ක්‍රිකට්‌ ඉතිහාසයේ පාකිස්‌තානයට ඉරෙහිව ඉහළම ටෙස්‌ට්‌ ජයග්‍රහණය ඊයේ වාර්තා කරයි

ගාල්ල අන්තර්ජාතික ක්‍රිකට්‌ ක්‍රීඩාංගණයේ පැවැති පළමු ටෙස්‌ට්‌ ක්‍රිකට්‌ තරගයේදී පාකිස්‌තානය පරදවා ලකුණු 209 ක දැවැන්ත ජයක්‌ වාර්තා කළ ශ්‍රී ලංකා කණ්‌ඩායම තරග 3 කින් සමන්විත ටෙස්‌ට්‌ තරගාවලිය 1-0 ක්‌ වශයෙන් පෙරමුණ ගැනීමට ඊයේ (25 දා) සමත් වූවේය. වසර 30 කට අධික දෙරට අතර ටෙස්‌ට්‌ ක්‍රිකට්‌ ඉතිහාසයේ ශ්‍රී ලංකා කණ්‌ඩායමක්‌ විසින් පාකිස්‌තානය පරාජය කරන ලද ඉහළම තරග ජයග්‍රහණය මෙය වීමද සුවිශේෂී වෙයි.

මීට පෙර ශ්‍රී ලංකා කණ්‌ඩායමක්‌ පාකිස්‌තානයට එරෙහිව වාර්තා කරන ලද ඉහළම තරග ජයග්‍රහණය වූයේ ඉකුත් 2004 වසරේදී ෆයිසලාබාද්හි පැවැති තරගයේදී පරාජය කරන ලද ලකුණු 201 ලකුණු සංඛ්‍යාව විය.

ලකුණු 36 කට කඩුලු 3 ක්‌ අහිමිව තිබියදී ඊයේ දිනය ඇරඹූ පාකිස්‌තානු කණ්‌ඩායමේ පළමු කඩුල්ල ලෙස සයිඩ් අ-මාල්ව (12) දෙවැනි පන්දුවාරයේදීම දුවද්දී දවා ගැනීමකට හසු කර ගැනීමට රන්දිව් සමත්වූවේය. අනතුරුව පිටියට පිවිසි අසාද් ෂµsක්‌ සහ යුනිස්‌ ඛාන් පස්‌වැනි කඩුල්ල වෙනුවෙන් ලකුණු 151 ක්‌ එක්‌ කිරීමට සමත්වීම මත තරගය පස්‌වැනි දිනය දක්‌වා යැමේ අවදානමක්‌ උදාවූවේය.

ඒ අතරතුර ඔවුන් විසින් ලබා දුන් උඩ පන්දු කිහිපයක්‌ද ශ්‍රී ලංකා පන්දු රකින්නන් අතින් ගිලිහී යැම මත ශ්‍රී ලංකා කණ්‌ඩායමේ ජයග්‍රහණය ප්‍රමාද වුවද දිනයක්‌ ඉතිරිව තිබියදීම පරාජයට පත් නොවී ගෞරවාන්විත පරාජයක්‌ දක්‌වා තරගය රැගෙන ඒම වෙනුවෙන් පාකිස්‌තානු පිතිකරුවෝ දැඩි වෙහෙසක්‌ ගත්හ. එහෙත් ඔවුන්ගේ දක්‍ෂතාවලට සාපේක්‍ෂව ශ්‍රී ලංකා පන්දු යවන්නන්ගේ දක්‍ෂතා ඉදිරියෙන් තිබීම මත එම උත්සාහයක්‌ ගඟට කැපූ ඉනි මෙන් විය. අවසානයේ පාකිස්‌තානු ඉනිම ලකුණු 300 කදී නිමාවට පත්වූවේය.

පන්දුවාර 80 අවසානයේ දෙවැනි නව පන්දුව ලබා ගැනීමට ශ්‍රී ලංකා නායකයා කටයුතු කිරීමත් සමග යවන ලද පළමු පන්දුවාරයේ පස්‌වැනි පන්දුවෙන් සාර්ථක පල නෙළා ගත් නුවන් කුලසේකර පැය 4 කට වඩා කාලයක්‌ කඩුල්ලේ රැඳී සිටිමින් ශ්‍රී ලංකාවට හිසරදයක්‌ව සිටි යුනිස්‌ ඛාන්ව ලකුණු 87 කට දවා ගැනීමට සමත් වූවේය. ඒ වන විටත් 48 වැනි අර්ධ ශතකය වාර්තා කරගෙන සිටි හෙතෙම පන්දු 213 කට මුහුණ දුන් ඉනිමෙන් හත් වතාවක්‌ පන්දුව හතරේ සීමාවෙන් ඔබ්බට යෑවීමට සමත්ව සිටියේය.

