෙන් ටෙස්‌ට්‌ තරග 100 ක්‍රීඩා ක්‍රීඩකයෝ වෙති.

ක්‍රීඩකයන් සිව් දෙනා අතුරින් තවමත් ක්‍රීඩා පිටියේ සිටින්නේ මහේල ජයවර්ධන පමණක්‌ වන අතර එහිදී ඔහුගේ දක්‍ෂතා අභිබවා යැමේ බලාපොරොත්තුවක්‌ තමා සතුව තිබෙන්නේදැයි මෙහිදී මාධ්‍යයෙන් නැගූ පැනයකට පිළිතුරු දුන් සංගක්‌කාර, 'මහේල කියන්නේ විශිෂ්ට ක්‍රීඩකයෙක්‌. අපි අතර එහෙම තරගයක්‌ නැහැ. ඒත් අපි අතර තියෙන වාර්තා පිළිබඳ කතා කරනවා. ඒ හැරෙන්න විශේෂත්වයක්‌ නැහැ' යනුවෙනි.

මෙතෙක්‌ ශ්‍රී ලංකා ටෙස්‌ට්‌ ක්‍රිකට්‌ ඉතිහාසයේ ඉනිමක ලකුණු ලබා ගැනීමේ සාමාන්‍ය වැඩිම අගයක්‌ (55.66) රඳවා තබා ගැනීමට සමත්ව සිටින ක්‍රීඩකයා බවට පත්ව සිටින සංගක්‌කාර මෙතෙක්‌ ක්‍රීඩා කර ඇති තරග 99 දී ඉනිම 166 කදී ක්‍රීඩා කරමින් මුලූ ලකුණු 8572 ක්‌ රැස්‌ කර ගැනීමට සමත්ව සිටියි. එයට ශතක 25 ක්‌ සහ අර්ධ ශතක 35 ක්‌ ඇතුළත් වන අතර වැඩිම ලකුණු සංඛ්‍යාව ලෙස දකුණු අප්‍රිකාවට එරෙහිව එස්‌. එස්‌. සී. පිටියේදී රැස්‌කරගෙන ඇති ලකුණු 287 වාර්තා වේ. එම තරගයේදී සංගක්‌කාර සහ මහේල ජයවර්ධන (375) අතර තෙවැනි කඩුල්ල වෙනුවෙන් ලකුණු 624 ක ලකුණු සම්බන්ධතාවක්‌ පවත්වමින් ටෙස්‌ට්‌ තරග වල ඕනෑම කඩුල්ලක්‌ වෙනුවෙන් වාර්තා වී ඇති වැඩිම ලකුණු සංඛ්‍යාවේ වාර්තාව පිහිටුවීමට සමත්වීය. එමෙන්ම ඔහු ද්විත්ව ශතක සංඛ්‍යාව 7 කි.

ඊයේ උදෑසන එස්‌. එස්‌. සී. පිටියේදී ශ්‍රී ලංකා කණ්‌ඩායම සිය පුහුණුවීම් වල නිරත වූ නමුත් සවස්‌ කාලයේදී ඇද හැලූණු වර්ෂාව හේතුවෙන් ඔස්‌ටේ්‍රලියානු පිලට සිය පුහුණුවීම්වල නිරත වීමට තිබූ අවස්‌ථාව ගිලිහී ගියේය.

ආබාධයක්‌ හේතුවෙන් දෙවැනි තරගයට ක්‍රීඩා කිරීමට නොහැකි වූ රංගන හේරත් නැවතත් කණ්‌ඩායමට පැමිණ සිටින බැවින්, ඔහු නියත වශයෙන්ම දෙවැනි තරගයේදී මංගල ටෙස්‌ට්‌ වරම් ලැබූ සීකුගේ ප්‍රසන්න වෙනුවට ක්‍රීඩා කරනු ඇත.

එස්‌. එස්‌. සී. තණතීරුවේදී පළමු දිනය හෝ දෙක තුළ වේග පන්දු යවන්නන්ට දායකත්වයක්‌ දක්‌වනු ලබන බැවින් මෙම තරගයේදී බොහෝ දුරට ශ්‍රී ලංකා කණ්‌ඩායම වේග පන්දු යවන්නන් තිදෙනකු සමගින් අවතීර්ණ වීමට නියමිත බව වාර්තා වේ. එසේ වුවහොත් සුරාඡ් රන්දිව්ටද ස්‌ථානය අහිමිව යන අතර එහිදී තෙවැනි වේග පන්දු යවන්නා ලෙස ශමින්ද එරංග අද දිනයේදී මංගල ටෙස්‌ට්‌ වරම් ලබනු ඇත.

ඔස්‌ටේ්‍රලියානු කණ්‌ඩායමද අද තරගයේදී වෙනස්‌ කම් දෙකක්‌ සිදුකරමින් තරගයට අවතීර්ණ වන අතර එහිදී මෙතෙක්‌ තරගාවලියේ වැඩිම කඩුලූ ලාභියා බවට පත්ව සිටින රයන් හැරිස්‌ සහ අංක 06 පිතිකරු ලෙස ක්‍රීඩා කරන ලද උස්‌මාන් කවාජා වෙනුවට පීටර් සිඩ්ල් සහ රිකී පොන්ටින් ක්‍රීඩා කිරීමට නියමිතය.

මෙහිදී තරගය පිළිබඳව අදහස්‌ දැක්‌වූ මයිකල් ක්‌ලාක්‌, තමන් ඇතුලූ කණ්‌ඩායම මෙම තරගාවලියට පැමිණියේ තරගාවලිය 3/0 ක්‌ වශයෙන් ජයගැනීමට වන බවත්, එහිදී දෙවැනි තරගයට වර්ෂාවෙන් බාධා ඇතිවීම ජයග්‍රහණය ගිලිහී ගියත් අද තරගය ජය ගනිමින් තරගාවලිය 2/0 ක්‌ ලෙස ජය ගනිමින් සිය රටට යැමට බලාපොරොත්තුවෙන් පසුවන බවත් සඳහන් කර සිටියේය.

තරග 2 කදී කඩුලූ 11 ක්‌ බිඳ හෙළමින් කඩුල්ලක්‌ දවා ගැනීමේ සාමාන්‍ය 14.54 ක අගයක්‌ රඳවා තබාගෙන සිටින හැරිස්‌ කලවයේ ඇතිවී තිබෙන මස්‌පිඩු ආබාධයක්‌ හේතුවෙන් ක්‍රීඩා නොකරනු ලබන අතර දෙවැනි තරගයේදී ෂෝන් මාෂ් ශතකයක්‌ රැස්‌ කිරීම සහ හිටපු නායක පොන්ටින් නැවතත් කණ්‌ඩායමට පැමිණීම මත කවාජාගේ ස්‌ථානය අද තරගයේදී ඔහුට අහිමිව යනු ඇත. පොන්ටින් ක්‍රීඩා කරනු ලබන අංක -03 පිතිකරු ස්‌ථානයේ ක්‍රීඩා කරමින් ශතකයක්‌ වාර්තා කළද අද තරගයේදී ෂෝන් මාෂ්ට ක්‍රීඩා කිරීමට සිදුවන්නේ කවාජා ක්‍රීඩා කරන ලද අංක 6 පිතිකරු ස්‌ථානයේය.

අපේක්‍ෂිත ශ්‍රී ලංකා කණ්‌ඩායම -

ටී.එම්.ඩිල්ෂාන් (නායක), කුමාර් සංගක්‌කාර, තරංග පරණවිතාන, මහේල ජයවර්ධන, තිලාන් සමරවීර, ප්‍රසන්න ජයවර්ධන, ඇන්ජලෝ මැතිව්ස්‌, රංගන හේරත්, චානක වෙලගෙදර, සුරංග ලක්‌මාල්, සුරාඡ් රන්දිව් හෝ ශමින්ද එරංග.

ඔස්‌ටේ්‍රලියානු කණ්‌ඩායම

මයිකල් ක්‌ලාක්‌ (නායක), ෂේන් වොට්‌සන්, පිලිප් හියුස්‌, රිකී පොන්ටින්, මයිකල් හසී, ෂෝන් මාෂ්, බ්‍රැඩ් හැඩින්, මිචෙල් ජොන්සන්, පීටර් සිඩ්ල්, ට්‍රෙන්ට්‌ කෝප්ලන්ඩ්, නේදන් ලයන්.