දිනයේ ආරම්භය සහ දිවා භෝජනය තෙක්‌ කාලයේදී එක්‌ කඩුල්ලක්‌ පමණක්‌ ලබා දුන්නද තේ පානයට මිනිත්තු කිහිපයකට පෙරදී රංගන හේරත් යෑවූ පන්දුවක්‌ ශµSක්‌ගේ පිත්තේ වැදී උඩ පන්දුවක්‌ ලෙස මහේල ජයවර්ධන රැක ගැනීම මත පාකිස්‌තානු කණ්‌ඩායමේ දෙවැනි කඩා වැටීමට පාදක වූවේය. දැවී යන විටත් පන්දු 165 කට මුහුණ දී සිටි ශµSක්‌ පස්‌වැනි අර්ධ ශතකයද සමගින් ලකුණු 80 ක්‌ රැස්‌ කරගෙන සිටියේය.

පාකිස්‌තානු ලකුණු පුවරුව ලකුණු 55 ක්‌ සටහන්ව තිබියදී හේරත්ගේ පන්දුවක්‌ හමුවේ යුනිස්‌ ඛාන් වයිඩ් මිඩ් ඕµa කලාපයේ පන්දු රකිමින් සිටි ඩිල්ෂාන් අතට උඩ පන්දුවක්‌ ලබා දුන්නද එය රැක ගැනීමේදී පොළොවට ස්‌පර්ෂවී තිබීම මත තවදුරටත් පිටියේ රැඳී සිටීමට හෙතෙම වාසනාවන්ත වූවේය. ඒ අයුරින්ම ෂµSක්‌ද රන්දීව්ගේ පන්දුවක්‌ හමුවේ ෂෝට්‌ මිඩ්විකට්‌ කලාපයේ සිට සංගක්‌කාර දෙසට අසීරු උඩපන්දුවක්‌ ලබා දුන්නද එයද රැකගැනීමට නොහැකි වීම මත ලකුණු 33 කදී අවසන් වීමට නියමිත වූ ඉනිම ලකුණු 80 ක්‌ දක්‌වා ඉහළ දමා ගැනීමේ වරම උදාවිය.

පාකිස්‌තානු කණ්‌ඩායමේ හය වැනි කඩුල්ල ලෙස යුනිස්‌ ඛාන් දැවී යැමත් සමග ශ්‍රී ලංකා ජයග්‍රහණය සඳහා තවත් කඩුලු 4 ක්‌ ලබා ගතයුතු වූ නමුත් එහිදී ශ්‍රී ලංකා පන්දු යවන්නන්ට හිසරදයක්‌ වෙමින් කඩුල්ලේ රැඳී සිටීමට අද්නන් අක්‌මාල් සමත්වූවේය. ලකුණු 40 කින් සමන්විත වූ අක්‌මාල්ව දවා ගැනීමට නොහැකි වුවද අනෙක්‌ අන්තයේ කඩුලු දවා ගනිමින් තවත් දිනයකට තරගය රැගෙන යැම වැළැක්‌වීමට රන්දිව් සමත්වූවේය. හෙතෙම පාකිස්‌තානු අවසන් පිතිකරුවන් තිදෙනාවම දවා ගනිමින් ශ්‍රී ලංකා ජයග්‍රහණය සිව්වැනි දවසේම සැමරීමට දායක වූ ප්‍රධානියා බවට පත්වූවේය. ඔහුට අමතරව ශ්‍රී ලංකාව වෙනුවෙන් පන්දුවෙන් දස්‌කම් දැක්‌වූ නුවන් කුලසේකර කඩුලු 3 ක්‌ සහ රංගන හේරත් කඩුලු 2 ක්‌ දවා ගැනීමට සමත්වූහ.

වේග පන්දු යවන නුවන් ප්‍රදීප් පාකිස්‌තානු පිතිකරු මොහොමඩ් අයුබ්ව කඩුල්ල මුවා කිරීමේ වරදක හසුකර ගනිමින් සිය මංගල ටෙස්‌ට්‌ කඩුල්ල දවා ගැනීමට සමත් වූවේය. මංගල ටෙස්‌ට්‌ වරම් දිනා ගැනීමෙන් පසු පන්දු යවන ලද සිව්වැනි ඉනිමේදී අදාළ මංගල කඩුල්ල දවා ගැනීමට ප්‍රදීප් සමත්වීමද කැපී පෙනුණි. මීට පෙර හෙතෙම අබුඩාබිහි පැවැති තරගයේදී ඉනිම දෙකේදීම සහ මෙම තරගයේ පළමු ඉනිමේදීද පන්දු යෑව්වද එකම හෝ කඩුල්ලක්‌ දවා ගැනීමට අපොහොසත් වූවේය.

මෙම තරගයේ වීරයා සම්මානය පළමු ඉනිමේදී ලකුණු 199 ක්‌ ලබා ගත් කුමාර් සංගක්‌කාරට හිමිවූවේය.