Thursday, September 15, 2011

නිලදරුවන්ගේ නොසැලකිල්ලෙන් වැසීයන පාසල්

අපේ රටේ පාසල් දසදහසකට ආසන්න සංඛ්‍යාවක්‌ තිබේ. මේ වන විට ඉන් දහසක්‌ පමණ වැසීගොස්‌ ඇති අතර, තවත් දහසකට ආසන්න සංඛ්‍යාවක්‌ නුදුරු අනාගතයේදීම වැසී යැමට නියමිතව ඇත. වැසී ගිය පාසල් දෙස බලද්දී ඒවාට ගිය දරුවන්ට සිදුවූයේ කුමක්‌ද? එම පාසල්වලට ඇතුළත් වන්නට සිටි දරුවන්ට සිදුවන්නට ඇත්තේ කුමක්‌දැයි කිසිවකු සොයා බැලු බවක්‌ දැන ගන්නට ද නැත.

පාසල අහිමිවූයේ පාසල් අධ්‍යාපනය වැඩියෙන්ම අවශ්‍යව තිබූ දරුවන්ටය. එබැවින්, වැසී ගිය සහ වැසී යැමට ආසන්න පාසල් වල, ඒවා පිහිටි භූමිකාව දෙස සොයා බැලීම වටී.

දුෂ්කරතා රැසකට මුහුණ දෙන ධීවරයන් වසන ධීවර ගම්මානවල මෙන්ම, හරිහැටි රැකියාවක්‌ නොමැතිකම නිසා හේනක්‌ හෝ වවාගෙන බඩ වියත රක්‌ෂා කරන දුෂ්කර ඈත පිටිසර ගම්මානවල දරුවන්ගේ පාසල් මෙසේ වැසී ගිය පාසල් පිහිටි ප්‍රදේශයන්ය. මේවා බොහෝ විට දුෂ්කර පාසල් ලෙසින් හංවඩු ගැසූ පාසල්ය.

වෛද්‍යවරුන්, ඉංජිනේරුවන්, ගුරුවරුන්, දේශපාලකයින් මෙන්ම යමක්‌ කමක්‌ කරකියා ගත හැකි උදවියගේ දරුවන් ඉගෙනුම ලබන පාසල් වසා දමන්නට කිසිවකු ඉදිරිපත් වන්නේ නැත. කවුරු කවුරුත් ඉදිරිපත් වන්නේ නැති බැරි එකාගේ පාසල වසා දමන්නටය. නැති බැරි එකාගේ පාසල වසා දමන්නට ඇතැම් අධ්‍යාපන බලධාරීන් මෙන්ම ඇතැම් දේශපාලන බලධාරීන් කොතරම් දුරට දායකවන්නේ දැයි විමසා බැලීම මෙම ලිපියේ අරමුණයි.

වැසීගිය බොහෝ පාසල් පිහිටි ප්‍රදේශ පිළිබඳව විමසා බලද්දී එම ගම්මානවල දරුවන්ට මෙන්ම මව්පිය වැඩිහිටියන්aටත් අධ්‍යාපනයේ වටිනාකම තේරුම් ගැනීම අපහසු වී ඇත. මේ හේතුව නිසා තම දරුවාගේ පාසල රැකගැනීමේ අවශ්‍යතාවක්‌ ඔවුන්ටද නැත. තමුන්ට වන අසාධාරණය තේරුම් ගැනීමට හෝ ඒ වෙනුවෙන් හඬක්‌ නගන්නට තරම් ඔවුන්ට අවබෝධයක්‌ නැත. තමුන්ට වන අසාධාරණය වෙනුවෙන් සාධාරණයක්‌ පතා කථාකරන්නට තරම් සන්නිවේදන හැකියාවක්‌ ඔවුන්ට නැත. එදිනෙදා බඩගෝස්‌තරය සොයා ගැනීම මිසක ඔවුන්ට වෙන අපේක්‍ෂාවක්‌ද නැත. ඒ කාර්යද ඒ අයට බොහෝ දුෂ්කරය. එබැවින් ඔවුන්ට තම දරුවන්ගේ අධ්‍යාපනය පිළිබඳව අපේක්‍ෂාවක්‌ද නැත. කෙසේ වෙතත් පාසලක අනධ්‍යයන කාර්යමණ්‌ඩලයේ සිට අධ්‍යාපන අමාත්‍යවරයා දක්‌වා වැටුප් ලබන්නේ මේ රටේ දරුවන් නිසාය. ඒ සියල්ලෝම, දරුවන්ට ඉගෙනීමට තිබෙන අයිතිය හා සුදුසු අධ්‍යාපනික පසුබිම තහවුරු කර දීමට සෘජුවම බැඳී සිටී. එබැවින්, ඒ යුතුකම ඉටුනොකොට තව දුරටත් අසරණ දරුවන්ගේ පාසල වසන්නට ඉඩ හරිනවාද?

උපයාගත් දෙයින් බඩවියත රක්‍ෂා කිරීමත්, ඇඟපතේ රුදාව මකා ගැනීමට මත් පැන් බීමත් හැරෙන්නට ඇතැම් මව්පිය වැඩිහිටියන්ට ජීවිතයක්‌ නොමැත. ඇඳුමක්‌ පැළඳුමක්‌ නැති, ලෙඩට දුකට බෙහෙතක්‌ හේතක්‌ නැති, හෙටක්‌ ගැන විශ්වාසයක්‌ නැති මෙවැනි අහිංසක දුප්පතුන්ගේ පවුල්වල දරුවන්ට ඉන් ගොඩ ඒමට ඇති එකම සරණ අධ්‍යාපනයයි. කුඩා පාසල් වසා දැමීම තුළ, දවසින් දවස නැතිව යන්නේත් මෙවැනි පවුල්වල දරුවන්ගේම අධ්‍යාපනය නොවන්නේද?

මේ සඳහා කරුණු කාරණා සොයා බැලීමේ අදහසින් මම අම්බලන්ගොඩ කලාප අධ්‍යාපන කාර්යාලයට ගොඩ වුණෙමි. මේ වන විට අම්බලන්ගොඩ කලාප අධ්‍යාපන කාර්යාලය මගින් පාලනය වන බොහෝ පාසල් පසුගිය වසර කිහිපය තුළ වසා දමා ඇත. තල්ගස්‌ගොඩ කනිටු විදුහල දෙල්දුව කනිටු විදුහල, කොබෙයිතුඩුව කනිටු විදුහල, ගොඩහේන කනිටු විදුහල, හෙප්පුමුල්ල කනිටු විදුහල, ඌරවත්ත සුමේධ කනිටු විදුහල වලගෙදර කනිටු විදුහල, බාන්වැල්ගොඩසැල්ල කනිටු විදුහල, දෙල්ගහබැද්ද කනිටු විදුහල, ගිණිමැල්ලගහ බටහිර කනිටු විදුහල සහ කුරුඳුවත්ත කනිටු විදුහල් ඒ අතරින් සමහරකි.

මේ අතර එම අධ්‍යාපන කලාපයේම තවත් පාසල් 20 ක්‌ පමණ නුදුරු අනාගතයේදි වැසි යාමට පෙර නිමිති පහල වී තිබේ. ඒ පටුවත ලංකා සභා කනිටු විදුහල, ඉඩන්තොට කනිටු විදුහල, වතුරවිල ධර්මපාල කනිටු විදුහල, රොන්නදුව කනිටු විදුහල, ග්‍රාම කනිටු විදුහල, වඳව කනිටු විදුහල සහ අම්බලන්ගොඩ ධම්මකුසල කනිටු විදුහල ඉන් සමහරකි. මුළු දිවයිනේම මෙවැනි අධ්‍යාපන කලාප අතිවිශාල සංඛ්‍යාවක්‌ මගින් රටේ සියලුම පාසල් පාලනය වේ. අම්බලන්ගොඩ කලාප අධ්‍යාපන කාර්යාලය එක්‌ උදාහරණයක්‌ පමණි.

එමෙන්ම අම්බලන්ගොඩ කොට්‌ඨාස අධ්‍යාපන අධ්‍යක්‍ෂ පාලිත ජයසේකර මහතා විසින් රචිත ගමට කැකිරි හෙවත් අධ්‍යාපනයේ අදෘශ්‍යමාන පැතිකඩ නමින් යුත් ග්‍රන්ථයෙන්, ඇල්පිටිය අධ්‍යාපන කලාපයේ නියාගම විදුහල් හයක්‌ වසා දමා ඇති බව පවසා ඇත. මෙයින් විදුහල් පහක්‌ කනිටු විදුහල් වන අතර එකක්‌ මහ විදුහලකි. 2005,01.09 දින පිටිගල මහ විදුහලද, 1999.01.04 දින සිට මත්තක කනිෂ්ඨ විද්‍යාලයද, 2001.03.05 දින සිට දුවේගොඩ කනිෂ්ඨ විද්‍යාලයද, 2000.01.14 දින සිට බනංගල කාර්යවසම් කනිෂ්ඨ විද්‍යාලයද, 2000.02.22 දින සිට උහන්දූවිට පුණ්‍යරතන කනිෂ්ඨ විද්‍යාලයද මෙසේ වසන ලද පාසල්ය.

එමෙන්ම 1997 වසර සිට 2007 වසර දක්‌වා පසුගිය දසකය තුළ දිවයින පුරා පාසල් 664 ක්‌ වසා දමා ඇති බවත්, 2007 වසරේදී පමණක්‌ පාසල් 36 ක්‌ වසා ඇති බවත් මේ අනුව ශ්‍රී ලංකාවේ සෑම දින 10 කටම පාසලක්‌ වැසී යන බවද 2008.12.07 දින රාවය පුවත් පත මගින් හෙළිකොට තිබිණි.

පාසල වැසූ විට වෙනත් පාසලකට ළමයින්ට යා හැකිද? ඔවුන්ගේ ආර්ථිකය ශක්‌තිමත්ද? නිලධාරීන්ට ඒවා ගැටලු නොවේ. වැසූ පාසල් වල දරුවන් වැඩි පිරිසක්‌ කිසිම පාසලකට නොගොස්‌ අධ්‍යාපනයට ආයුබෝවන් කීහ. ඊටත් වැඩි භයානක එක නම් එම ප්‍රදේශයේ ඉපදෙන අනාගත දරු පරපුරට පාසලක්‌ අහිමි වීමයි. පාසල් වැසී යන ප්‍රවණතාව අනුව බලන විට අනාගතයේ ලියන්නට කියවන්නට අපොහොසත් පිරිස අපේ රටේ වැඩි විය හැකිය. සාක්‍ෂරතාව අනුව වර්තමානයේ උදම් අනන අයට මතු මත්තේ දී හඬන්නට සිදුවනු ඇත.

අධ්‍යාපන පරිපාලන රටාව ගැන සාකච්ජා කරද්දී නිලධාරීන් දක්‌වන උදාසීනත්වය ඉතාමත්ම කනගාටුදායකය. වැසී ගිය පාසල් දෙස බලතහොත් ඒ සෑම පාසලකටම මේ අයගේ අවධානය යොමුවී නොමැති බව කිව යුතුය. මසකට, වසරකට වරක්‌ හෝ නොව දෙවසරකටවත් මේ අය මේ කුඩා පාසලකට ගොඩවී නොමැත. ගුරුභවතුන්ගේ සංඛ්‍යාවත්, ළමයින්ගේ සංඛ්‍යාවත් සන්සන්දනය කරමින් මේ අය බලධාරීන්ට නිරන්තරව රපෝර්තු කරන්නේ පාසල වසා දැමීමට නියෝග කරන ලෙසය. අඩු පාඩු සොයා බලා ඒවා සකසා පාසල පවත්වාගෙන යැම වෙනුවට ඔවුන්ට ඇති එකම විකල්පය පාසල වසා දැමීමය.

පන්සලක්‌, පල්ලියක්‌, පාසලක්‌ අසල හෝ ඇති සුරා සලක්‌ හෝ රේස්‌ ඔට්‌ටු පොළක්‌ වසන්නට වචනයක්‌වත් කථා නොකරන අධ්‍යාපන බලධාරීන් මෙන්ම දේශපාලකයින්ද අසරණ දරුවන්ගේ පාසල් වසන්නට දරණ උනන්දුව නම් ලජ්ජාසහගතය. අම්බලන්ගොඩ නගරයේ පාසල් සංඛ්‍යාව මෙන් දෙගුණයකට වඩා සුරාසල් ඇති බවත්, එමෙන් සිවුගුණයක්‌ පමණ රේස්‌ ඔට්‌ටු පොළවල් ඇති බවත් දැනගන්නට තිබේ. සත්‍ය වශයෙන්ම සමස්‌ත දිවයිනේම තත්වය එයයි. සුරා සලක්‌ හෝ රේස්‌ ඔට්‌ටු පොළක්‌ විවෘත කළ යුතුනම්, එයට තිබෙන බාධාව පාසලක්‌ හෝ පන්සලක්‌ නම් එය එතැනින් විතැන් කොට හෝ සුරා පොළ පවත්වාගෙන යාමට අපේ අය හරිම හපනුන්ය.

නගරයේ පිහිටි ජනප්‍රිය පාසල වසරින් වසර විශාල වෙයි. ඊට හේතුව ආර්ථිකමය හැකියාව ඇති මවුපියන් විසින් තම දරුවන් මෙම පාසල් කරා ගෙන ඒමය.ගම්වල පාසල් දියුණු කරනු වෙනුවට ඇතැම් දේශපාලනඥයෝද මේවාට උදව් කරති. ගමේ නැතිබරි එකාගේ පාසල වැසුනාට ඔහුට රිදුමක්‌ නැත.ගමේ පාසල වැසී රුපියල් ලක්‍ෂ කෝටි ගණනක්‌ වැය කළ ගොඩනැගිලි ගවහල් බවට පත්වෙද්දී නගරයේ සීමිත භූමි ප්‍රමාණයක විශාල මුදල් සම්භාරයක්‌ වියදම් කර අලුතින් ගොඩනැගිලි ඉදිකරති.

නගරයේ ජනප්‍රිය පාසලට ආදි ශිෂ්‍යයින් සුභ පතන්නන් ආදීහු උදව් කරති.අවාසනාවට ගමේ පාසලට මේ කිසිවකුගේ උදව්වක්‌ උපකාරයක්‌ නැත. ගමේ වැසී යන පාසලකට පහසුකම් සලකා පාසල නංවන්නට උදව් කළ හැකි සුභ පතන්නන් ඉදිරිපත් වන්නේ නම් කොතරම් භාග්‍යයක්‌ද?

අම්බලන්ගොඩ නගරයේ ඇතැම් පාසල්වල එක්‌ පංතියක්‌ සඳහා නාම ලේඛන දෙක බැගින් භාවිතා කරන බව ප්‍රසිද්ධ කරුණකි. මේ නාම ලේඛන සපයන්නේ කලාප අධ්‍යාපන කාර්යාලයෙනි. අමාත්‍යාංශ පොදු චක්‍රලේඛ කඩකරමින් ඇතැම් විදුහල්පති මුදලාලිලා නටන මේ නාඩගමට කලාප අධ්‍යාපන කාර්යාලයේ බලධාරීන් මෙන්ම දකුණු පලාත් අධ්‍යාපන අමාත්‍යාංශයේද බලධාරීන් මුණිවත රැකීම කොතරම් දුරට සාධාරණද? පංති කාමරයේ ගුරුභවතාට, නිදහසේ දරුවන් සමීපයට යා නොහැකි නිසා දරුවන්ගේ පොත්පත් දරුවන් අසලට උඩින් විසිකරන තත්වයකට අද පංති කාමරයේ පසුබිම සැකසී ඇත. කැසිකිළියට හෝ වැසිකිළියට යැමටවත් කුඩා දරුවන්ට අවකාශ නැත්තේ දරුවන් සැමන් මෙන් පැක්‌ කොට ඇති බැවිනි. මේ අනුව ඇතැම් පාසලවල විදුහල්පතිවරු සිටිය යුත්තේ විදුහල්පති පුටුවල නොව සිරගෙවල් වලය. පළමු පංතිය සඳහා සිසුන් ඇතුලත් කර ගැනීමේ දී මෙවරත් ඇතැම් පාසල් වල විදුහල්පතිවරුන් කිහිප දෙනෙක්‌ ඒ වෙනුවෙන් මුදල් ආධාර ඉල්ලා ඇති බැවින් ඒ පිළිබඳව ලංකා ගුරු සංගමය විසින් අමාත්‍යාංශයට දැනටමත් පැමිණිලි කර ඇති පුවතක්‌ මාධ්‍ය මගින් හෙළිදරව් කර තිබුණි. උණ පුරුකෙ හත් අවුරුද්දක්‌ දැම්මත්, බලු වලිගෙ ඇද හරින්නට බැරිය කියන්නේ මෙවැනි සිද්ධීන් වලටය. කුඩා පාසල වසා හෝ තම මල්ල පුරවා ගන්නට උත්සාහ කරන විදුහල්පතිවරුන්ද සිටිති. එවැනි අයටත් පළමු පංතියට දරුවන් ඇතුළත් කර ගන්නා සමය, මධු සමයටත් වඩා ජොලිය.

මේවන විට අම්බලන්ගොඩ ධම්මකුසල ඇතුළු තවත් පාසල් සියගණනක්‌ වැසීමට කැසපට ගසා, නිලධාරීහු බලා සිටිති. බලධාරීන් ගේ වගකීම වන්නේ එය අනුමත කරනු වෙනුවට හොඳ සම්භාව්‍ය ගුරුභවතුන් එවැනි පාසල් වලට පත්කොට අඩුපාඩුකම් සපුරා සියලු පහසුqකම් ලබාදීමය. එවිට ගමෙන් නගරයේ පාසල් කරා ඇදී ඒම අඩුවේ. එවිට ගමේ පාසල දියුණු වෙයි. රටට ජාතියට අවශ්‍ය මානව සම්පත පෙරසේම බිහිකිරීම නොඅඩුව සිදුවනු නොඅනුමානය.

පාසල් නොයන ළමුන් පාසල් ගත කිරීම සම්බන්ධයෙන් අනිවාර්ය අධ්‍යාපන කමිටු දෙකක්‌ දැනටමත් ක්‍රියාත්මක වෙයි. 1939 අංක 31 දරණ අධ්‍යාපන පනතින් අවුරුදු 5-14 වයස කාණ්‌ඩයේ ළමුන්ගේ පැමිණීම අනිවාර්ය කෙරෙන නීතිරීති ක්‍රියාත්මක කිරීමේ බලතල දෙන ලදී. ඉන් අනතුරුව 1947 අංක 26 දරණ පනත මගින් එය අවුරුදු 16 දක්‌වා දීර්ඝ කරන ලදී. වර්තමානයේ නම් වයස අවුරුදු 18 දක්‌වා දරුවන් ළමයින් වශයෙන් සැලකේ. සියලුම ළමුන් හට අනිවාර්යයෙන්ම අධ්‍යාපනය ලබාදීමේ රජයේ ජාතික ප්‍රතිපත්තිය තව දුරටත් සාක්‌ෂාත් කරගැනීමේ අරමුණින් 1997 නොවැම්බර් මස 25 දින අංක 1003/5 දරණ ගැසට්‌ නිවේදනය මගින් අමාත්‍යවරයා විසින් මණ්‌ඩල දෙකකින් යුත් කමිටු දෙකක්‌ පිහිටුවීමට ක්‍රියා කළ යුතු විය ඒවා නම්

1. ග්‍රාම නිලධාරී ඒකක තුළ පාසල් පැමිණීමේ කමිටු

11. සෑම ප්‍රාදේශීය ලේකම් කොට්‌ඨාසයකම පාසල් පැමිණීම නියාමනය කිරීමේ කමිටු.

ඉහත අනිවාර්ය අධ්‍යාපන විධිවිධාන සිසුන් පාසලට ගෙන්වා ගැනීමට ශක්‌තියක්‌ වුවද, බොහෝ අවස්‌ථාවලදී කමිටු ක්‍රියාකාරකම් තුළ තිබෙන අක්‍රීයතාව හා අඩු සංවේදීතාව පිළිබඳ පවතින අඩුපාඩුකම් නිසා එම කමිටු පිහිටුවීමේ අරමුණ සාක්‌ෂාත් වූයේ දැයි විපරම් කළ යුතුය.

එම කමිටු සිය ගම් ප්‍රදේශයේ පාසල් නොයන දරුවන් සිටින නිවෙස්‌ කරා ගොස්‌ මවුපියන් දැනුවත් කොට ඔවුන්ට උදව් කරන සැලසුමක්‌ද සකසා දරුවන් පාසලට ගෙන්වා ගත හැකිය. එපමණක්‌ නොව එම කමිටු හා ගුරුවරුන් නිරන්තරයෙන්ම මේ දරුවන් කෙරෙහි දැඩි අවධානයෙන් සිටිය යුතුමය.යළි පාසල් ගමන අත්හිටවුවහොත් ඒ ගැන සොයා බලා අවශ්‍ය කටයුතු යෙදීමට ගුරුභවතුන්ද දැනුවත් කළ යුතුය.එහෙත් මේ කිසිවක්‌ අද ප්‍රායෝගිකව ඉටු නොවීම කනගාටුදායකය.

ළමයින් සිය දහස්‌ ගණන් පැමිණ ක්‍රමයෙන් පසුව අඩුවී ගිය පාසල්වල තත්ත්වය සොයා බැලීමක්‌ නොකළ නිලධාරීන් කළේ ළමයින් ප්‍රමාණවත් නැත යයි කියා පාසල වසා දැමීමට නියෝග දීමය. මේ තත්ත්වයට මේ කුඩා පාසල් පත්වූයේ කෙසේදැයි සොයා බැලීමද වටී. මේ සඳහා එක්‌ උදාහරණයක්‌ ලෙසින් අම්බලන්ගොඩ ධම්මකුසල කනිටු විදුහලේ එදා පැවති තත්ත්වය විපරම් කරන්නේ නම්, ප්‍රාථමික පංති සෑම එකකම වාගේ සිසුන් දහය, පහලොව වැනි සංඛ්‍යාවක්‌ සිට ඇත. ඒ සෑම පංතියකටම වෙන්වෙන් වශයෙන් ගුරුභවතුන් සිටඇත. සිසුන් සංඛ්‍යාවට අදාළව ගුරුභවතුන් සංඛ්‍යාව සන්සන්දනය කොට අවසානයේ දී වෙන් වෙන් වශයෙන් පැවති 1, 2, 3, 4 සහ 5 ශ්‍රේණිය පංති පහම බහුශේ්‍රණි යන ලස්‌සන වචනයකින් එකම එක ගුරුමහත්මියකට භාර දීම පාසල මේ තත්වයට ඇද වැටීමේ පළමු පියවරයි. බහු ශේ්‍රණිය ලස්‌සන වචනයක්‌ වුවත් මේ කරන්නේ පංති පහේම දරුවන් එකම පංතියකට දමා එක ගුරුමහත්මියක්‌ විසින් අධ්‍යාපන කටයුතු සිදු කිරීම බව දෙමව්පියන් දනී. යමක්‌ කමක්‌ කරගත හැකි සෑම දෙමාපියෙක්‌ම කළේ ඉන් පසුව තම දරුවන් මේ පාසලින් අස්‌කොට වෙනත් පාසලකට ඇතුළු කිරීමයි. ඒත් ඒ ජාතික හෝ ජනප්‍රිය පාසලකට නොවේ. මේ පාසල මෙන්ම නුදුරු අනාගතයේ වැසී යන පාසලකටය. අසරණ වූ දෙමාපියන්ට එය තාවකාලික පිළියමක්‌ වුවත් අවසානයේ දී සිදුවන්නේ එම දරුවන් අතරමංවීමය. මේ සමස්‌ත දිවයිනේම කුඩා පාසල්වල සැබෑ තත්ත්වයයි. දැන් මේවාට වගකිව යුත්තෝ කවරහුද?

මේ රටේ අනාගතය ගැන සිතා මේ වන විටත් වැසී ඇති පාසල් දහසක්‌ පමණ යළි මෙම ස්‌ථානවලම පිහිටු වීමට අවශ්‍ය කටයුතු යොදන්නේ නම් මැනවි. වගකිවයුත්තන්ගේ සැලකිල්ල මේ කෙරෙහි යොමු විය යුතුය. පාසලක්‌ වැසීම සිරගෙයක්‌ විවෘත කිරීමකැයි කියමනක්‌ද තිබේ. අපේ රටේ පාසල් වැසී යන අන්දම බලන විට අනාගතයේ සිරගෙවල් ඉදිවේද? දුප්පත් ගම්වැසියන් සිටින දුප්පත් ළමයින් යමින් සිට වැසී ගිය පාසල් යළි ඇරඹුවහොත්, ඒවායේ අඩුපාඩු සපුරා සම්පත්වලින් පෝෂණය කරන්නට නගරයේ ජනතාව නොපැකිලිව ඉදිරිපත්වනු ඇත. දැනට මේ වැසී ගිය සහ වැසී යන පාසල් දරුවන් ගැන අමතක කර මරනින්දේ පසුවන උදාසීන අධ්‍යාපන බලධාරීන් අවදිකොට කිසියම් වැඩ පිළිවෙළක්‌ යෙදීම සුදුසුය. රටට විශේෂයෙන්ම දුප්පත් ජනතාවට ජාතියට එය උදාර මෙහෙවරක්‌ වන්නේය.